الموضوع: الى ابناء جيل الثمانينات ....تحيه طيبه و بعد

الى ابناء جيلى
جيل الثمانينات تحيه طيبه و بعد,

احنا جيل من الأخر اتنصب عليه
اتولدنا فى فترة انا مش عارف الصراحه ايه اللى احنا كنا فيه ده
يعنى ابسط حقوق الطفل الأساسيه مكانتش اصلا موجوده
يعنى لما الاقى عيل صغير فى ابتدائى و معاه Iphone
مثلا يعنى و احنا على ايامنا طبعا مكنش لسه اخترعو اصلا حاجه اسمها موبيلات
فييييييين على 98 لما الموبيلات دخلت مصر و كان ايه ؟
اللى معاه موبايل ده يعنى يا رجل اعمال يا اما وزير
يعنى حد واصل واصل يعنى

كمبيوتر ؟ يعنى ايه كمبوتر ؟
مش ده يا ماما الأتارى الأسود الكبير ابو دراعين اللى عليه كابتن ماجد ؟
لا طبعا يا حبيبى ! الكمبيوتر ده ........
و طبعا ساعه الست بتشرحلى هو ايه ده و انا وش مش فاهم اى حاجه و عمال بتخيل ايه الأختراع الجامد اخر حاجه ده اساسا
و الله بقا يوم ما ظهر الأنترنت
كنت تقريبا فى اعدادى وقتها
مش قادر اقولكم مدى التطور الرهيييييييب اللى حصل فالدنيا وقتها

ايه و الأهم بقا !!
مكنش فيه دش !!!!!!!!!!
دش ؟ يعنى ايه دش ؟
انا اعرف التايفزيون انما دش ؟

بمناسبه الكلام على اتاليفزيون ممكن نسترعج بس مع بعض البرامج الجامده اخر تالت حاجه اللى كانت بتتقدم
عشان تفتكرو مدى المعاناه اللى كنا فيها ايام طفولتنا المشرده


موسوعه البرامج التليفزيونيه الأكثر شهرة و اتشهارا ساحقا ماحقا فى تلك الفترة :

مجلس الشعب والشوري
حديث الروح اللي كان بيقدمو سيد طنطاوي
سر الارض
اخبار الساعة 6 مساء
دنيا المراة
عالم الحيوان
احداث 24 ساعة
العلم والايمان
حكاوى القهاوى
الشارع المصرى
غدا تقول الصحافه
بانوراما فرنسيه
تاكسى السهرة
اخترنا لك
كلام من دهب
امانى و اغانى
اليوم المفتوح
عروستى و طبعا الجمله الشهيرة اللى ماما ساميه بتقولها
"اتفضل خد الهديه من عند توووتى.."
سينما الأطفال
حدث بالفعل
السهرة الرياضيه
فكر ثوانى و اكسب دقايق
حديث المدينه
البرلمان الصغير
مواقف و طرائف


اه معلومه صغيرة بس للى ميعرفش
الجيل بتاع الشعر
الجيل ... الى هو بنحطه ده
مكنش لسه ظهر اساسا

نكمل ......

مازنجر
كابتن ماجد
النينجا
السنافر
ساندى بيل
كعبول
المغامرون السته
باباى

ده لو اصلا اتكروا و تعطفوا علينا و جابولنا منهم 5 دقايق كده فاللذيذ قبل ما يقطعوهم بنشرة الأخبار
اعووووووذ بالله

سؤال بس
ايه اكتر حاجه بتفكرك بأيام طفولتك دى ؟
و يا ريت محدش يرد عليا و يقول ماما نجوى عشان هيتضرب

ممكن نقول علان سافو وبوجى وطمطم و اغنيه جدو على واغنيه فى البحر سمكه بتاعه ايمان البحر درويش
والكوتشى اللى بينور
وفوازير شيريهان ونيللى
مجله ميكى جيب
و اغنيه ميال ميال
و اغنيه على بالى بتاعه عايده الايوبى
بسكوت الشمعدان
سبورت كولا
اغنيه كل البنات بتحبك


