الموضوع: ماذا لو؟

كل سنة و انتوا طيبين جميعا

من شوية أعلنت دار الإفتاء ان غدا هو المتمم لشهر شعبان و إن بعد بكرة ان شاء الله رمضان. طبعا ده المتوقع عشان الموضوع محسوب فلكيا، يعني شئ مفروغ منه. انما زمان أيام التمانينات كانت الناس بتستنى الرؤية بجد عشان يعرفوا بكرة صيام و لا لأ.. مش سد خانة زي دلوقتي، و كانت بتحصل أحيانا شوية لخبطة و الناس تفضل مش عارفة هو بكرة صيام و لا لأ لحد بالليل.

النهاردة و انا مستنية الرؤية مع ماما باقول لها تفتكري لو ده حصل دلوقتي و جه المفتي قال بكرة صيام، هايحصل ايه؟ قامت ياعيني الفكرة في حد ذاتها خضتها و قالت تبقى الشوارع هاتتملي ناس و الدنيا هاتبقى على بعضها و محدش هايعرف يروح اي مشوار يتراح بأي 4 عجلات

تفتكروا فعلا لو ده حصل و فجأة اكتشفنا ان بكرة رمضان، البلد دي هايبقى شكلها عامل ازاي؟ ده إذا كان النهاردة اهوه الخميس و لسه فيه بكرة كله الناس تشتري فيه حاجتها و الشوارع العربيات فيها ما بتتحركش. انا على فكرة لغيت كذا مشوار النهاردة عشان عارفة ان أعصابي هاتتحرق في يوم زي ده، و فعلا نزلت مشوار قريب كده و ما أخدتش العربية و شفت بعيني الشوارع عاملة ازاي.. أمال بأه لو قالوا بكرة رمضان هايكون الوضع عامل ازاي؟

كل سنة و انتوا طيبين مرة تانية

والله هو فعلا موضوع مهم وعمر الواحد مفكر فيه بس تخيل ان كل الشعب فى الشارع مره واحده هو ده اللى هيحصل