الموضوع: سواقة الستات

اللهم ما طولك ياروووووووووووووووووووووو وح

ليه كدة بس ياكابوس
مالمنتدي بقاله فترة ماشي كويس وكانت معظمها خناقات رجالية فقط والستات كانت ساكتة وحاطة في قلبها وواخدين جنب من الخناقات والنزاعات
عموما انت فتحت النار من جديد بموضوع سواقة الستات استكمالاً للحلقات السابقة من اراقة الدماء.
الله يسامحك

وعلي فكرة النهاردة كان في 2 (رجاااااااااااااااااالة ) كسروا عليا كسرتين يودوا في داهية .
واحد منهم بيلف معايا في اليوتيرن وعشان غشيم واهم حاجة عنده يعدي اليوتيرن وخلاص عدي الأول من غير مايعمل حساب اللي جنبيه وحكلي العربية حكة صوتها كان مسموع جدا حرقت دمي ومشي ولا كإنه عمل اي حاجة وعمل نفسه مش واخد باله وقال ايه عايز يهرب ، خلاني جريت وراه 3 شوارع وحرقت علي الغيارات عشان احصله لحد مازنقته قبل يوتيرن كان داخله وكسرت عليه (عقاباً ليه) واتخض ياعيني ووقف في مدخل اليوتيرن ووقفت جنبيه (على مدخل اليوتيرن من غير مادخل لإني كنت هاكمل طوالي) وهزأته علي اللي عمله ومشيت في طريقي.
ولما وصلت الشغل الحمد لله لاقيت الحكة طلعت بسيطة وشوية بوية من عنده جم على الفانوس بس فضل دمي محروق طول الطريق من غباؤه .

والتاني بقي خلاني طالعة من شارع جانبي بيطلع علي صلاح سالم جنب الكوبري أنا حافظة الشارع ده كويس وعارفة اطلع منه ازاي لإنه بيطلع على شارع واااسع فاضي يشيل في العادي 3 عربيات او عربيتين مستريحين اوي اوي ويكون في بينهم مسافة كبيرة وانا طالعة بمنتهي الهدوء واستنيت لحد مالشارع فضي ومحضنة مع الرصيف اليمين كويس جدا بحيث اسيب مسافة كبيرة (سايباله حارة ونص) للي ماشي طوالي (على الشمال) انه يمشي براحته من غير مايتخض ومن غير ماكسر عليه خالص (لإني بلتزم اني اخد الملف علي ضيق من غير ماقطع الطريق علي اللي جاي "زي مافي ناس كتيرة رجالة برده بتعمل كده ") لكنه طلع غبي برده وجاي بسرعة رغم انه شافني بعدي يعني المفروض يهدي شوية او يمسك شمال وبس خصوصا إن الشمال فاضي تماما لكنه راح رازعني كلكس طويل (رغم اني كنت بعيد عنه تماما وعدينا مع بعض من غير مالمسه ولا يلمسني وعدي قبلي وفضل يشوح بإيده في المرايا بصيتله وانا مذهولة ورفعت ايدي تعجباً من تصرفه وسبته يعدي براحته ولما مسك الحارة اليمين ضغطت بنزين وقلت اخد طريقي واعديه (من الشمال) مالشارع واسع وخلاص عايزة اخلص بقي لإن الموقف المفروض خلص لكنه طلع حيوان خلاني لحد ماجيت جنبه وهاعدي منه راح كاسر عليا كسرة حيوانة زيه لكني فرملت وربنا ستر.
بجد منتهي الغباء اللي في الدنيا وفي الاخر لما عديت وجيت قدامه كنت عايزة اغلس عليه ومخليهوش يعدي لاقيته بيضحك في المرايا بمنتهي البلاهة بصيتله بإحتقار ومشيت وقلت حسبي الله ونعم الوكيل.
مش فاهمة ليه سلوك الناس بقي عنيف بالشكل ده دول خلوني انا كمان بقيت عنيفة وسواقتي بقت عنيفة من اللي بيعملوه فينا.
ليه لما بيشوفوا بنت بتسوق لازم يسخفوا بأي طريقة يعني لو لاقوها بتعرف تسوق كويس يإما بيكسروا عليها (بخطأ غبي متعمد) وبتحدي عشان يعجزوها بأي شكل وكإن لسان حالهم بيقول "برده انتي ست وعمرك ماهتسوقي كويس زي الراجل " يإما لو مش بتسوق كويس يفضلوا يشتموا ويزعقوا ويتلككولها على أقل غلطة ويحسسوها بالعجز الرهيب ويعاقبوها علي انها مبتعرفش تعمل المهارة الرهييييييبة اللي اسمها "السواقة" وكإن السواقة دي منحة من الرب لا تمنح الا للسادة الرجال فقط دون غيرهم من المخلوقات الأخرى.
عموما زي مافي ستات بتسوق كويس في رجالة بتسوق كويس لكنهم بيستغلوا ده بشكل سئ وبيتهوروا خاصة في الطرق السريعة
وزي مافي ستات سواقتها سيئة في رجالة سواقتهم اسوأ بمراحل ولو مشيت وراهم توصل بيتك في 3 سنين .
ومتنسوش إن سواقين التاكسي والميكروباص والميني باص والأتوبيس والنص نقل والنقل اللي السبب في كل الحوادث واللي ممرين علينا عيشتنا ومورينا الويل ليل ونهار ينتموا لفصيلة الرجاااااااااااااااااال .

بجد كل الشعب المصري رجالة وستات عايز يتعمله فورمات وينزله سيستم من اول وجديد وينزله برنامج سواقة يتماشي مع شوراعنا اللي تخلي الحجر ينطق .

فياريت بقي نفضها سيرة ونتقبل الوضع الحالي بما هو عليه ونسكت ومنخلش الكيل يفيض اكتر ماهو فايض اصلاً
ونحاول نتعايش مع بعض بطريقة افضل من كدة
ومعلش سامحوني السواقة الصحيحة من وجهة نظر المصريين هي سواقة البلطجة فقط وسياسة اللي خايف على نفسه يوسع.
والنوع ده من السواقة في رجال ونساء يجيدوه وفي رجال ونساء لايجيدوه .
فلو هانقول الستات مبتعرفش تسوق ياريت نصححها ونقول الستات مبتعرفش تبلطج وهي راكبة عربياتها وعشان كدة الناس بتشتكي.


سامحوني لو كان إسلوبي هجومي شوية لكن الموضوع ده جه في توقيت سئ جدا بالنسبة ليا وانا لسة دمي محروق من الموقفين بتوع النهاردة دول .