في طريقي للقاهرة اليوم كمية حوادث (ربنا يعفينا)
.
لا حول ولا قوة الا بالله
.
ايه اللي وصلنا للدرجة دي
.


(1)
عند كوبري الشراقوه في مدخل المنصورة : طريق دكرنس-محل الدمنه-المنصورة
3 عربيات
ربع نقل - فيات 132 - سوزوكي سويفت

السوزوكي نصفها الامامي مش باين لحد التابلوه
الفيات 132 اللي الكل بيشهد بمتانة صاجها والشاسيه. متبهدله وماعدتش تنفع عربيه السقف متطبق والنص الامامي زي مايكون اتكبس في الأرض.
والربع نقل مقلوبه (أيوآ مقلوبه)... واللي يعرف الطريق ده يقول استحاله عربيه تتقلب عليه وتفضل علي الرصيف لأن الطريق ضيق ويادوب يعدي عربيتين.


(2)
بعد نقطة مرور نقيطه بعد سندوب
.
اتوبيس وعربيه ملاكي .
العربيه الملاكي ماعتقدش ان حد خرج منها حي.

(3)
قبل كفر شكر ب 3كم تقريبآ.
والحادثه دي حصلت قبل وصولي المكان بحوالي 1/2 ساعة
عربيه نقل داخله في الحاجز الخرساني اللي بين الرصيفين
.
وزي ماتكون اتشقت نصين لحد بداية المقطورة
الارض كلها زيت (من كسر الموتور)
والتانك مالي الرصيف جاز. وعربية المطافي واقفه منتظره العربيه تولع علشان تطفيها ولا ايه مش فاهم.

(4)
عند منزل كوبري بنها الاول
.
عربيه نصف نقل داخله في الحاجز الخرساني من ناحية الأراضي والجنب اليمين الخلفي ضايع والكاوتش مفرقع طبعآ.

(5)
عربيه جيب شروكي 4x4 واقفه متحملة علي عربية انقاذ بعد كفر شكر
.
العربيه منظرها مايتوصفش. انا ماعرفتهاش الا من غطاء الكاوتش الخلفي
ومن رابع المستحيلات. ان يكون طلع منها حد عايش.
العربيه من قدام مهروسه لحد الكنبه الخلفيه
.
بجد منظرها كان بشع
.

كان نفسي يكون معايا الكاميرا. لكن للاسف ما اخدهاش معايا النهارده.
.
.
.
دول 5 من الحوادث اللي لفتت انتباهي النهارده علي الطريق ولو قلت لكم انه في أدهم مرتين بس حوادث خفيفه بدون اضرار بشرية مش عارف حتصدقوني ولا لأ.
.
ده بس علي طريق المنصورة بنها (محصلة يوم واحد)
.

ايه اللي بحصل لنا مش فاهم.
ايه اللي وصلنا للمرحلة دي.
.
الطرق ولا المرور ولا السواقين ولا القدر كده.

انا كنت راجع وعيني علي مراية الصالون مع كل فرملة. ومع ذلك في مخرج شبرا من عند الكورنيش عربيه لانسر مكواه سلمت علي الاكصدام الخلفي.
.
.
يارب عفوك ورضاك
.

اللهم اضرب الظالمين بالظالمين وأخرجنا منهم سالمين
.