الموضوع: اليابانى اعطاله اقل من الالمانى

المشاركة الأصلية كتبت بواسطة tananybasha

نيجى بقى لليابانى اخره 1/2 عمره على 120000 أو كبيره 150000 ممكن يخش فى عمرة كامله - و لو انا غلطان حد ركب يابانى و المانى يكدبنى

مش اوى كدة .. العربية فى الاول والاخر استخدام
كان معايا مازدا بعتها عاملة 214000 كم متفكش فيها مسمار اكتر من اللصيانة الدورية (العربية ككل مش الموتور بس) ومعايا لانوس معدية 300000 كم اتعملها طقم شنبر بس (دة كان بالمرة والموتور مفكوك نتيجة لمشكلة تانية بعيد عن عيب فى العربية "طبة الزيت اتخبطت")

نيجة بقى للموضوع الاصلى
مش عارف لية الناس مصممة تقارن الفكترا بالكريستالة والكورولا مع انهم مش نفس الفئة ودى حاجة ودول حاجة تانية خالص (المقارنة ظالمة للكريستالة والكورولا) لما نقارن الفكترا نقارنها بالكامرى والجالانت والاكورد والباسات والفئة التالتة والمرسيدس c واحنا هنعرف انهى عربيات نجحت فى مصر وانهى خسرت
اى حد بيمشى فى اى شارع من شوارع مصر ممكن يعد كام عربية كامرى وجالانت واكورد مع بعض ويعد نوع واحد بس من الالمانى اللى قلتهم ويقارن وهيعرف الاجابة
انا عايز بس اى حد ركب المانى واى حاجة تانية مش هقول يابانى بس لأ اى حاجة يقارن بينهم بس مقارنة عادلة من كل النواحى مقارنة كمميزات وعيوب ويشوف النتيجة هتبقى فى صالح مين

الناس اللى بتقول الالمانى مشاكلة كتيرة , هو فعلا مشاكلة كتييير بس مع واحد مش بيحافظ على العربية انما هات عربية المانى متحافظ عليها وشوف المشاكل , العيب فينا مش فى العربيات (طبعا العربيات مش كاملة كل عربية لازم فبها عيوب) بس اللى اقصدة ان ثقافة الشعب المصرى عايز يركب حمارة مش عربية بمعنى حاجة تمشى طول النهار واللييل ومتقولش بم يعنى تمشى من غير صيانة ويوم متحتاج صيانة اى عجلاتى ولا سباك يعك عكتين والعربية تمشى .. للأسف دة ممكن يمشى مع اليابانى القديم لقلة التكنولوجيا بس ميمشيش مع الالمانى ولا حتى اليابانى والكورى الحديث .. الالمانى مش بتاع عك صنايعية وقطع غيار من اى حتة والا العربية هتتعبك وعمرها ما هترجع زى ماكانت حتى لو صرفت عليها تمنها .. طيب هتصرف؟ ايوة هتصرف بس فى المقابل عربية بدون مشاكل وفيها كل اللى انت عايزة يعنى قارن بين اللى دفعتة وبين احساسك بالعربية
انا عايز الناس تستنى كمان كام سنة لما العربيات اليابانى الحديثة تقدم هتبقى حالة العربيات ازاى .. لو نفس الشخص اللى معاة الفكترا وتعباة اشترى لانسر ولا كورولا جديدة وقعدت معا نفس المدة ونفس الاستخدام هتبقى حالة العربية اية وهو بيقول عليها اية؟!!
ولا لما نقارن نقارن تكنولوجى عالية بعرربيات تكنولوجى اقل وفئة اقل ونقول اصل العربية كذا وكذا وصيانتها اد كدة!!!!!

اعرف واحدة معاها لانسر بومة وطبعا كل اللى تعرفة عن السواقة مفتاح العربية وتانك البنزين ومعاد الصيانة فى التوكيل لما بتركب عربية جوزها جيتا بتنزل تسب وتلعن فى اللانسر بداية من فتح وقفل الباب وصوتة
واحد قريبى كان معاة اكسيل ثم صنى ثم استرا ثم اوكتافيا ثم نيسان اكس ترايل .. بعد تجربتة للعربيات دى كلها (كلهم ملكة يعنى مش لفة بيجرب وخلاص) الاسترا والاوكتافيا ميتقارنوش بالباقى صحيح الاكس ترايل فئة تانية خالص غير الباقى بس لما هنتكلم عن عربية بمعنى عربية يبقى الاسترا والاوكتافيا
انا عايز الناس تنزل تسأل على اسعار قطع غيار وصيانة العربيات اليابانى والالمانى الجديد وتحكم .. حتى لو الالمانى اغلى (ودة مش دايما بالعكس فى حاجات بيبقى اقل) بس قارن بين سعر العربية زيرو دافع فيها كام وصيانتها وقطع غيارها بكام