الموضوع: تغيير علبة الدركسيون .... كلاكيت تانى مرة (سريون 1.5 2008)

المشاركة الأصلية كتبت بواسطة human12

انا عندى اتنين صحابى قلتلهم على السيريون و التقسيط المباشر اللى بتعمله
انا بس مهتم اعرف اكتر من مالكى السيريون المحايدين حول مدى كفاءه موضوع التكييف ده و حكايه علبه الدريكسيون اللى فيه كذا عضو اتكلم فيها
الواحد يخاف يقول للناس تشترى حاجه و بعدين يدعوا عليه

مظنش إن انا أوصف إني محايد بس هاجتهد إني أبقى محايد يا طارق :)
بس شخصياً مقدرش أتجاهل إن التوكيل مش قادر يوصل لحل في مشكلة علبة الدركسيون.
دي مصيبة كبيرة مخليا واحد زي حالاتي عنده المشكلة وخايف أروح أبدلها
لأن كتير من الناس اللي راحت غيرتها طلع عندها بلاوي تانية غيرها.

لو كان التوكيل قدر يشخص المشكلة ويحلها كنت قلت لك انصحهم يشتروها
إنما مادام لسة الأمر عند التوكيل قابل لضرب الودع وبختك يابو بخيت يبقى نصيحتي هاتكون إنك تنصحهم يشوفوا عربية غير السيريون إلا إذا كانت معلومة ان العيب اختفى في موديلات 2009 معلومة صحيحة ودي ميأكدهاش غير ملاك 2009.

على فكرة الصوت مش لكل الناس صوت مزعج، بس انا مثلاً كان الصوت بادئ عندي مش مزعج ويمكن كمان مش مسموع ودلوقتي مضايقني جداً. ولما أجي أفكر كدة لو مكنتش جبت السيريون كنت ممكن أجيب إيه مش باقدر أرد على نفسي.

فعلاً يا طارق إستكمالاً لكلام أخونا العزيز أبو حمزة......بلاش في الوقت الحالي ترشح السيريون لأصدقائك عشان موضوع علبة الدركسيون الي فعلاً بقى مزعج جداً

انا من كلام الناس اللى هنا اللى كانوا بيتكلموا على السيريون خلانى انصح كذا حد بيها من كتر الشكر فيها
بجد حاجه تزعل
و شكرا للاعضاء الكرام

المشاركة الأصلية كتبت بواسطة human12

انا من كلام الناس اللى هنا اللى كانوا بيتكلموا على السيريون خلانى انصح كذا حد بيها من كتر الشكر فيها
بجد حاجه تزعل
و شكرا للاعضاء الكرام

يا طارق مفيش داعي للزعل :)
من غير ما نهون من أمر المشكلة اللي بنواجهها السيريون مش بالسوء ده
باستثناء الصوت العربية ممتازة من كافة الأوجه
التوكيل بس ناقصه انه يوصل لحل مُرضي للعملاء فيما يخص علبة الدركسيون، هما بس دورة اتخاذ القرار عندهم طويلة وبطيئة شويتين
وبعدين إحنا كنا فين وبقينا فين، إحنا قعدنا أكتر من 6 شهور لغاية ما اعترفوا ان فيه مشكلة أصلاً :(
زي ما قلت لك الأمر لا يشكل مشكلة لكل الملاك، فيه تفاوت في الاحساس بيها
وانا مثلاً ليا زميل معاه الـ 2007 لغاية دلوقتي مش حاسس بأي مشكلة ماشاء الله لا قوة الا بالله ربنا يبارك له فيها :)
انت بس انقل الصورة كما هي، ولوأي حد من طرفك حابب يجرب العربية إحنا جميعاً تحت أمره.
وانا أول واحد عندي استعداد حتى لوهاجيلكم للجانب الآخر من القاهرة في مدينة نصر وما بعدها اللي بالنسبة لي بلاد ما وراء النهرين :)

