مفتاح العربيه اتسرق..اعمل ايه؟؟

**medoezzat** · 01-08-2009 07:52 PM

السلام عليكم ورحمه الله ...
انهارده وانا في حمام السباحه الشنطه بتاعتي اتسرقت وكان فيها مفتاح العربيه و موبايل و محفظه... لاقيت المحفظه مرميه و مفيهاش غير البطاقه والرخصه(الحمد لله انه سابهم) زززالمشكله في مفتاح العربيه لان احنا البلد عندنا صغيره والعربيه بتاعتي معروفه فالي معاه المفتاح عارف العربيه....مش عارف اعمل ايه....هروح القسم اعمل بلاغ .... بس عايز اعرف اذا ممكن المفتاح يتغير او شفره الانذار بتتغير مثلن و بكم عشان ابقى مطمن

**thegoodhacker** · 01-08-2009 10:06 PM

بجد لازم تتصرف بسرعة في حاجة زي دي و تروح بالعربية للتوكيل باي طريقة علشان يغيروا الطبل بتاعة الباب و بالنسبة للريموت لازم تطلب تغيير الشفرة او حتي جهاز الريموت بالكامل مهما الموضوع كلفك اكيد اهون من سرقة العربية لاقدر الله .... و لغاية ما تروح التوكيل اشتريلك مسوجر ديريكسيون يربطلك الديريكسيون بدواسة الدبرياج بس بجد الموضوع ده ما يستحملش الانتظار او السؤال عن الاسعار .....

**mohd79** · 02-08-2009 08:41 AM

أنا حصلت معايا في البولو اتسرقت المفاتيح والمحفظة وفيها الرخصة والبطاقة وكل حاجة الكلام ده كان سنة 2004 فرحت توكيل فولكس وقالولي ممكن نشفرلك المفتاحيين التانين بمبلغ 100 جنيه بس كده كده هيعرف بفتح الأبواب والشنطه لكن مش هيعرف يدور العربية أو الحل التاني انك تغير طقم الكوالين بمفاتيح جديده بمبلغ 1300 جنيه فقررت اني أغير طقم الكوالين. وبصراحة أن برجح كده والواحد يريح دماغه من التفكير ويبقى في أمان.

**alisleman** · 02-08-2009 09:08 AM

انتا اتسرقت قريب من سكنك ولا بعيد لو قريب يبقى الحرامى اكيد عرفك وبيخططلك لكن لو بعيد يبقى سرقة عادية ومش هيعرف يجيب مكانك ولا مكان العربيه وخلى بالك ممكن يكون عرف عنوانك من البطاقة والرخصة

**john_samy** · 02-08-2009 10:43 AM

انا من راى انك تغير كوالين العربية زى ما باقى الاعضاء قالوا وتريح دماغك بدل مانت سهران قدام العربية.

لكن انا عاوز اطمنك ان لو كان الى سرقك دة حرامى زكى مكنش رمى البطاقة والرخصة لسببين :
اولا : عشان يعرف عنوانك من البطاقة زى ما الاستاذ على قالك.
ثانيا : عشان لو سرق العربية لا قدر الله يبقى معاه رخصة العربية.

طب ما حد ممكن يقول انه سجل بياناتهم فى ورقة. معتقدش ان دة ممكن يحصل عشان الحرامى بيبقى خايف وحاسس ان فى حد مراقبه فبيبقى مستعجل جدا ومشهيقعد يكتب بيانات البطاقة.

عوضك على ربنا فى الحاجات الى اتسرقت منك .