الموضوع: الحادثة ... والنجدة ... والخناقة....و المواصلات ... وانا تاني

السلام عليكم ورحمة الله

اولا اللهم أجرني في مصيبتي و اخلفني خيرا منها
اللهم أجر كل مصاب يا ارحم الراحمين
قدر الله وماشاء فعل والحمد لله رب العالمبن

مبدأيا أنا اسف اني بكلمك في موضوع يضايق زي ده بس انا فعلا باحب افضفض معاكم و استفيد بخبراتكم.. و لكم مني كل اعتذار

اول امبارح الساعة 8 مساءا .. طالع من حلوان وماشي في الشارع اللي بيطلع علي ركن حلوان .. سرعتي 60 الي 70 كيلو مش أكتر... باصص قدامي.. طريقي فاضي.. و فجأة ميكروباص علي اليمين راكن قرر يتحرك .. حركت العربية سنة شمال علشان اديله فرصة يطلع وانا اطلع من جنبه ... راح داخل شمال و اصبح في وسط الشارع ..وفجأة توقف تماما عن الحركة

انا دوست فرامل علي الاخر... و الفرامل صفرت .. والعربية زحفتلها بتاع 4 متر... و ماوقفتش غير بعد ما اصطدمت بالميكروباص صدمة شديدة جدا .. فجأة لاقيت نظارتي في علي التابللوه .. و لاقيت طفاية الحريق تحت رجلية

رحت مبطل الكنتاكت -و انا مش عارف اذا كانت العربية لسه دايرة ولا لأ- و فضلت في مكاني دقيقة باتدارك الموقف و بالم حاجاتي من علي التابلوه والكرسي اللي جانبي و انا باقول لا حول ولا قوة الا بالله و قدر الله وماشاء فعل.

بافتح الباب.. ما بيفتحش غير مسافة20 سم ..وبيعاكس .. ضغط عليه و فتحته بالمسافة اللي تنزلني..

وبدأت أسمع من الناس اللي ملمومه عبارات كلها اختلطت
... انت مش غلطان ..
هو ابن ال .... ده .. هو فيه حد بيسوق كده ..
لازم ما تسكتش علي حقك ...
بس انت اللي جاي من ورا ...
لا حول الله
يا باشمهندس انت لازم كنت تاخد بالك
حصلك حاجه يا كابتن
السواق اهو اوعي تسيبه

كل العبارات دي بتمر علي وداني بس وانا مش مستوعبها ...
فجأه جالي سواق الميكروباص.. بيقولي يا بيه انا عارف اني غلطان بس والله كنت بافادي عربية قدامي وانا تحت امرك

بدأت أتنبه ز اشوف تلفياتي

كل ده من غير ما انطق... بصيت علي العربية الالتو ... فجاة بقدر قادر لاقيتها شبه الماتيريا الكبوت ووش العربية اتطبقوا في ضهر الميكروباص المستقيم فخلس شكل الكبوت بتاعي مربع .... طبعا ما يتفتحش.
جوز الفوانيس الامامي متدغدغين
فيه سائل اخضر في الارض مش عارف اذا كان زيت من الموتور ولا دي المية الخاضرة بتاعة العربية بس كان كمية كبيرة

طيب .. قلت الحمد لله .. اول حاجه جت في بالي ... امي اللي لسه موصلها مشوار .. وراجعلها كمان ساعين ..

