الموضوع: باركوولي أخيراً جبت عربية جديدة (نيو اكسنت 2010)

المشاركة الأصلية كتبت بواسطة abohalmos

الف الف مبروك على العربية الجديدة

ربنا يديكى خيرها و يبعد عنك شرها
و تمشى بيها فى الخير ان شاء الله
و ربنا يكرمك و تخلصى قسطها على خير ان شاء الله
و طبعا ينفع انك تأجلى الصدقة اللى انتى عايزة تطلعيها فى رمضان
بس انا ليا رأى متواضع ....انك لو فكرتى هاتلافى كل الناس الكويسة و الوحشة بتعمل صدقات كتير فى رمضان
و فعلا بيبقى الخير كتير لدرجة انه بتبقى مش لاقى حد تديله
انا رأيى تطلعى دلوقتى عشان فيه ناس دلوقتى محتاجة و دلوقتى جعانة و دلوقتى نفسها تلبس و مش معقولة يستنوا لرمضان
كمان انا لو منك هابقى خايف لو حصل اى حاجة بعد الشر للعربية ........هاتقعدى تقولى يا ريتنى كونت طلعت صدقتها
معلش يا استاذة رنا ...انا مش قصدى اضايقك و اضيع فرحتك
و لو رايى معجبكيش .....اعتبرى انك ماسمعتيش حاجة
و افتكرى بس مبروك على العربية و ربنا يسعدك بيها ان شاء الله .

الله يبارك في حضرتك وميرسي على الدعوات الجميلة دي وربنا يستجيب ويجعلها من نصيبي فعلا .

اما بالنسبة لرأي حضرتك في موضوع الصدقة انا بحييك على تفكيرك وفعلا بفكر جدياً أعمل بنصيحة حضرتك واطلع الصدقة قبل رمضان أو حتى اطلع جزء دلوقتي وجزء في رمضان بنية اطعام وإفطار مسلمين.
وميرسي جدا على اهتمامك

المشاركة الأصلية كتبت بواسطة ahmadalsattar

مبروك على السياره
كنت عاوز اعرف تفاصيل موضوع البيع الاسلامى من بنك الوطنى و الاجراءات المطلوبه للاهميه عشان انا ناوى اشترى عربيه بتقسيط اسلامى ان شاء الله

الله يبارك فيك وبالنسبة لإستفساراتك انا رديت عليها كلها في ردي السابق على الأستاذ ahmadalsattar
ولو في اي حاجة مش واضحة أو اي إستفسار انا تحت امر حضرتك.

المشاركة الأصلية كتبت بواسطة evoo90

نفس مشكلتى مع الافيو بس انا طلعت انصح منك شويه من غير ضحك ولا تريقه جبت مخده صغيره وحطتها تحت العراقه وحسيت فعلا ان الكرسى على شويه وكل ماجى اطلع من عربيه اكون لازق يها افضل اشب من على الكرسى عشان اشوف اى حاجه من اخر الكبوت ولا الاكصدام مش بعرف ودماغى بتخبط فى السقف مره قبل ما احط المخده واقف ورا ميكروباص فى لجنه رحت خابط النمره بتاعتى فى القاطره بتاعته راحت النمره متكرمشه كأن ورقه ودست فى نصها ووقفت قدام الظابط بص فى وشى وراح متنح للنمره ولقيته وطى عليها وبيتفرج وقالى اطلع اطلع

بجد ربنا يكون فى عون اللى معاهم ماتريكس بقى كأنهم راكبين ميكروباص

ايه الرغى دى نسيت اقولك مبروك ربنا يباركلك فيها يارب

الله يبارك فيك
المشكلة فعلا اني مش شايفة المطبات والحفر ولا شايفة الابعاد من قدام خالص وبحس اني خلاص هاخبط والاقي الناس بتقولي ادخلى واسع قدامك واسع (بصراحة ببقي خايفة اوي ومكسوفة جدا في نفس الوقت لإني لسة محفظتش ابعادها ) موضوع المخدة انا فكرت فيه بصراحة وكنت عاملاه في عرييتي الاولانية لكني اتعودت عليها لدرجة اني لو شيلتها مكنتش بعرف اسوق اصلا ده غير طبعا ان كل اللي يشوف المخدة بعد مانزل منها يتريق طبعاً :POINTI~2[2]:واللي يقولي انتي بتنامي في العربية ؟ واللي يقولي ياقصيرة مع أن والله طولى مناسب بالنسبة للبنات يعني فعشان كده بحاول اني معملش كدة المرة دي عشان متعودش عليها برده.

