الموضوع: حاطط ايه فى عربيتك؟

انا بقى معايا طبعا المصحف الشريف
وطقم مفكات وبنسه وقصافة ( مش بتاعه الستات )
وفوطه صفرا لزوم التلميع وميه خضراء و زيت باكم

المشاركة الأصلية كتبت بواسطة se_coralsea

- كومبرسور هواء مزود بأضائة للطوارئ (يعمل علي بطارية العربية)
- عمود أضائة تحذيرية (يتم وضعه خلف السيارة علي مسافة لا تقل عن 5 متر) لتحذير السيارات القادمة في حالة و جود عطل لا قدر الله
- معدات فك و تركيب الاطار الاحتياطي + مفكات و مفاتيح (مع العربية أصلا)
- زجاجة مياه مقطرة (1 لتر)

شكلو ايه عمود الإضاءة و ازاى بيشتغل؟

المشاركة الأصلية كتبت بواسطة Salamonti

محتويات سيارتي كالتالي:
-----------------------------

نسخة احتياطية من مفاتيح البيت والمكتب والمصيف وبيت والدتي يقتصر استخدام في حالات الطوارئ
نوتة ملاحظات + عدد لا بأس به من الأقلام بمختلف أنواعها لكتابة الملاحظات الطارئة
علبة بوليش + علبة كومباوند + كيس قطن لزوم الخدوش بتاعة كل يوم
بخاخة جلانس + فوطة ميكرو فايبر لتلميع الزجاج والمرايات
زجاجتين معطر مركز من اللي بيترش في الدواسات كل فترة
ملمع التابلوه + ملمع الكاوتش
زجاجة مياه للشرب واهي بتنفع للمساحات بالمرة (لأن عندي خزان المساحات صغير أوي)
العدة الأصلية بتاعة العربية - الكوريك ومفتاح العجل ومفتاح 13 ومفك عادة وصليبة
زيادة عليهم شوية مسامير مقاسات مختلفة + بواقي حتت سلك + شريط لحام + قصافة + طقم فيوزات + طقم لمبات مختلفة + واير قطر + توصيلة قواطيش بطارية للطوارئ
طبعا المثلث وشنطة الاسعافات اللي خدتهم هدية من المرور (والنكتة اني معنديش طفاية - استلفت بتاعة اخويا رخصت بيها)
علبة المناديل لا غنى عنها في كل زمان
شوية سيديهات أغاني + فلاشة
شاحن عربية للموبايل وشاحن آخر للابتوب
دبدوب صغير ورا عند السماعات وسبحة قدام في المراية
كمية لا بأس بها من العملات الفضية في التابلوه (أي عملة فضة تيجي في ايدي بارميها في التابلوه) بتنفع في بقشيش البنزين أو الباركنج
الصب بالصندوق بتاعه واخدين الشنطة كلها ورا
حلية الشكمان اللي كل ما اركبها تفضل تتلخلخ لحد ما تقع (عايز ابقى الحمها اوكسجين)
المساحة الخلفية اللي كسروها ولاد الشوارع وكل ما اغيرها يكسروها (نفسي الحمها هي كمان أوكسجين لو ينفع)

وفي النهاية عربيتي اسبيرانزا a113 (ياريت كل واحد يذكرلنا نوع عربيته كمان بالمرة)

المشاركة الأصلية كتبت بواسطة jisso82

العربية دى بيتى التانى
أنا لسه ما حطتش المثلث و شنطة الإسعافات عشان ماكانوش جم المرور ساعة ما رخصت بس ادونى وصل بيهم و قالولى أطلعه لو اتسألت عليهم
1- عدة العربية اللى جاية بيها
2- غطاء العربية
3- شنطة ظهر فيها كوتشى و شورت و تىشيرت و كرة عشان لو اتزنقت و عايز ألعب
4- شبشب عشان لو عزت أصلى فى مسجد على الطريق الجزمة ما تتسرقش
جوه العربية بقى
5- شاحنين للموبيل (عربية و منزلى)
6- مفك و مطواه سويس نايف و ملقاط و قصافة
7- ولاعة
8- علبة مناديل عادية و علبة ويبس
9- نظارة شمس احتياطية و كاب احتياطى و فرشاة شعر
10- إندكس صغيرة و قلم
11- مصحف
12- كشاف صغير
13- علبة برايت شوز صغيرة
14- صابونة + ورق صابون
15- سماعة الموبيل
بس كده مش فاكر فيه حاجة تانية ولا لأ هتأكد و أقوللك

معلش ياجماعة سؤال بس خارج الموضوع

المثلث وشنطة الإسعافات المجانيين دول استلمتوهم ازاي؟
او اخدتو إيصال بيهم منين؟
اصلي لسة مرخصة عربيتي من شهر ومحدش جاب سيرتهم خالص
ولاقيت منافذ بيع هناك بس دي اعتقد بيتبيعها بالفلوس مش بتوزعها مجاناً.

طب دلوقتي انا ينفع اخدهم ولا خلاص كدة راحوا عليا ولا ايه؟
ولو ينفع اخدهم اروح فين في المرور عشان استلمهم؟