الموضوع: عايز رأيكم في ... دايهاتسو ماتيريا ...

فينكـــــــــــــــــــــ ـــــــم ....* رحتوا فين محدش رد خالص

اناراي لو بتقارن بين الماتريكس والماتيريا
يبقى الماتيريا اكيد
انا شايف ان عيب الماتيريا الوحيد عن الماتريكس
اعادة البيع اكيد مش زي الماتريكس وهتكون في صالح الماتريكس
اما غير كده فالماتيريا افضل
وانصحك بالاستخارة لكي ترزق الخير ان شاء الله

انا اسمى محمد معايا ماتيريا 2009 نبيتى اوتوماتك
استلمتها يوم 5 مارس والى يومنا هذا عامل بيها 12062 بالظبط انا لسه منزلها الجراج حالا ههههههههههههههه
العربيه بسم الله ماشاء الله والله غير ماكنت متوقع اداءها وثباتها عالى جدا
انا هعملك تقرير مبسط عليها
اولا الوسع وانا شايف ان دا اكتر واول حاجه انت سألت عليها بقولك حرام تقارنها بالماتركس هى اوسع اوحسن واريح من الماتركس
انا كنت لسه بره بيها ومعايا 5 صحابى غيرى كنا قاعدين مستريحين والعربيه والله ماشيه زى الفل مع الوزن ده الكنبه اللى ورا بجد درس يتعلمه مصممى السيارت فى استغلال المساحه الكنبه مريحه اوى فى قاعدتها وانا اصلا مرجع كرسى السواق لورا على الاخر برده اللى ورا قاعد ورجله استحاله تلمس ضهر الكرى اللى قدام مهما كان طول اللى قاعد ورا تخيل بقى الوسع والله العظيم انا صحابى بيتخنقوا على اللى بيقعد ورا لسه صحابى قالى وانا بوصله دلوقتى تخيل يا مادو القعده عندك ورا احسن كمان من قدام
الكنبه فيها خاصيه انها على مجرى زى الكراسى اللى قدام ممكن ترجه وتتطلع لقدام على حساب الشنه وكمان ضهر الكنبه ممكن يرجع لورا زى كراسى السواق فيها حزام كده بيتشد بيرجع الضهر بس علشان لوحد عاوز ينام انا فاكر ان لما اول يوم جبت فيه الماتيريا واحد صاحبى قاعد كده وقال كلمه بقولك ايه يا مادو مين المهندس الغبى اللى صمم العربيه دى فاقولت ابتداينا تريقه فبقوله ليه ياعم قالى الحمار ده نسى يعمل حمام فى الشقه دى وقعد يزعق فين الحمام فين الحمام ههههههههههه
العربيه بتنزل بفرامل abs , ebd بسم الله ماشاء الله تحفه لو مش واخد عليها هتلاقى نفسك بتتهبد من قوة الفرامل وهتتعود عليها بعد فتره لو كنت بتسوق حاجه مش فراملها قويه واحساس الامان كده لما تحس بدربكه ورشعه الفرامل ال abs تحت رجلك لما تفرمل مره واحده وبقوه حاجه تحفه فعلا
العربيه مش زى ماكل الناس فاكرها واطيه العربيه خلوصها من الارض حوالى 15 سم زى بقيت العربيات بس اللى مديك الاحساس ده ان العربيه فيها عتب سبور وبدى كيت وعاوز اقولك حاجه ان العربيه قاعده العجلات بيتعتها قصيره بمعنى ان العجل اللى ورا قريب من اللى قدام فاول ما العجله اللى قدام تطلع على المطب لو هو مطب عالى ورخم هتلاقى اللى ورا لحقتها فترفع العربيه تانى ولو مطب عاااااااااااااااااااااااا اااااااااااااااالى ومحمل خمسه او اكتر او شنط خوده بورب وانت مش هتحك انا الحمد لله من يوم ماجات ومحكتش غير فى 3 مطبات بسبب غباءى او غبااااااااااااااااااااااا ااااااااااااااااااااااااء المطب فعلا
العفشه نشفه شويه لانها عفشه سبور فبكده معاك ثبات مش احكيلك بس بتحس بالمطبات والنقربس والله مش تقلق ومتفتكرش ان رزع وكده مش قصدى انا قصدى انها هتلاقيها انشف شويه مثلا من الكورولا القديمه لانى معرفش الكورولا الجديده ايه نظامها
انا كنت فاكر موضوع العفشه ده عيب فى الاول وروحت التوكيل وزعقت وبتاع فقالى حضرتك دا راجع لانى عفشتك سبور والجنوط الالومنيوم الاسبور والكاوتش السوفت لو تلاحظ ان كاوتش الماتيريا اصغر فى الحجم من باقى العربيات اللى ركبلها كاوتش على جنوط 15 لانه سوفت مضغوط . نوع الكاوتش بريدجستون اصلى
تعاله بقى للمهم _