اتصلت باخويا zalabany2007 وواحد صديقي

وبعدين بدأت رحلة العذاب و الضنا في استدعاء شرطة النجدة

اتصل بشرطة النجده ...- 122 علشان ماحدش يقولي بتتصل بنمرة غلط - يرد عليا صوت رخيم و فخيم : جميع مندوبونا مشغولين بتلقي بلاغات الآن وسوف يتم الرد عليك حالا ....الصوت ده يستمر و يتكرر لمده دقيقتين و 20 الي 40 ثانية قبل مايرد متلقي البلاغ

طبعا انا اكتشفت انه بيرد بعد فترة ... ده بعد مرات من المحاولة تجاوزت ال10 مرات اللي اتصل بيهم و اقفل بعد دقيقة مثلا و اتصل تاني

رد عليا بتاع النجدة خد البيانات ... ورقم التليفون . وقالي هانبعتلك عربية فورا.
قلت يا فرج الله

وتمر فورا الخاصة بالنجدة في مدة انظار تفوق الساعتين والنصف... اتصلت بالنجدة خلالها 5 مرات علي الاقل أكرر البلاغ.. وفي النهاية اضطريت اتصل بقسم حلوان نفسه و كان فاضل اني احب علي يد الراجل و بقوله ابعتلك حد يجيبك من القسم اللي مايبعدش اكتر من 700 متر عن مكان الحادثة

فلاش باااك ... اول ما نزلت من العربية و اتكلم معايا السواق .. واتصل بصاحب العربية -خدوا باللكم ده اول صاحب للعربية الميكروباص جالي علشان هاتكتشفوا ان الشعب كله العربية دي بتاعته فيما بعد- راجل محترم جه.. نزل من عربيته الماتركس..سلامات يا باشمهندس.. خير انت متعور .. طيب هاتعمل ايه .. قلتله محضر علشان اثبت تلفياتي و التأمين يصلحها ما اضطرش اعمل مشكلة .. وانتا يا سيدي لو عايز تاخد عربيتك خدها و اتفضل .. قالي يا باشا انا معاك للأخر و مايهمكش .. اتصل بالنجدة
تلفيات الميكروباص.. تطبيقة خفيفة في الشنطة والجنب الايسر للسيارة من الخلف... فعلا بسيطة

المهم .. خلال الساعتين ونص اللي وقفتهم في انتظار النجدة .. توالي علي اصحاب السيارة الميكروباص التي اكتشفت ان لها اكثر من 12 صاحب.. قرايب صاحب العربية مش عارف ولا صحابه و كلهم جايين يجاملوا

واحد طويل : انا صاحب العربية ... انت اللي جاي من ورا
واحد تخين : أنا صاحب العربية ....انت اللي غلطان
واحد طويل غي الطويل الاولاني : أنا صاحب العربية ...كل دي فرامل .. ده انت كنت ناقص تطلع الاسفلن في كوتش عربيتك
غيرهم : يا بيه احنا هاينوبنا ايه من القسم احنا نطلع علي سمكري و تخلصنا انت ونشوف عربيتنا تتكلف كام وتدفع و بعدين انت تشوف حالك

المهم .. انا ردي الاوحد .. لما تيجي النجده .. هو حضرتك شوفت الحادثة ؟ طيب بتحكم ازاي اني الغلطان .. طيب من فضلك انا مش قادر اتكلم دلوقتي.

بس
كل ده قبل ما يظهر في الصورة مستر اكس ... اخطر واحد في الكون رئيس نيابات السائقين العمومية .. شاب بتاع 28 - 29 سنه .... جالي.. انت بقي اللي خبطت العربية بتاعة اخويا -قلت الحمد لله انه ما قليش اني صاحب العربية- ..قلتله ايوه يا بيه .. و دي سواقة دي .. وكل دي فرملة ... بصراحة انا كنت علي اخري رحت طالع فيه ... وقلتله يخرس خالص لحد مايجي البوليس.. بدأ يتشنج و انا اللي هاعملك محضر وانت اللي خابط و انت اللي هاتصلحلي وانت اللي هاتعمل وانت اللي هاتسوي... سكت وسيبته و في الاخر قلتله اسأل السواق بتاعك مين اللي غلطان الاول وبعدين تعالي اتكلم معايا ...طبعا قعد يقولي هوريلك و هاسويلك وقاعد يكلم زملائه في امن الدولة واصدقائة في ال CIAا و اسكتلانديارد علشان طبعا ينصفوه و مايضيعوش حقه في انه يبهدلني.
و انا اضحك
و أخيرا وصل الامين المبجل و معاه عسكري ... بعد لما كلمنا قسم حلوان وعرضنا خدماتنا في اننا نوصلهم .. هما الحقيقة اترفعوا عن التوصيلة و جم في ميكروباص أجره