طب مادام دخلنا بقا فى كده
خدو بقا عندكم محدش يقول أأأى

حشرات الشعر بتزيد ياترى ايه هيفيد من غير كلام جربى ليسيد
لومبو مصاصه لومبو لذيذه لاذاذه لمبووووووووووووووووووووو
ياختي هاتي كحك وغرايبه بسكو مصر
باك باك باك باكباكبك فاين فوووووووودز
ناموس عمال يقرص ياخويا..مش عارف انام منو ياخويا
بودي بودي بودي ..بودي بودي فستاني من العبوووودي
بودي الفستان والطرحة ..بودي على أحدث صيحة
فاكرين ده؟ لأ ولسة
أميجو التركي أميجو شوز..أبيض أحمر أخضر شوف..آآآآآآآآميجو شوووز
بستك بستك بستك ناااااااااو شيكولاتة جيرسي واكلة الجاااااو .. والحشو جوة بجوز الهند
الشوكولانة مدوخاني فين هي (موموني) موني بطعم الفواكه طبيعية (موموني)أو
موني موني موني (أأو) لأ كدة تظلموني (أأآ) أناناس و لمون و فراولة--مانجا وياللهول
كوفرتينا ع العريس
موافقين
يبقى هايتجوز ويهيص
امووووووووووة
عبد الرحيم عمرو؟؟!!طبعا عبد الرحيم عمرو
اذن فاحتكم الامر من عبد الرحييييييييييييييييييم عمرو.. احتكم الامر يا جماعه وحجوز
ضد المية ضد النار
ضد الحشرة ضد الفار
تقسيط
تقسيط
تقسيط
رايحه فين يا فاطمه ؟ اجيب اومو
جايه منين يا فاطمه ؟ جيب اومو
ارياااااااااااال اريااااااااااااال
اوووووه اوووووووه
عباد الشمس سيلا, صافي طازا فلقزازة, عباد الشمس سيلا....زيت صحي لكل البيت
ايوة انا اصلع...معنديش شعر...واسمي عبد الستار...بس عندي اليكترو ستار
يا ولاد بلدى انا ليا رجااااااااء عايزين نقضى على الأميه ...... بدل البصمه تكون امضاااااااااااااااااااااا ا ااااء
كله كوم و اعلان ماما كريمه بتاع طعموا ولادكو و ريحو بالكو ده كوم لوحده !

ولا الأغانى !!!
يا لهووووووووووووووووووووووو و ووى

تك تك توووكو تكتك تو كوووووو يلا بقا كفايه نرجووكو !
هم النم يا روحى يلا جايبالك هممممممم كل و اكبر يا روحى يلا هم الننننننننمممممممم
انا انا انا ابريق الشااااااااااااى ايدى كده بوزى كده اصب الشااااااااى و ا رجع كككككككده
ولا اوبريت صفاء ابو السعود يا اصحابى وصحباتى
جدو عبدة عامل ايه زارع ارضو زارع ايه (العمدة الالى) برضو
هههههههههههههههههههه عالم ضايعه باين
ولا كانو بيستغفلونا ؟
مش فاهم والله

اقرى بقا يا معلم اللى جاى ده و فرهد على نفسك و على اللى كان بيحصل فينا

كيف تعرف انك احد ابناء الجيل الموكوس ؟ ( دى كان واحد باعتهالى )


1. اذا كان لبسك الصيفي في يوم من الايام مكون من مجموعة تيشرتات (كيلفن كلاين) مضروبة وبناطيل تلجي شارل ستون يا حبذا لو كانت ماركة انتربول التركية كنت تبقى ملك

2. اذا كان لبسك الشتوي في يوم من الايام مكون من مجموعة مختلفة من (الهاي كول) ترتدي فوقها قميص كاروهات أو جاكيت هافان.

