الموضوع: العائدون من الموت!!!!!!!!

طبيعة عملي بتخليني أقابل ناس أشرفوا علي الموت قبل ما يتم إسعافهم و ردود أفعالهم بتختلف لكن حكاية "نفق الضوء" دي سمعتها كتير.
شخصيا تعرضت لحادثين قفلت عيني فيهم و إتشهدت علي روحي... الأول اللى ذكرته في ردي علي الأخ الفاضل سبعاوي :

من حوالي 4 سنين علي الدائرى قرب منزل المنصورية و برضه تريلا كان معايا فيليشيا ساعتها ,الله يمسيها بالخير, والأفندي كان بيشد مع أتوبيس نقل عام فاضي وفجأة لاقيت الأتوبيس علي يميني والتريلا علي شمالي الصراحة ماعرفتش أعمل إيه غير إني أهدي و حاسس إنى حاتفعص بين الإتنين
التريلا عدت بس المقطورة اللى ساحباها وراها "عومت" وخبطت الرفرف الوراني شمال في الجناح اللي ورا إزاز الباب الوراني و و زقت عربيتى فخبطت الأتوبيس في الباب الوراني يمين و الرفرف و الفانوس كل ده خد ثواني لأ وإيه لا الأتوبيس وقف ولا التريلا وقفت الصراحة كنت عايز أجرى وراهم و أجيبهم و :twisted: ... بس ماقدرتش.... أعصابي فلتت و ماقدرتش أتحرك لدقايق جبت العربية يمين و ركنت لحد ما هديت

المرة التانية قبليها بحوالي 6 سنين خارج بعربيتي ال128 من القصر العيني الساعة 3 الصبح بعد نوبتجية ما يعلم بيها إلا ربنا وواخد المنحني اللي بعد الباب بشوية علي 80 كم/س ألاقي العربية بتعوم جامد (غالبا بقعة زيت علي الطريق) ضربت فرامل لا إراديا راحت العربية لفة 180 درجة و مشيت بنفسة سرعتها عكس الاتجاه مع فقدان كلي للسيطرة علي الدركسيون و الفرامل.......لقيت عربية مرسيدس واخدة الملف بسرعة برضه وفجأة بقينا وجها لوجه لولا إن سواق المرسيدس تفاداني بأعجوبة الله و إعلم ايه اللي كان حصل.....بالعافية عدلت إتجاه العربية و روحت و أنا باترعش