عايزين يعملوا محضر صلح و اثبات تلفيات و ينتهوا ... بدأ مستر اكس الخطير يزعق يقولوا لا .. انا عايز اعمل محضر اضمن بيه حقي... عايز اثبت تلفياتي ... وراح جايب حجرة حاططها في وسط الطريق.. و اثبتولي الفرملة اللي في الارض دي - المسكين الظاهر عليه بيتفرج علي CSI MIAMI كتير - راح الامين مزعقله .. وراحوا شايلين الحجر من الطريق.. و اتصلوا بالقسم بالغوا الظابط اننا رافضين التصالح ... بعدها ب ربع ساعة الظابط جه ... فمستر اكس بيقولو ده جاي من وره و شايف يا باشا الفرامل و عامل يا باشا ... انا سكت خالص . الظابط قاله يا راجل حرام عليك مش شايف منظر العربية .. قاله حقي يا باشا و مش عارف ايه .. قال خلاص تعالوا القسم...
وبعد ما قطرنا العربية وروحنا القسم .. طبعا بفضل ربنا طلع الظابط النبطشي معرفة .. وغير معارف الاسرة برضو في القسم .. الموضوع رسي علي محضر صلح و اثبات للتلفيات .. وبعد خناقات ما بين -الساده صاحبي السيارة - و الانقسامات بينهم ... طلبوا مني بعدها بشكل شبه ودي وشبه ابتزازي مبلغ 2000 جنيه قيمة تصليح عربيتهم .. طبعا اعترضت و قلت ما ابقاش انا مش غلطان .. وموقفي قانونيا سليم وانتوا كمان عايزين تبتزوني.. نروح لسمكري يقدرلكم تلفياتكم -والله ما تتجاوز 200 300 جنيه- وانا عينيا ليكم ... يردوا عليا لا عايزين المبلغ دلوقتي ... طبعا كان استفزاز لان عربيتي مش بتمشي المهم فهمتهم انه كده عيب يعني وانهم ماعندهمش دم ... وفجأة يقدر الله للفصل الاول من المأساه ان ينتهي.. ان واحد منهم يقولي يا استاذ ربنا يعوض علينا و عليك ... وخلاص حصل خير واحنا هانصلحها و مش عايزين حاجه .. يا استاذ انا والله مش ممانع اني ادفع
رفض.. ولم الناس و مشي..

قطرت انا واخويا وصديقي العربية لحد بيت صاحبي .. وتاني يوم جيبنا ونش ياخدها للتوكيل

والله يا جماعة انا ما قدرت انزل اجيب الونش و حسيت اني مش عايز اشوفها وهي في الحالة دي


المشكلة اني امبارح حسيت شعور غريب... اول مرة مواصلات من سنة و نص.... وفي رمضان ... و في الحر ده

بجد ... مأساه .. خصوصا اني مشواري بالعربية 70 كيلو رايح وزيهم جاي يوميا ... بالمواصلات تفرط معايا في ساعتين ... وعدد يتراوح من 4 الي 5 مواصلات علشان اعرف اروح بيتنا ... ولنا الله خصوصا في رمضان


انا الحمد لله مأمن مع ALLIANZ ... و عملت اخطار الحادث.. بس خايف يتأخروا في التصليح .. كل يوم بعيدي عليا بابقي هاموت من المواصلات .. بجد والله و من كل قلبي
ربنا يكفيكم شر الطريق و يحفظ ليكم سياراتكم

اخيرا
اللهم اجرني في مصيبتي و اخلفني خيرا منها يا قدير

الاعتذار لا يكفي عن الاطالة
تقبلوا مني كل الود و الاحترام