3. اذا كنت تعشق مسرحيتي (العيال كبرت) و (مدرسة المشاغبين) وحفظت كل كلمة فيهما ثم فوجئت عند مشاهدتهما على الفضائيات ان التليفزيون المصري كان يخدعك طوال هذه السنوات ويعرض لك (ربع المسرحية)

4. اذا كانت الخيارات المتاحة امامك لمشاهدة فيلم في السينما هي فيلم نادية الجندى (نجمة الجماهير) وفيلم نبيلة عبيد (نجمة مصر الأولى) وفيلم عادل امام (مكانش بقى زعيم لسه)

5. اذا كانت الخيارات المتاحة امامك لمشاهدة مسلسل في التليفزيون هي مسلسل أحمد عبد العزيز التاريخي أو مسلسل أحمد عبد العزيز الرومانسي أو مسلسل أحمد عبد العزيز الصعيدي

6. إذا كانت كل البنات من حولك معجبين بأحمد عبد العزيز ويرونه فارس أحلامهن (رغم قصر قامته وشنبه اللي مش عاطفي اطلاقا)

7. اذا كنت متابعا جيدا لسهرات التليفزيون الممتعة (اخترنا لك - تاكسي السهرة - بانوراما فرنسية))

8. اذا كنت شاهدت اثنين او اكثر من حفلات ليالي التليفزيون والتي كان الاعلان عنها يصحبه رقم الليلة (ليالي التليفزيون..الليلة السادسة والعشرين)...حتى جاء الاختراع اللى اسمه مارينا وقرروا ينقلوا الحفلات فيه لتقضى نحبها وتدفن بمقابر الساحل الشمالي

9. اذا كنت تشاهد عند عودتك من المدرسة أو الجامعة برنامج (أماني وأغاني) لتشاهد أحدث الكليبات المكررة يوميا متحملا في سبيلها سماجة مذيع البرنامج (احمد مختارأو جمال الشاعر)

10. اذا كنت تنتظر بلهفة برنامج (كلام من دهب) رغم مذيعه الأكثر سماجة طارق علام

11. اذا كنت عاصرت مشكلة ادمان الهيروين وحاصرتك تماما في الافلام والمسلسلات والاعلانات والصحف (جميع نجومنا ونجماتنا تقريبا لعبوا دور المدمن وتألموا وهم يطلبون "شمة واحدة" رغم ان المتعاطي لا تصبح حالته بهذا السوء إلا بعد أن يتعدى مرحلة الشم لمرحلة الحقن

12. اذا تكون عاصرت انحسار مشكلة ادمان الهيروين بعد ادراك الشباب لاخطاره واتجاه العاقلين منهم للحل السحري الأكثر أمانا ومتعة (الحشيش)!!!

13. اذا تكون شاهدت على الحجار مرتين في يوم واحد على نفس القناة... مرة العصر مرتديا التيشرت والشورت والنضارة الشمس وهو يغنى (يا اسكندرية يا مدوبانى) ومرة الفجر مرتديا الجلباب والجبة وهو يغني (صلينا الفجر فين)

14. اذا كنت اعتدت ارتداء الكاسكيت بشكل مقلوب حاميا قفاك من الشمس ولم يكن شكلك بتاع انابيب))

15. اذا كنت تمتلك مجموعة من روايات رجل المستحيل وملف المستقبل وتعتبرها قمة فى الادب..وكنت تقوم باستبدالها من المكتبة باعطاءه العدد وربع جنيه لتحصل على عدد آخر

16. اذا كنت قد عاصرت الصراع على قمة مبيعات الكاسيت بين عمرو دياب (قبل ان يتجه للعالمية التى لا يؤمن بها إلا هو ومجموعة من محبيه) ومحمد فؤاد (قبل ان يتحول لدب قطبي)

17. اذا كنت تترقب بشدة أى حفلة بها فقرة (عزب شو) وتستمتع بمحمود عزب وهو يقلد محمد منير ومحمد نوح

18. اذا كنت شاهدت (بولا بولا بالومبيلا) معجبا بالطفله الجميله وهي بتغني وانت معتقد ان معنا الجمله دي هي طيري طيري يا عصفوره بس بلغة الهنولولو

