الموضوع: أصحاب اللوجان دخووووووووووووول

اولا السلام عليكم ورحمة الله و بركاتة
كل عام و نتم بخير بمناسبة شهر رمضان المعظم اعادة الله علي الأمة الإسلامية و هي في احسن حال

ندخل بأه في الموضوع

بالنسبة لنا كملاك للعربية لوجان سواء كانت سيدان او mcv انا بفكر اننا نعمل موضوع نسجل فيه كل ملاحظاتنا علي اداء العربية سواء كانت ايجابية او سلبية و كل المشاكل اللي ظهرت و قابلتنا مع العربية و طرق علاجها
و تبقي موسوعة لأي حد عاوز يعرف ايه حاجة عن العربية او لو حد قابلتة المشكلة ممكن يدخل و يعرف معلومات عنها وازاي اتحلت

طبعا الحمد لله حتي الآن انا ما شفتش اي مشكلة كبيرة او جسيمة من العربية و اقتناعي بيزيد بيها يوم عن يوم
طبعا مش معني كدا ان العربية ايديال و مثالية لا بس هي شوية ملاحظات ما بتأثرش علي اداء العربية و سلامة الركاب و الحمد لله علي النعمة دي

انا عربيتي عاملة لغاية دلوقتي 15500 كم و لسه هروح اعمل صيانة ال 15 بكره
انا بس عندي مشكلة بسيطة جدا و مش عارف احدد مصدرها و عاوز مساعدتكم و ارائكم فيها قبل ما اروح الصيانة عشان الأمور تبقي ملمومة و ما ترحش بعيد

المشكلة هي ان الطريق اللي انا بعدي فيه كل يوم بيتسفلت (بترصف) و متبهدل اخر بهدلة من تربة ظلطية و بلاك و زفت و قطران من بتاع الأسفلت كل يوم و مش عاوز اقلكم انا عفريتي اني امشي في العربية في طريق مدقدق و مش ناعم ببقي علي أعصابي و كأني ماشي حافي علي زجاج , و الله الكلام دا بجد و بتعجب جدا من الناس اللي بتبقي ماشية مسرعة عالطرق دي و ببقي هاين عليه اوقفة و اقوله حرام عليك العربية ارحمها شوية يا مفتري

المهم عشان ما نطلعش من موضوعنا

الطريق كله حفر ومطبات نتيجة لعملية الرصف دي و ببقي ماشي بطئ جدا علي قد ما اقدر و ما سك يميني عشان ما ضايقش حد
بس فيه صوت كركبة او زي ما تقولوا حاجة مفكوكة مش عارف اوصفة المهم انه صوت يشخلل كدا بيجي من ناحية الأبواب من عند السقاطة بتاعة الباب اللي بتقفلة (لوك)
بس مش عارف ليه احساسي بيقلي ان الصوت دا من الزجاج بتاع الأبواب بيزيق من احتكاكه في الكاوتش بتاع المجري بتاعة الزجاج في الباب يعني مثلا التراب و الرمال اللي دخلت جوا عاملة الصوت دا
بس مش عارف ازاي اتأكد من الكلام دا

هل حد من الأخوة الللي معاهم لوجان عنده نفس مشكلتي ولا ماحدش شافها قبل كدا
وهل هناك اي سبراي ممكن انضف بيه المجاري دي و لا ممكن هواء مضغوط في اي بنزية عادي

و لو كانت المشكلة مش من الزجاج ممكن تكون من فين تاني مع العلم ان ما فيش اي مشكلة ظهرت في الأبواب سواء في الفتح او القفل و الأمور تمام

بس انا ما بحبش اسمع اي صوت و انا راكب العربية الا صوت الموتور او صوت كاسيت او صوت الهواء من الشبابيك
غير كدا ببقي مش علي بعضي و افضل متابع لغاية ما اعرف الصوت مصدره من فين

يمكن بعض الناس يحس ان المشكلة تافهة و مش مهمة بس دا طبع يا جماعة و مش هيتغير يمكن عشان طبيعة عملي كمهندس مخلياني كدا بس اهو اللي حصل بأه

تناي مشكلة قابلتني مع العربية هي تلف جوز المرايات الجانبية , الدراع اللي بيتحكم في توجيه و تحريك المرايات باظ او بمعني ادق الواير اللي بيوجه المرايا تقريبا اتقطع او طلع من مكانه او حصله تمدد المهم انه ما بيحركش المرايا و بلغتهم في التوكيل و تقريبا دي مشكلة ظهرت كتير في اللوجان و قاللولي انا هيغروها في الضمان و فعلا كلموني عشان يقولوا لي ان المرايات و صلت و نا طلبت انها تتغير في صيانة ال 15 بدل ما اروح مرتين و انا اتصرفت و ثبت المرايا بحشوه خشب كدا عالماشي لغاية ما اغيرهم
طبعا هي المرايات مش قد كدا و اظن انها ممكن تبوظ تاني بعد التغيير لو اتغيرت بنفس المرايات القديمة إلا لو كانوا عملوا حسابهم و عالجوا المشكلة
ازاي ممكن نعالج حاجة زي كدا يعني ممكن المرايا تتفك و تتظبط و تتعالج بدل ما تتغير ؟؟؟؟؟؟

بس


هي دي كل مشاكله مع العربية حتي الآن
يا ريت لو حد عنده اي ملاحظات تاني يقولها لنا

آه صحيح حد يعرف يقولي هو ليه الراديو بتاع اللوجان ما بيشغلش غير موجة ال اف ام بس هل محتاج طريقة برمجة معينة و لا ايه الحكاية بالظبط