المشاركة الأصلية كتبت بواسطة karim_monir

طب الحل ايه لو مفيش ضل ؟
طبعا التكييف القوي مايفرقش معاه العربية واقفة في الشمس ولا واقفة في الضل
لان مهمة التكييف هو تبريد العربية لدرجة معقوله
عربية واقفة في الشمس هايخد وقت اطول شويه
ومع فتح الزجاج واخراج الهواء الساخن المحبوس لمعادلتة بالهواء الخارجي
المفروض العربية مع بدء التحرك ما تاخد اكتر من 5 دقايق وتكون باردة
و10 دقايق وتكون ساقعة تماما
دي مواتير وتكييفات 1300 ياباني برضه ولا شركة شانا ليها دخل في الموضوع:h_angry[1]:

ماشي يا كريم بس التكييفات اللي انت بتتكلم عليها دي من 1600 سي سي وانت طالع
اما 1300 سي سي بيبقى موضوع الهواء السخن ده مأثر عليها برضه
يعني مثلا لما بطلع بالعربيه من مكان ظله بسقع من التكييف بجد
واحنا قولنا اكتر من مره موضوع فتح الزجاج الخلفي وتشغيل المراوح لتخروج الهواء الساخن من داخل العربيه علشان تحس بالتبريد بسرعه

بصراحه موضوع التكييف ده بيفرق من شخص لأخر ومن حاله لحاله
يعني في عوامل كتير بتبقى مؤثرة
بس ككل
انا شايف ان تكييف السيريون مرضي لها ولكن مش زي الكورولا مثلا ولا زي الأوروبي
وخلي بالك انا عربيتي لونها اسود كمان

اما بخصوص الكلام على العلبة بتاعت الدركسيون
فانا مش هفتي لأن الواحد بصراحه تعب من كتر الكلام ولما بيتكلم في ناس بتزعل من الكلام

انا شايف ان الموضوع واخد حجم كبير شويه
والدليل اني غيرت العلبة والحاج توفيق غيرها ايضا ولم الاحظ اي شئ على العربيه والصوت اختفي ولا يوجد مشكلة الآن
والحاج توفيق لم يذكر شئ لحد الآن عن التغيير

انا أظن الحاجات اللي عند معاذ دي في جزء خاص بالحادثة بتاعته
يعني نحط كل الأحتمالات
انا غيرت العلبة ومن اول مره ولا العربيه حدفت ولا في صوت ولا في ثقل ولا اي شئ لحد لاىن والحمد لله
فمش كل حاجه ممكن نكون عندنا دراية بكل جوانبها

انا رايي ان اللي عنده صوت فعلا الآن يروح يغير العلبة وان شاء الله هيتبسط من الجديده
ان شاء الله

المشاركة الأصلية كتبت بواسطة توفيق طة

أ بو عبد الله أخيرا سمعت صوتك يااااااااااااة هو الحر بيعمل كدة مع الاحباب ؟؟

أنا والحمد لله بعد أن غيرت علبة الدريكسيون ومع المتابعة الدقيقة والتجربة اليومية لم ألاحظ سؤ ..

بل عادت لأصلها لا صوت ولا حدفة يمين أو شمال الحمد لله على كل شئ.لكن ما لاحظتة بمتابعتى

لشكوى الأغلبية هنا بعد تغيير العلبة أن من يشتكى تكون عربيتة موديل 2008 وهذا شئ غريب وملحوظ

صححونى لو أنا على خطأ ..

تحيـــــــاتى ..

ده بيعمل اكتر من كده
لا والله يا استاذ توفيق مش الحر
ولكن فعلا انا مضغوط الأيام دي وربنا ييسرها عليا وعلى جميع المسلمين ان شاء الله

بس انا بشك ان موضوع معاذ بيني وبينك له علاقة بخبطة العربيه من قبل او التركيب بتاع العلبة
اما موضوع العلبة نفسها فاظن ان مفيش مشكلة ان شاء الله فيها

اما موضوع فرق الموديلين فمش عارف بصراحه
بس انت ايه رايك في التعديل اصل في ناس يظهر مش مصدقه
وبرضه بالمره تقولنا رايك ايه في التكييف بما ان عربيتك سوداء ايضا ؟؟؟؟