الموضوع: أصحاب اللوجان دخووووووووووووول

اولا السلام عليكم ورحمة الله و بركاتة
كل عام و نتم بخير بمناسبة شهر رمضان المعظم اعادة الله علي الأمة الإسلامية و هي في احسن حال

ندخل بأه في الموضوع

بالنسبة لنا كملاك للعربية لوجان سواء كانت سيدان او mcv انا بفكر اننا نعمل موضوع نسجل فيه كل ملاحظاتنا علي اداء العربية سواء كانت ايجابية او سلبية و كل المشاكل اللي ظهرت و قابلتنا مع العربية و طرق علاجها
و تبقي موسوعة لأي حد عاوز يعرف ايه حاجة عن العربية او لو حد قابلتة المشكلة ممكن يدخل و يعرف معلومات عنها وازاي اتحلت

طبعا الحمد لله حتي الآن انا ما شفتش اي مشكلة كبيرة او جسيمة من العربية و اقتناعي بيزيد بيها يوم عن يوم
طبعا مش معني كدا ان العربية ايديال و مثالية لا بس هي شوية ملاحظات ما بتأثرش علي اداء العربية و سلامة الركاب و الحمد لله علي النعمة دي

انا عربيتي عاملة لغاية دلوقتي 15500 كم و لسه هروح اعمل صيانة ال 15 بكره
انا بس عندي مشكلة بسيطة جدا و مش عارف احدد مصدرها و عاوز مساعدتكم و ارائكم فيها قبل ما اروح الصيانة عشان الأمور تبقي ملمومة و ما ترحش بعيد

المشكلة هي ان الطريق اللي انا بعدي فيه كل يوم بيتسفلت (بترصف) و متبهدل اخر بهدلة من تربة ظلطية و بلاك و زفت و قطران من بتاع الأسفلت كل يوم و مش عاوز اقلكم انا عفريتي اني امشي في العربية في طريق مدقدق و مش ناعم ببقي علي أعصابي و كأني ماشي حافي علي زجاج , و الله الكلام دا بجد و بتعجب جدا من الناس اللي بتبقي ماشية مسرعة عالطرق دي و ببقي هاين عليه اوقفة و اقوله حرام عليك العربية ارحمها شوية يا مفتري

المهم عشان ما نطلعش من موضوعنا

الطريق كله حفر ومطبات نتيجة لعملية الرصف دي و ببقي ماشي بطئ جدا علي قد ما اقدر و ما سك يميني عشان ما ضايقش حد
بس فيه صوت كركبة او زي ما تقولوا حاجة مفكوكة مش عارف اوصفة المهم انه صوت يشخلل كدا بيجي من ناحية الأبواب من عند السقاطة بتاعة الباب اللي بتقفلة (لوك)
بس مش عارف ليه احساسي بيقلي ان الصوت دا من الزجاج بتاع الأبواب بيزيق من احتكاكه في الكاوتش بتاع المجري بتاعة الزجاج في الباب يعني مثلا التراب و الرمال اللي دخلت جوا عاملة الصوت دا
بس مش عارف ازاي اتأكد من الكلام دا

هل حد من الأخوة الللي معاهم لوجان عنده نفس مشكلتي ولا ماحدش شافها قبل كدا
وهل هناك اي سبراي ممكن انضف بيه المجاري دي و لا ممكن هواء مضغوط في اي بنزية عادي

و لو كانت المشكلة مش من الزجاج ممكن تكون من فين تاني مع العلم ان ما فيش اي مشكلة ظهرت في الأبواب سواء في الفتح او القفل و الأمور تمام

بس انا ما بحبش اسمع اي صوت و انا راكب العربية الا صوت الموتور او صوت كاسيت او صوت الهواء من الشبابيك
غير كدا ببقي مش علي بعضي و افضل متابع لغاية ما اعرف الصوت مصدره من فين

يمكن بعض الناس يحس ان المشكلة تافهة و مش مهمة بس دا طبع يا جماعة و مش هيتغير يمكن عشان طبيعة عملي كمهندس مخلياني كدا بس اهو اللي حصل بأه

تناي مشكلة قابلتني مع العربية هي تلف جوز المرايات الجانبية , الدراع اللي بيتحكم في توجيه و تحريك المرايات باظ او بمعني ادق الواير اللي بيوجه المرايا تقريبا اتقطع او طلع من مكانه او حصله تمدد المهم انه ما بيحركش المرايا و بلغتهم في التوكيل و تقريبا دي مشكلة ظهرت كتير في اللوجان و قاللولي انا هيغروها في الضمان و فعلا كلموني عشان يقولوا لي ان المرايات و صلت و نا طلبت انها تتغير في صيانة ال 15 بدل ما اروح مرتين و انا اتصرفت و ثبت المرايا بحشوه خشب كدا عالماشي لغاية ما اغيرهم
طبعا هي المرايات مش قد كدا و اظن انها ممكن تبوظ تاني بعد التغيير لو اتغيرت بنفس المرايات القديمة إلا لو كانوا عملوا حسابهم و عالجوا المشكلة
ازاي ممكن نعالج حاجة زي كدا يعني ممكن المرايا تتفك و تتظبط و تتعالج بدل ما تتغير ؟؟؟؟؟؟

بس


هي دي كل مشاكله مع العربية حتي الآن
يا ريت لو حد عنده اي ملاحظات تاني يقولها لنا

آه صحيح حد يعرف يقولي هو ليه الراديو بتاع اللوجان ما بيشغلش غير موجة ال اف ام بس هل محتاج طريقة برمجة معينة و لا ايه الحكاية بالظبط

اسف علي الإطالة
جزاكم الله خير و كل عام و انتم بخير

المشاركة الأصلية كتبت بواسطة mohamed1979

كل عام و الأخوه الأعضاء بخير بمناسبه الشهر الكريم
انا بس عايز اسأل ا / مصطفى هو الصوت من العفشه و لا ايه ز اكيد حضرتك حتعرف اذا كان الصوت من العفشه و لا لأ
اذا كان مش من العفشه فده اكيد من حاجه مفكوكه او حاجه معدن بتخبط
انا حصل معايا حاجه زى كده و كان السبب مفتاح ابنى موقعه فى العربيه
اما الكاسيت فهو شغال معايا من غير الأريال و بيجب كل المحطات

لا الصوت مش من العفشة خالص و الحمد لله العفشة تمام التمام و احسن حاجة في العربية الحمدلله

الصوت زي ما انا قلت جاي من الأبواب من عند السقاطة بتاعة اللوك في الباب
بس انا لما بهز الباب ما بسمعش طقطقة و لا اي حاجة
بس امشي علي ارض زلطية او مدقات ابتدي اسمعه
عارف حضرتك لما بتركب عربية ميكروباس و تمشي في مدق و لا ارض مكسرة مش بتسمع صوت شخللة من الزجاج بتاع الشبابيك بتعاها اهو حاجة مقارية لكدا
انا ان شاء الله رايح الصيانة النهاردة و هحاول اخليهم يفكوا الباب و يشوفوا الدنيا عاملة ايه جواه يمكن تكون حاجو مفكوكة وعاوزة يتقرط عليها مثلا

انا الراديو شغال عندي بس ما بيجبش غير ال اف ام ما بيجبش الموجة المتوسطة او القصيرة مش عارف ليه هل له برمجة معينة
انا هحاول ابص في الكتالوج بتاعه يمكن الاقي حل