19. إذا كان قمة الثقافة والعلم في رأيك ان تشاهد بانتظام حلقات برنامج د.مصطفى محمود (العلم والايمان) رغم الاخطاء العلمية الجسيمة به

20. اذا كنت قد مشيت في شوارع المعمورة لتجدها كلها تستمع لأغنية (عبد القادر) للشاب خالد أو (حوا) لمجدي خوري أو شريط (سحراني) لايهاب توفيق

21. اذا كنت قد حضرت فرحا او اكثر استمعت فيه لاغنية (بدنا نتجوز عالعيد)

22. أن تكون قد عاصرت قنبلة (كابوريا) التي جعلت كل الشباب يزيل الشعر من جانبي رأسه ليبدو مثل (حسن هدهد) وبعدها عاصرت امم أفريقيا 1998 وشوفت الناس حالقاها زيرو زي حسام وابراهيم رغم انهم ماكانوش حالقين!!

23. ان تكون (امعانا فى الثقافة الموسيقية) قد اشتريت اصدار او اكثر من شريط الكوكتيل الغربي (واتس ناو97)

24. ان تكون قد شعرت بحرج بالغ عندما شاهد والدك او والدتك احد حلقات مسلسل (فريندز) معك لما يحتويه على كلام بذئ (بمقاييس وقتها طبعا!) رغم انهما بالتأكيد كانوا يتابعوا ( ذي بولد أند ذى بيوتيفول ) وهو أكثر وقاحة

25. ان تكون شاهدت كليب المغنية حنان الشهير (اضحك بقى وافرجها ياعم).. واطلقت على المغنية بينك وبين اصدقائك لقب (المعزة)

26. اذا كنت تمتلك البومين أو أكثر لتجميع الستيكرز (صور لاعبين كرة أو شخصيات كارتون) حسب ميولك وقتها أو شوفت طاهر القويري ومراته وهم بيسلمو جوايز الشمعدان

27. اذا تكون قد منعت لعدة أيام من اللعب في الشارع بسبب خوف أهلك عليك من (السلعوة)

28. إذا كنت قد تابعت بشغف واحد من مسلسلات (ذئاب الجبل - المال والبنون - ليالي الحلمية - من الذي لا يحب فاطمة - الضوء الشارد)

29. اذا تكون قد شربت أكثر من مائتي زجاجة كوكاكولا في شهرين من أجل رحلة (البحث عن الجادون)

30. اذا اعتدت في الصيف ان تشغل الكاسيت بصوت عالي عصرا وتقف في البلكونة بالفانلة الداخلية والسلسلة وفي يدك كوب الشاي والسيجارة (لو كنت مدخنا) مستمتعا بسماع الموسيقى ومعاكسة البنات وانت متأكد من أن الحوار الدائر بينهن يدور حول وسامتك

31. اذا تكون قد استخدمت علبة جيل الشعر كلها مرة واحدة (لو كنت ابن ناس ومعاك فلوس) او قمت بفرد شعرك بكريم جلات (لو كنت ابن ناس برضه بس مش معاك فلوس) لتقوم بزحلقة شعرك ليبدو مثل عمرو دياب في أغنية نور العين

32. اذا كنت قد لعبت في طفولتك باحدى اشكال لعبة (الميكانو) و قعدت تكسب في (البلي) وتعمل كيس كبير وتيجي والدتك ترميه في الشارع معاقبة لك

33. اذا كنت قد حضرت أسماء الشهرة للسيارات الفاخرة بالرومانسية الشديدة (الخنزيرة - التمساحة - البودرة – الشبح)

34. اذا كنت قد اشتريت (بلوفر تملى معاك) بالوانه الشهيرة الابيض والاسود والبترولي

35. اذا شاهدت يوميا بعد الافطار في رمضان برنامج (بدون كلام) الذي يقدمه الممثل حسن مصطفى والذى اعتاد ان يستضيف زوجته ميمي جمال في أحد الفريقين وان يتحيز للفريق الذي تشارك فيه ويقوم بتغشيشهم

