طريق وادى الريان
1- من ميدان الرماية أتجه شمال على طريق الفيوم
2- بعد حوالى 65 كم ( هتكون عديت على مزلقان وبعدين كمين ) بعد الكمين بحوالى 8 كم فى دخلة يمين أدخل و أفضل ماشى على طول ( طول الطريق تقريباً هتلاقى بحيرة قارون على يمينك )
3- بعد حوالى 60 كم كمان هتدخل شمال ( هتكون عديت على القرى دى : شكشوك و الخالدة و قوتة وتونس و أخيراً قرية يوسف الصديق )
4- بعد ال 60 كم دول هتلاقى يافطة بتقول شلالات الريان شمال 12 كم و قصر قارون طوالى 14 كم أنت هتدخل شمال وهتفضل ماشى ال 12 كم وهتلاقى الطريق مزدوج ( رايح جاى ) وضيق جداً وهتلاقى قرب أخره ملف يمين حاد جداً جداً المهم أن بعد الملف ده بحوالى 1 أو 2 كم هتلاقى يافطة تانية بتقول شمال محمية وادى الريان هتدخل منها
5- بعد الدخول من البوابة هتمشى حوالى 14 كم على أسفلت وبعدين هتلاقى مدق على الشمال بيودى على الشلالات ( هتلاقى يافطة حجرية بتقول كده ) أدخل المدق وهتمشى فيه حوالى كيلو كيلو ونصف لحد لما تلاقى كافتريات بدائية جنب البحيرة أركن هناك و أنزل أسأل الشلالات فين عشان بتبقى مستخبية ورا خوص ( نبات ) طويل قوى
المكان هناك هايل مش عاوز أقولكوا على الطبيعة عاملة أزاى
الكافتريات متواضعة جداً جداً وكذلك الخدمات ( التواليت يعنى ) بل ده بالذات يكاد يكون غير أدمى بالمرة مع العلم أنى لما سألت قالولى فى 2 واحد نضيف والتانى مش قوى وطبعاً انا قولت أروح النضيف ويا ريتنى ما روحت
تذاكر الدخول للمصريين 2 جنيه للفرد + 5 جنيه للسيارة ( دخول المحمية أصلاً )
المكان هنا عبارة عن بحيرة أولى ودى بتلاقيها بعد البوابات بحوالى 4 كم ومفيش عندها أى خدمات
البحيرة دى على هضبة عالية شوية وبعد منسوب الميه ما على فيها عملت البحيرة التانية عن طريق الشلالات ( الكلام ده كان فى أول السبعينيات )
تجنب الذهاب هناك أيام الجمعة والسبت والعطلات عشان الزحمة ( أهالى الفيوم وبنى سويف )
وكمان فى الصيف عشان الناس البسطاء اللى فى الفيوم و بنى سويف بيبقى ده المصيف بتاعهم وكمان الجو بيبقى شديد الحرارة
http://www.postimage.org/gx1ZCp_i.jpg
دى صورة من عند البحيرة الأولى
http://www.postimage.org/aV1Ax_ri.jpg
ودى صورة من عند البحيرة التانية
http://www.postimage.org/aV1AylTA.jpg
دى صورة الشلالات
أرجو أنى مكنش طولت
أه نسيت أهم حاجة :) أعمل حسابك على تربيط عفشة أول لما ترجع :) :) :)