طلب نصيحه ضبط تاكيهات لماتور خفيف

**michohat** · 14-08-2009 02:08 AM

السلام عليكم ورحمه الله وبركاته
بدايه عندى عربية فيات 131 ماتور 1600 2 كامه الماتور خفيف و فيه شبهه تأكيد من كل الميكانيكية انه عاوز طقم شنبر
بقى لى زمان مش ضبط تاكيهات و كنت سامع صوت نأرزة مع الماتور وكنت فاكره حاجه فى الدينامو او كابل بوجيه مش راكب كويس وبيسرب كهرباء المهم عرفت انه صوت تاكيهات وكنت وقتها مش فاضى اعملها
الفتره دى رحت اعملها عند ميكانيكى قال لى انت مش زبون علشان اضحك عليك سيب التاكيهات كده ( قال حاجه زى مبوشة) لحد ما تعمل لها طقم الشنبر لان ضبط التاكيهات دلوقت مش هيأثر قوى
معرفش كلامه ده صح ولا ايه وعاوز النصيحه منكم

**samirayad** · 14-08-2009 09:05 AM

الراجل بيتكلم صح يا أستاذ : مجدى
ومن كلامك التاكيهات عندك مفتوحه شويه .....وهو ده اللى عامل صوت النأرزه
وطالما الشنابر خفيفه ....يبقى تدييق خلوص التاكيهات حيقلل السحب معاك وحيجيب نتيجه سلبيه
وبرضه الوضع الحالى لخلوص التاكيهات مش صح على أعمدة وسبايك أعمدة الكامات
والأفضل .....الأسراع بتغيير طقم الشنبر....مع ضبط التاكيهات بوضعها الصحيح فى أقرب وقت ممكن حفاظا على المكنه عامة

**michohat** · 14-08-2009 04:10 PM

الف شكر يا استاذ سمير
انا ناوى اعمل طقم الشنبر بس اكتر الناس قالت لى خليها فى الشتا احسن فهل الافضل الاسراع فى عملة ولا استنى الشتا
استعمالى للعربية استعمال يومى ( حوالى 10 كيلو يوميا ) من البيت للشغل ومن الشغل للبيت

**caysersosaih** · 14-08-2009 05:24 PM

حضرتك اعمل الشنبر في اسرع وقت
الشنبر لوحده اسمه نصف عمره
وانت لاتريد ان تصبح عمره كاملة او تغير الموتور
فاتوكل علي الله عشان تحافظ علي عربيتك
وبالتوفيق

**samirayad** · 14-08-2009 09:48 PM

المشاركة الأصلية كتبت بواسطة michohat

الف شكر يا استاذ سمير
انا ناوى اعمل طقم الشنبر بس اكتر الناس قالت لى خليها فى الشتا احسن فهل الافضل الاسراع فى عملة ولا استنى الشتا
استعمالى للعربية استعمال يومى ( حوالى 10 كيلو يوميا ) من البيت للشغل ومن الشغل للبيت

توكل على الله ....وأعمل طقم الشنبر بعد شهر رمضان
وكل عام وأنت والجميع بخير

**aYaBooY** · 16-08-2009 12:09 PM

الناس بتفضل الشتاء علشان العربية لما بتلين بيكون الاحتكاك عالي و الحرارة كبيرة و لو الجو حر بيكون خطر شوية على الموتور
بس لو انت عاوز تعملها بعد ما تعدي رمضان و العيد كل ما في الموضوع انك بدل ما هاتدور بالنهار و تسيب العربية انك هاتدور بالليل بعد المغرب علشان الجو يكون هدي و ممكن تبقي تحط مروحة بتاعت البيت ادام الموتور علشان تهوي شوية و لما تخرج تلين برده يكون بالليل و الدنيا فاضية و تاخد معاك مياه على اد ما تقدر و عموما ممكن تحط زيت شنبر مع غيار الزيت لحد ما توصل للشتاء

**michohat** · 17-08-2009 12:16 AM

والله بقى لى فترة عاوز اعمل طقم الشنبر بس خايف من اكتر من حاجه
الموتور اول مره يتفك وخايف مش يرجع زى الاول
وخايف افك يطلع انه محتاج عمرة كامله
والكابوس الكبير بالنسبة ليا انى بسمع كلام كتير عن قطع غيار مغشوشة او غير اصلية موجوده فى السوق وكمان بتعدى على الميكانيكىى وبما ان الماتور مش بيتفك كل يوم فلازم قطعه الغيار اللى تتحط تكون اصليه ومش مضروبة
محدش يعمل فيا ثواب ويقول لى اتأكد ازاى ان قطعه الغيار اصليه و بتعمر ازاى و القطع الاصليه بتتباع عند ناس معروفة؟ ( بسمع عن واحد اسمه الكيلانى وهشام لهيطه ودول فى القاهرة والاصلاح هيكون فى الشرقية)

**kemks** · 18-08-2009 11:19 AM

طيب انا الحمد لله لسه مغير الشنبر ومفروض الماكنة هتتقفل النهاردة ان شاء الله مفروض العربيه تفضل تلين و هيا واقفة قد ايه وقت و بعدين لما تمشي هتققعد لغايه كام كيلو بتلين و مفروض الواحد يمشي علي 80 من غير تكييف و الار بي ام ميعالش عن 3 صح كدة و لا في حاجة تانية و الزيت يتغير بعد 1000 كيلو

ودلوقتي بقي احط مياه خضرا و لا مياه عادية و بعد 1000 كيلو اغسل مياه الماكنة في الجهاز اللي في البنزينة و احط مياه خضراء و لا مش مهم احط مياه خضرا علي طول

شكرا

للعلم انا ركبت شنبر و كاوتشات الصوبابات و ورودية