36. ان تكون قد لاحظت حسن مصطفى وهو يميل على اذن فيفي عبده ليقرأ لها اسم الفيلم في الورقة (لم تكن قد تعلمت القراءة بعد)

37. اذا شهدت النجاح الساحق لاغنية حمدي باتشان (ايه الاساتوك ده .. اللى ماشي يتوك ده)

38. اذا شهدت تحويل نفس الاغنية لاعلان مسحوق غسيل سافو بمشاركة حمدي باتشان والموديل الأشهر في مصر وقتها نسرينا

39. اذا كنت قد شهدت انحدار ذوق ذكور مصر لدرجة جعلت وفاء عامر ملكة للأغراء ونهلة سلامة نموذج للأنوثة وجعلت هياتم تغوي جميع الرجال بجاذبيتها

40. اذا كنت قد شاهدت نادي الزمالك يترك أفضل لاعب في مصر (رضا عبد العال) يرحل للغريم التقليدي الأهلي بسبب رفض طلبه لزيادة راتبه السنوي برقم ضخم للغاية (خمستاشر ألف جنيه)

41. اذا كان المسلسل الكوميدي المفضل لك في الابتدائية هو (بكيزة وزغلول) وفي الأعدادية هو (وانت عامل ايه) وفي الثانوية (يارجال العالم اتحدوا) ... خاصة شخصية بطرس منقريوس التي لعبها النجم حسن حسني.

42. اذا طاردتك ايمان الطوخي لفترة من حياتك .. تجدها صباحا بطلة لمسلسل الأطفال (كوكي كاك) وعصرا مغنية تقول (انا من النظرة الأولى شفت الدنيا بلون الورد) ومساءا ممثلة تلعب دور استر بولونسكى فى رأفت الهجان

43. اذا كانت الألعاب الألكترونية المتاحة لك تتراوح بين الاتاري الاسود (ابو دراعين كبار) او كومبيوتر صخر التعليمي (صاحب الالعاب السخيفة) أو الاتارى الفاميلى (سوبر ماريو وكابتن ماجد طبعا) أو الأميجا أبو ديسكات (ولعبته الشهيرة سينس بول)

44. اذا كنت قد تابعت بشغف مسلسل (الرقص على سلالم متحركة) وتحدثت مع اصدقاءك عن شخصياته (دينا طحن ووديدة صاروخ وناصر اورجنايزر ونفيسي الدحيح)

45. اذا سهرت لنهاية الارسال في التليفزيون المصري واستمعت الى اوتار الليل بصوت عادل هاشم أو مدحت مرسي

46. اذا شاهدت مسلسلا للمخرج حسام الدين مصطفي ورأيته في أخر التتر بصلعته اللامعة وسلسلتة الذهبية ينظر للكاميرا بابتسامة غريبة وهو يشير بابهامه لأعلى

47. اذا كان مسلسل الأطفال المفضل لديك في رمضان يتراوح بين (سلاحف النينجا) و (باور رينجرز))

48. اذا قمت بتركيب (موتور) لتحريك الاريال فوق السطوح وقمت بتزويده بجهاز (بوستر) لتقوية الاستقبال وسهرت في ليلة صيفية تحرك الاريال بحثا عن قنوات المستقبل والتي في لاند والام تي في وسيجما واسرائيل الثانية!!

49. اذا كرهت الشخصية التي لعبتها تيسير فهمي في مسلسل (أبناء ولكن) والتي تسببت في تحويل حياة جميع الشخصيات الأخرى إلى جحيم .. وفوجئت بها في الحلقة الأخيرة تندم على افعالها وتتحول لحمل وديع ويتصالح الجميع ولا عزاء لمرارتك المفقوعة

50. اذا كنت قد شاهدت الزمالك ينسحب مرتين من مباراته مع الأهلي .. مرة في أخر خمس دقائق بسبب هدف صحيح ومرة في أول خمس دقائق بسبب كارت أحمر مشكوك في صحته