الموتور هو 1500 سى سى بيطلع 105 هورس باور عباره عن طلقه مع الحجم الصغير ده انا عربيتى اوتو بس والله مش بحس بكده خالص سحب محصلش العداد مش بيوقف لعايه 135 وبعد كده بيبطئ الحركه شويه وتجميعها على السرعات االعاليه مش بطال وده راجع لان الفتيس الاوتو اربع نقلات فقط
انا جبت بالعربيه 175 بس مش رديت ازود لانى بقلق شويه ومفيش طريق يسمح فوق كده بامانه
صوت الموتور فى العادى هادى جدا ومش مسموع انما لو بتعمل كيك داون اتفرج على الزئير صوت كده انا عن نفسى بعشقه وعلى السرعات العاليه اوى برده مسموع نوعا ما لان برده العربيه الاوتو مافيهاش غيار خامس بس برده دا حلو فى التجميع على السرعه العاليه
اه نسيت اقولك فى زرار الاوفر دايف دا تحفه بيخلى العربيه تلات غيارات بس اتفرج بقى على التجميع شغله واعمل باى باى لمعظم الطريق وانت بدوس كيك داون
استهلاك البنزين حلو اوى فى الطرق السريعه ومعقول داخل المدن الاجمالى انا اديها فى الاستهلاك 8 ونص من عشره داخل المدينه وعلى الطرق السريعه تسعه ونص من عشره

قطع الغيار وده ارخم نقطه لانها مش متنشره بره ز واسعارها فى التوكيل غاليه بس لو قارنتها بمعظم الييابانى هتلاغقيها معقوله ويمكن تلاقى عازاك فى انها بتبقى قطع معمره
انا كنت فاكر ان القطع مش هلاقيها بره لغايه ماعرفنا كام واحد فى الحرفين لو احتجت حاجه لاقدر الله ابقى اعرفك عليهم
التوكيل وهو دايهاتسو ايجيبت بتاع الشيخ عبداللطيف جميل غانى عن التعريف طبعا يعنى توكيلات دايهاتسو وتويوتا فى السعوديه ومعظم الخليج التوكيل بجد من اكتر التوكيلات اللى فى مصر احتراما وكمان فى اكبر مركز خدمه هيتفتح يوم 17 فى ابوراوش وكل ملاك دايهاتسو فى المنتدى معزمين
العربيه فيها 2 ايرباج
فيها زجاج فيميه وبيثبت فى الرخصه بجد احساسا حلو وانت مفيم وداخل كمين وتلاقى الامين جاى جرى وبيقول فيميه وتطلعه الرخص وتحطها فى عينه
وفى الاخر يارب اكون قدرت افيدك وعاوز اقولك كفايه كفايه انك بتبقى ماشى فى الشارع مميز والناس كلها بتبص عليك وراكب عربيه مش منتشره ومميزه وجميله وشيك ويابانى 100 فى 100
وانزل روح التوكيل وراكب العربيه وانا واثق انك مش هتطلع من هناك الا لو انت معاك وصل الحجز بتاعها
وربنا يكرمك باللى فيه الخير ليك
ولو احتجت اى شئ متتاخرش فى انك تطلبه وانا تحت امرك فى اى وقت
واسف للاطاله
تحياتى السلام عليكم

أظن بعد الكلام بتاع محمد الموضوع مش محتاج كلام

العربية على فكرة من العربيات الشيك بس مش أي حد بيقبلها و ناس بتتريق عليها

لكن أنا شايف ان الشكل اللي مش عاجب الناس هو سر المساحة الداخلية الغير طبيعية في العربية دي

لو مقتنع .....توكل على الله ماحدش جاب العربية دي و زعل منها ...بس مش اي حد بيجيبها

دي محتاجة عميل ذو رؤية

الماتيريا وانت مغمض طالما شكلها عجبك وسيبك من كلام اي حد المهم رايك وراحتك

المشاركة الأصلية كتبت بواسطة madoo

...
انا كنت لسه بره بيها ومعايا 5 صحابى غيرى كنا قاعدين مستريحين والعربيه والله ماشيه زى الفل مع الوزن ده الكنبه اللى ورا بجد درس يتعلمه مصممى السيارت فى استغلال المساحه الكنبه مريحه اوى فى قاعدتها وانا اصلا مرجع كرسى السواق لورا على الاخر برده اللى ورا قاعد ورجله استحاله تلمس ضهر الكرى اللى قدام مهما كان طول اللى قاعد ورا تخيل بقى الوسع والله العظيم انا صحابى بيتخنقوا على اللى بيقعد ورا لسه صحابى قالى وانا بوصله دلوقتى تخيل يا مادو القعده عندك ورا احسن كمان من قدام ... _

يا أستاذ محمد، حضرتك متأكد إن اللي كانوا معاك في العربية 5 أفراد غيرك، يعني كنتم 6 في العربية و كنتم مستريحين؟ أم 5 خطأ مطبعي؟

5 غيرك يعني إن اللي كانوا قاعدين ورا، يبقى عددهم 4 و لو انا قاعد رابع في كرسي مايكروباص ما ببقاش مستريح!

انا قلت أتأكد فقط.