اقتباس المشاركة الأصلية كتبت بواسطة casper_dj30 مشاهدة المشاركة
انا معايا لانسر 1998 ايتوماتيك جبتها من شهر و نص تقريبا
وطبعا اول ما جبتها غيرت السيور و الفلاتر و الزيوت و البوجيهات و الذي منه
العربية سحبها ممتاز جدا و سريعة الاستجابة قوي بس في حاجتين مش فاهمهم
1- العربية علي ما بتسخن بطلع عيني لازم 10 دقايق كدة و لا حاجة علشان تسخن و لو مشيت بيها من غير ما اسخن كويس الاقي العربية مش بتستجيب خالص
2- لما اشغل التكييف احس اني راكب عربية تانية وحشة قوي في السحب و لو زودت بنزين الاقيها تكركر وو مفييش استجابة مع اني بحطلها بنزين 92 و مدلعها علي الاخر

هل كل دة طبيعي في الكريستالة و لا كريستالتي انا الي فيها حاجة مش مظبوطة
أولا مبروك عليك الكريستالة.
بالنسبة لمشكلة التسخين, دة عيب معروف و هو طبة التشوك(السخان) بايظة, و الحل هو خرط طبة جديدة و لحامها بالقرنديد. بعد كدة تقدر تدور و تمشي علي طول و هي تسخن براحتها :)
مين ممكن يعملك الشغلانة دي, أنا كنت عملتها في مركز صبحي سند جنب الحرفيين. هناك ظبطوا العربية تمام الكمبيوتر و صلح التشوك و السحب بقي تمام جدا بس للاسف الاسبراتير اتحرق منهم و هم بيشتغلوا و مرضيوش يتحملوا تكلفته و دة اللي زعلني منهم و مرحتش هناك تاني.

بالنسبة لسحب العربية أثناء تشغيل التكييف, هو فعلا بيضعف بس مش لدرجة ان الموتور يكركر . أعتقد أنك محتاج تضبطها علي الكمبيوتر.

بالتوفيق