الموضوع: باركوولي أخيراً جبت عربية جديدة (نيو اكسنت 2010)

المشاركة الأصلية كتبت بواسطة KoDaK_Gti

مبروك وربنا يباركلك فيها ويكفيكى شرها
ومتنسيش تطلعى حاجة لله

وفترة التليين دى مهمة جدا دلوقتى اخرك 90 على الطرق السريعة
متكبسيش على دواسة البنزين جامد مرة واحدة ومتحرقيش على الغيار
متشغليش التكيبف غير بعد اول 1000 كيلو
واتعودى تنك البنزين عندك ميقلش عن الربع (اعتبرى الربع ده هو الشرطة الاخيرة)
وطبعا بما ان العربية لسة جديدة تتبقة تتابعى دورة المية وتشوفى هل فى نقص فى المية او فى الزيوت او اى ترشيح زيوت وخلافه علشان لو لا قدر الله فى حاجة تلحقيها فى اولها

ومبروك العربية

الله يبارك فيك وإن شاء الله لازم اطلع حاجة لله طبعاً وانا فعلا طلعت جزء بسيط وهاطلع تاني ان شاء الله بس الاقي طريقة مناسبة اطلع بيها الصدقة دي ان شاء الله قريب.
انا فعلا مشغلتش التكييف بس لما كنت برخص اضطريت اشغله شوية عشان المندوب كان معايا وهو اللي كان سايق وشغله فإتكسفت اقوله متشغلوش بصراحة خصوصا ان الجو كان بشع فعلا .
لكني في اليومين اللي خرجت فيهم اضطريت استحمل الجو ومشغلتوش بس مش عارفة هاقدر اصبر علي عدم تشغيله كده لحد 1000 كيلو ولا لأ !!!
لاني يدوب العداد وصل لحد 180 كيلو بس لسة هاستني 820 كيلو كمان؟ وانتوا طبعا عارفين إن الجو نااااااااااااار اليومين دول وخصوصا ان مشاويري كلها كانت في وقت الظهيرة اللي هو عززززززززززز الحر .
عموما هاحاول اتماسك ومشغلش التكييف على اد مااقدر.
عموما ربنا يقدرني واستحمل كده.
بالنسبة للبنزين مفيش مشكلة هافول اول مالتانك يوصل للربع زي ماقلت .
دلوقتي بقي متابعة دورة المية دي اشوفها في القربة بتنقص ولا لأ يعني؟ ومتابعة الزيت اللي بتظهر في التابلوه لو اللمبة نورت ولا افتح الكبوت بقي واشوفه زي عربيتني القديمة؟
عموما انا حتى لسة معرفش اماكن الحاجات دي فين تحت الكبوت لإني كنت متخيلة اني مش هابص علي الكلام ده دلوقتي خالص بس كويس انك قلتلي عشان ابتدي اتابعها لحد الصيانة الجاية ان شاء الله.
وميرسي جدا على المعلومات دي

المشاركة الأصلية كتبت بواسطة Terrible_DaRsH

الف مبروك ربنا يبارك لك فيها و يبعد عنك سائقى الدبابات :)

بس ممكن اعرف سببب الاختيار على النيو اكسنت بالذات ?

بالنسبة للإختيار انا في البداية كنت بفكر في التو بعدين I10 أو بيكانتو لاقيت نفسي هاكسر ال 60 الف جنيه في عربية 1100 سي سي وصغيرة (ده غير اني لما سألت على قطع غيارهم لاقيتها عالية) فقلت اعلى شوية واجيب فيرنا او لانوس فلاقيت ناس كتير بتشتكي من الفيرنا رغم اني معجبة بيها جدا فلما رسيت على لانوس قعدت اسأل في كل المعارض لاقيتها ناقصة بشدة من السوق وفي ناس قالوا لما تنزل هاتغلي او تتباع Over Price ولاقيت الفرق في الفلوس بين لانوس ونيو اكسنت مكنش كبير اوي والناس بتشكر جدا في النيو اكسنت وكل مالكيها مبسوطين بيها وكمان لما شوفتها في اوتوماك عجبتني اوي فتوكلت على الله واختارتها وكمان هي اعلى من اللانوس بالنسبة ليا لإني بعدي على كمية مطبات بها بعض الشوارع مش شوارع وفيها مطبات بجد المطبات عندي مستفزة بشكل بشع يعني فكان لازم اجيب عربية عالية عن الأرض (لو كنت طولت اجيب 4×4 كنت عملتها بسبب الشوارع دي)

وعلى فكرة لفترة من الوقت فكرت اجيب صيني لكني بصراحة خفت اخوض التجربة دي وخفت اغامر خصوصا كل مااشوف رأي حد عنده مشاكل في عربيته وبيحذرمن الصيني فسرعان ما استبعدت الصيني من اختياراتي (رغم اعجابي ببعض موديلاته).
وطبعا مكنش ينفع اختار حاجة في فئة سعرية أعلى من كده عشان القسط ميكونش فوق طاقتي الإحتمالية
هي دي كل الاسباب اللي خلتني اختار نيو اكسنت بالذات

الف الف مبروك وربنا يديلك خيرها ويكفيك شرها

المشاركة الأصلية كتبت بواسطة ahmedhilmy

ربنا يفرحك ديما و يسعدلك ايامك الف مبروك و ربنا يديكي خيرها و يمنع عنك شرها و لو في فرصة اخدها لفة يا ريت متنسنيش مبروك عليكي

الله يبارك فيك وطبعا حضرتك تؤمر والعربية تحت أمرك .