اسف علي الإطالة
جزاكم الله خير و كل عام و انتم بخير

السلام عليكم يا استاذ مصطفى وكل سنه واعضاء نايل موتورز جميعا واعضاء رينو خصوصا بخير وطيبين ورمضان كريم

انا هجاوبك بخصوص صوت الكركبه بس. الصوت دا ياسيدى بتاع الحصا والتراب اللى بيلزق فالكاوتش نتيجة البلاك اللى قبل الرصف اللى مرشوش على الدبش الابيض فالشارع وكل لما تمشى بالعربيه التراب والحصا دا بيفك من الكاوتش ويضرب فى التصفيح اللى تحت ماتور العربيه

علشان كده بتسمع الصوت دا :-) للاسف الرمل والحصا دا ممكن يجرح دهان العربيه لو وصلله

المشاركة الأصلية كتبت بواسطة hesham_tawfiq

السلام عليكم يا استاذ مصطفى وكل سنه واعضاء نايل موتورز جميعا واعضاء رينو خصوصا بخير وطيبين ورمضان كريم

انا هجاوبك بخصوص صوت الكركبه بس. الصوت دا ياسيدى بتاع الحصا والتراب اللى بيلزق فالكاوتش نتيجة البلاك اللى قبل الرصف اللى مرشوش على الدبش الابيض فالشارع وكل لما تمشى بالعربيه التراب والحصا دا بيفك من الكاوتش ويضرب فى التصفيح اللى تحت ماتور العربيه

علشان كده بتسمع الصوت دا :-) للاسف الرمل والحصا دا ممكن يجرح دهان العربيه لو وصلله

شكرا أ/ هشام علي ردك

بس حضرتك الصوت دا مش من تحت العربية خالص و انا متأكد من كدا
الصوت جاي من عند الأبواب من الجزء اللي فيه سقاطة اللوك بتاع الباب فأنا متخيل ان جزء معين ممكن يكون مفكوك و هو اللي عامل الكركبة دي
اما الشك في انه ممكن يكون صادر من الزجاج نفسة بسبب احتكاكة بالكاوتش البلاستيكي بتاع المجري اللي في الباب دا علي اساس ان التراب اللي داخل المجري بيعمل الصوت دا مع احتكاكة بالزجاج و بيظهر في المطبات
و دا مجرد تخمين مني

فانا بسأل ان كان حد عنده نفس الحكاية دي

المشاركة الأصلية كتبت بواسطة mido90

لو سمحت ممكن تقولى التكييف اخبارة اية معاك وهل هوزى تكييف الفيرنا ولا الفيرنا احسن؟؟؟؟

التكييف ممتاز و بأشغله علي 2 او ممكن 3 لو الجو سخن اوي مع العلم اني من الصعيد و من قنا "عذاب النار"
و بصراحة تكييف ممتاز
بس مقارنة بالفيرنا فبصراحة انا ما جربتش الفيرنا قبل دا بس ما اظنش انه احسن من كدا و الله اعلم

اما من ناحية تأثير التكييف علي العربية فهو اكيد طبعا بيأثر بس بيتهأيلي انه هيبقي زي اي عربية تاني

المشاركة الأصلية كتبت بواسطة ahmed a.maksoud

السلام عليكم ورحمة الله وبركاته

وكل عام و أنتم بخير

حبيت بس أحذرك من المشى بسرعة على البلاك عشان ممكن يلزق فى العربية من تحت و ييجى على الدهان بتاع الرفارف و العتب و الأكصدامات.

والله يا أ/ احمد انا بمشي علي اقل من مهلي لدرجة ان لو حد ورايا ممكن يتشل فيها من البطء بتاعي بس انا بمشي في اقصي اليمين عشان الطريق ما يقفش
و لكن برده البلاك راح علي العتب و فيه شوية نقط كدا و العربية كلها مش نضيفة بصراحة لأن الطريق كله متبهدل و مستخسر اغسلها لأنها هتتوسخ تاني لما اعدي عالطريق يعني ملهاش لازمة الغسلة

بس انا كنت عاوز اعرف ازاي انضف اثار البلاك دي من علي جسم العربية بدون ما أثر علي الدهان

مع العلم ان عربيتي لونها فضي

شكرا يا باشا

المشاركة الأصلية كتبت بواسطة ahmed a.maksoud

للأسف ملهوش غير حل واحد

فوطة مبلولة جاز و تنضف بيها بس بالراحة من غير أستخدام القوة.

انا غسلت العربية النهاردة في مغسلة كدا غسلة عالسريع من برا بعد ما لقيت العربية بتنزل كتل رمل و تربة ظلطية و انا بعمل الصيانة لدرجة ان الأرضية بتاعة المركز اتملت طين و تراب ناشف من الرفارف و العربية من تحت
و بعد ما اتغسلت ظهرت اثار البلاك و الزفت بتاع الأسفلت و نصحوني في البنزية اني اغسلة بشوية بنزين بس انا رفضت وقولت لهم بعدين مش دلوقتي لما اسأل هنا في القسم هل ممكن البنزين يعمل مشكلة في الدهان و لا عادي و هل هناك اي حاجة مخصوصة للتنظيف مع البلا و الحاجت الرزلة دي

و شكرا يا أ/احمد علي متابعتك للموضوع

جزاك الله خيرا