المشاركة الأصلية كتبت بواسطة mustafa_maghraby

مبروك عليكي العربية ربنا يديكي خيرها و يكفيكي شرها
وكنت عايز اسالك على موضوع التامين
انت عملتي ايه فيه
أصل انا برده حجزت عربية هيونداي اتوس مع بنك ابوظبي الأسلامي
ومحتاج اعرف تفاصيل موضوع التامين لاني مش فاهمة اصلا

الله يبارك فيك.
بالنسبة للتأمين حضرتك اجباري لازم تعمل تأمين شامل على العربية طوال فترة التقسيط والوشيقة بتكون بإسم حضرتك ولصالح البنك عشان لاقدر الله لو حضل حاجة البنك يعرف يضمن حقه في العربية ويسترد تمنها من شركة التأمين اما بالنسبة لشركات التأمين فهما كتير وانا كنت محتارة بين كذا شركة ورسيت في الاخر على شركتين اللي هما قناة السويس للتأمين أو مصر للتأمين فلاقيت حد يعرف حد داخل شركة مصر للتأمين هايجيبلي نسبة معقولة واقل شوية بسيطة من النسبة الرسمية وممكن ينفعني في حالة لاقدر الله لو في حوادث فتوكلت على الله وامنت معاهم واستلمت الوثيقة في نفس اليوم وبعتوهالي لحد الشركة عندي وجواب السداد اخدته تاني يوم وعموما دي لينكات لمواضيع تخص التأمين وشركاته ومميزات كل شركة ايه:

مقارنة لشروط واسعار شركات التامين فى مصر
المواضيــــع الهامـــة عن التأميـــن عن السيــــارات

المشاركة الأصلية كتبت بواسطة mo7a_mo7a

مليوووووووووووووون مبروك

وبالنسية للصدقة الناس المستحقة محتاجة طول السنة مش في رمصان بس
وربنا سبحانه وتعالي رب كل الشهور ولا يجوز قصر الخير علي شهر واحد فقط خصوصا ان محدش فينا ضامن عمره
تقبل الله منا جميعا

اللهم بلغنا رمضان

الله يبارك في حضرتك
وإن شاء الله هاعمل بالنصيحة دي واطلع الصدقة قبل رمضان وفي رمضان كمان بإذن الله.

المشاركة الأصلية كتبت بواسطة pro_samir

ربنا يباركلك فيها و يقدرك على الأقساط

الدعاء بتاع العربية الجديدة ان الواحد يحط ايدة على أول العربية ويقول اللهم إنى أسألك خيرها وخير ما جبلتها علية وأعوذ بك من شرها وشر ما جبلتها علية

وحاولى تتعودى على انك مش تشوفى الكبوت لأن كل العربيات الأنسيابية كدة حتى لو قديمة ، المهم تعرفى بالنظر كدة بداية الكبوت فين والشنطة كذلك علشان متتعبيش فى المشى وبالذات لما تيجى تركنى

وفى انتظار تفاصيل القسط مع البنك دة

الله يبارك في حضرتك
ان شاء الله هاقول الدعاء بتاع العربية وأنا خارجة بكرة بيها بإذن الله تعالي قبل ماركبها.
اما بالنسبة لموضوع الابعاد والكبوت انا بحاول اتعود والله ومعنديش مشكلة في الشوارع العادية المشكلة كلها في الشوارع الضيقة لما بقابل عربية في وشي واحب اعدي منها مببقاش عارفة اعمل ايه وكمان موضوع الركن ده مقرف فعلا بس اديني بحاول على قد ماقدر اتعود على ابعادها بقي .

المشاركة الأصلية كتبت بواسطة SuccessCre8or

طب من غير ضحك ولا تريقة ...
انا كنت عامل اللي انت عامله بالظبط في الفيرنا ... هههههههه
اصلي قصير شوية بس دلوقتي اتعودت خلاص. ( و الكرسي مش بيعلى .. اصلي هاف اوبشنز)
بس الأفيو و التيدا و اللي كبوتهم منفوخ بجد حاجة صعبة بالنسبة لي ...


و ألف ألف مبروووووك لصاحبة الموضوع و ربنا يديكي خيرها و يكفيكي شرها :) :)

الله يبارك في حضرتك
واضح ان موضوع المخدة ده منتشرة يعني الحمد لله مطلعتش انا لوحدي بقي

المشكلة فعلا اني مش شايفة المطبات والحفر ولا شايفة الابعاد من قدام خالص وبحس اني خلاص هاخبط والاقي الناس بتقولي ادخلى واسع قدامك واسع (بصراحة ببقي خايفة اوي ومكسوفة جدا في نفس الوقت لإني لسة محفظتش ابعادها )

عادي جداً ...
انا بقالي حوالي سنتين بسوق و لسة موضوع الأبعاد دا ضايع عندي خاصة لما ارجي اركن موازي للرصيف بين عربيتين (كابوس بصراحة) ... بس بركنها في الآخر ..
الحمد لله