المشاركة الأصلية كتبت بواسطة jisso82

ألف مليون مبروك يا رنا و ياريت يكون هو ده اللى كان مضايقك و تبقى فتحت معاكى خلاص

الله يبارك فيك
بالنسبة لموضوع اني كنت مضايقة بص هو موضوع العربية كان حاجة من الحاجات اللي مضايقاني خصوصا ان الموضوع اتكلكع لفترة لكن مازالت في حاجات تانية مخلية حالتي النفسية مش اوي لكن الحمد لله أتمنى إنه يمكن فرحتي بالعربية تخليني افك شوية وابقي افضل ادعيلي بس ان حالتي النفسية تتحسن.
وعموما ميرسي جدا لإهتمام حضرتك

المشاركة الأصلية كتبت بواسطة askanas

مبيووووووك وان شاء الله تكملي اقساطها بس هو يطلع ايه الاقساط الاسلامي دي ؟

الله يبارك فيك

بالنسبة لمعنى تقسيط اسلامي حضرتك ممكن تضطلع على المواضيع اللي في اللينكات دي وهاتقدر تعرف منها يعني ايه تقسيط اسلامي

اللي عايز تقسيط غير ربوي يروح المعرض ده( خلاصه الكلام)
شراء سيارة بطريقة إسلامية
بنك فيصل الأسلامى فقط الى بيقسط بطريقه اسلاميه 100%

المشاركة الأصلية كتبت بواسطة ahmadalsattar

الف مبروك على العربيه
لو تكرمتى ممكن تفاصيل التقسيط الاسلامى لهذا البنك و المقدم و الاقساط وهل هناك فائده على تاخير القسط مثلا
و هل اجراءات البنك سهله ام معقده وشكرا وربنا يبارك لك فيها

الله يبارك فيك.
بالنسبة للتقسيط تبع البنك ده فشروطه كالتالي:
المقدم ميكونش اقل من 25% من تمن العربية
القسط لايقل عن 35% من الراتب الشهري
الفايدة بتكون 9% ثابتة سنوياً
أقصى مدة للتقسيط 5 سنين
الورق المطلوب صورة بطاقة + ايصال كهربا أو مياه أو غاز حديث (ميكونش مر عليه أكثر من 3 شهور تقريبا) + خطاب HR مفردات المرتب + عرض سعر بنوع وموديل وسعر العربية من معرض معتمد لدى البنك.
حضرتك بتودي الورق ده للبنك وبعدين تاني يوم بيتبعتلك استعلام على البيت والشغل وفي خلال 3 ايام الموافقة بتطلع (بس هما بتوع الاستعلام رخمين شوية واسئلتهم كتيرة ورخمة) بعد الموافقة ماتطلع ، المندوب بينزل المعرض ويعاين العربية بنفسه ويكتب عقد شرا بين البنك وبين المعرض فيه رقم شاسيه العربية وبياناتها كلها.
بعدين حضرتك بتروح البنك تسدد المقدم وتمضى الشيكات (بتمضي على شيكات ربع سنوية كل ماتسدد 3 أقساط تاخد شيك وبتمضى كمان على 4 شيكات كمان بقيمة التأمين الشامل لل 4 سنين لما بتجيبلهم وثيقة التأمين بتاعة كل سنة بتستلم الشيك بتاعها) والعقد اللي بينك وبين البنك، وتاني يوم بتروح البنك تاخد خطاب التوصية وخطابين للمرور وبتعمل طبعا وثيقة تأمين شامل على العربية بإسمك ولصالح البنك وبتاخد كل الورق ده وتروح المعرض تستلم العربية.
تاني يوم بتنزل ومعاك مندوب من المعرض ترخص وتعلق نمر وتسلمه صورة من الرخصة بتاعة العربية.
بس كده
هي دي كل الإجراءات الموضوع مش معقد اوي لكنه محتاج صبر شوية وشوية مشاوير خصوصاً لو العربية مش متوفرة في المعارض (زي حالاتي كده) .
بالنسبة لموضوع انه إسلامي صرف بصراحة انا مش هاقدر أجزم إن كان فعلا فعلا اسلامي اكيد او لأ !
لكني فضلت البنك الأبعد عن الشبهات لإنه مش بياخد نسخة مفتاح ومش بيكتب توكيل على العربية (حظر بيع فقط) وكمان بيكتب عقد شرا بينه البنك وبين المعرض ولازم تاريخه يكون قبل تاريخ توقيعك على عقدك مع البنك (وإسمه عقد مرابحة) ومش بيكتب شيك إجمالي بسعر العربية كلها ومش بيحتاج ضامن وكمان كان في بند إن في حالة التأخير عن دفع القسط بيعمل غرامة 2% من قيمة القسط لكني الحمد لله لاقيتهم لغوا البند ده في العقد الجديد (بند الغرامة كان مطبق لحد نهاية الشهر اللي فات واتلغي من اول شهر 7 والحمد لله ).
وكمان انا طلبت الإضطلاع على كل الورق قبل ماكمل أي اجراءات معاهم والمندوب أكدلي إن عندهم لجنة شرعية هي اللي حاطالهم ترتيب الإجراءات بالشكل ده وبنود العقد دي.
عموما انا هاحاول اعمل العقد Scan وارفعه على المنتدي هنا تشوفوه.
انا بعتذر عن تأخيري في الرد لكنى كنت مشغولة اوي امبارح والنهاردة فمعرفتش ارد بسرعة.
اتمنى المعلوماتي دي تفيد حضرتك وألف مبروك مقدماً