الموضوع: طرمبة مياه اللانوس

تانى يوم العيد لقيت العربية مصفية المياه اللى فيها و بتنقط بعيد عن الرادياتير، لفيت كتير مالقتش ميكانيكى فاتح غير فى بنزينة التعاون فى المقطم، و لأنى كنت رايح فرح فى اخر الهرم و قلقان ان العربية تعطل فكنت مصر اصلحها، المهم الباشمهندس قالى ان الطرمبة محتاجة تتغير و ان عنده طرمبة أصلى ب 85 جنيه - تبع البنزينة محل قطع غيار - ولما شفتها لقيت مكتوب عليها نوبيرا بس هو أكدلى انها واحد و غيرناه و جبت زيت باور ب 15 و ميه خضرا ب 35 جنيه و المصنعية 80 و الأكرامية 20 يعنى كله 235.

فى نفس اليوم ابتديت اسمع صوت تكة متقطعة بتروح و تيجى ناحية السيور بس العربية ماشية، رحتله بعد يومين قالى السيور بتريح و الصوت هيروح.

الصوت مارحش و محدش عارف يحدد السبب، لغاية ما قررت انزل الحرفيين و كلمت اخويا كريم منير و دلنى على ورشة الأسطى عبده البنهاوى و بعد فحص دقيق و فك كل حاجة اتضح ان الطرمبة هى السبب لأن الترس بتاعها على قد سير كاتينة النوبيرا الأعرض من سير اللانوس و علشان كده السير مش محكوم و عمال يحدف يمين و شمال، المهم جبت طرمبة تانية ب 135 يابانى و غيرناها.

اتمنى ان محدش يغلط غلطتى علشان انا شفت كام يوم قلق مالهومش لازمة و بجد بجد مش عارف اشكر كريم اخويا ازاى مش علشان النصيحة بس، علشان جالى مخصوص و فضل قاعد معايا لغاية الساعة 12:30 بالليل و الله انا كل يوم باتأكد ان معرفتنا كلنا ببعض عن طريق المنتدى معرفة خير و لازم كلنا ننميها و نحافظ عليها.

الحمد لله على كل شىء و انا اتعلمت بس بحرقة الأعصاب لأنى رجعت كل مليم صرفته يومها من عينيه، حتى تمن زيت الباور و الميه الخضرا و المصنعية، أول ما رجعتله و كلمته بالزوق لقيته عملى الفيلم المعتاد (لا تركب با بيه، هو بس الميكانيكى التانى اللى اقنعك) و كلام خايب تانى و أخر كلامه قال (خلاص خليلنا الطرمبة و لما نبقى نبيعها نبقى نرجعلك تمنها) المهم بمنتهى الهدوء مشيت علشان الأشكال دى ماينفعش معاها غير العين الحمرا بس بطريقة صح لأنى لو عليت صوتى أو مديت ايدى انا اللى هضيع حقى و احترامى، رحت جبت اسم صاحب المحطة علشان اعمل محضر خصوصا ان معايا فاتورة بس طلع صاحب المحطة هو برضوا صاحب محطة شل المقطم اللى انا زبون معروف فيها و طريقة تعامل الناس فيها بتقول انى ادارتها محترمة، سبتله الفاتورة فى المحطة و جبت تليفونه و كلمته و كان فى منتهى الذوق و فى خلال ساعة كلمنى و طلب انه يبعتلى حد بالفلوس البيت و شكرته و رحت اخدت الفلوس من المحطة.