الموضوع: ما هي الشركة الكورية الأفضل؟

زي كا قال الزملا قبل كده.... هيونديه وكيا يعتبروا حاجة واحدة، ودايو وشيفروليه هما حاجة واحدة

بس فيه حاجة لازم نقولها:

كيا وهيونديه عندهم معامل أبحاث مستقلة، وسياسة تسويقية مستقلة، ومصانع منفصلة، ولكن الميزة في التحالف إنهم بيقسموا الشغل

إزاي؟

يعني مثلا:

الهيونديه تعمل تصميم الإيلانترا، وبعدين الكيا تاخد التصميم ده وتعدله .. فتطلع السيراتو
الكيا تعمل تصميم البيكانتو، وبعدين الهيونديه تاخد التصميم ده وتعدله، فتطلع الـi10
الهيونديه تعمل تصميم السوناتا، وبعدين الكيا تاخد التصميم ده وتعدله .. فتطلع الأوبتيما
الكيا تعمل تصميم الفينجا، وبعدين الهيونديه تاخد التصميم ده وتعدله، فتطلع الـix20

وهكذا...


يعني الشغل على التطوير مش بيتعمل مرتين.. مجرد تعديلات خارجية مش محتاجة تجارب وتطوير بياخد وقت كبير

عشان كده هتلاقي تشابه في إنتاج الشركتين بنسبة حوالي 90% على الأقل، بمعنى إنك لما تلاقي عربية في فئة معينة.. لازم تلاقي سيارة شبيهه في إنتاج الشركة التانية... مع بعض الاستثناءات


في رأيي.. كيا تتميز بالتصميم القريب من السيارات الأوروبية... وده سببه إن كيا عينت المهندس بيتر شراير في 2006 كمدير قسم التصميم، بعد ما كان بيشتغل قبل كده في أودي الألمانية، عشان كده ممكن نقول إن موديلات كيا الحديثة فيها بعض الشبه ولمحات من أودي والسيارات الألمانية عموما

الكلام ده واضح جدا في الموديلات الكبيرة.. زي كادينزا وكوريس



بالنسبة لداييوو وشيفروليه... فالموضوع ببساطة إن داييوو حاليا بقت إحدى شركات جنرال موتورز الأمريكية، والمعروف عن جنرال موتورز إنهم مش بيصرفوا على التطوير في الموديلات (مش زي كيا وهيونديه)... إنما وبكل بساطة.. بيشيلوا الماركة ويحطوا ماركة تانية، ويسوقوها في مكان تاني غير اللي الماركة الأصلية بتتباع فيها

إنتاج جنرال موتورز داييوو حاليا بيتباع عالميا تحت كذا مسمى:

داييوو ... في كوريا
شيفروليه.. على مستوى العالم.. وداخل أمريكا
سوزوكي... داخل أمريكا


أبسط مثال على الموضوع ده بيحصل في مصر... الشيفروليه الدبابة كانت في وقت من الأوقات اسمها أيسوزو وساعات تانية بدفورد ... مع إنها كلها أصلا إيسوزو، وشيفروليه لا دخل لها بالتصميم من قريب أو بعيد




بس ما زال فيه شركات كورية تانية.. هي صحيح مش منتشرة عندنا... بس لازم نذكرها بردو:
* شركة سامسونج للسيارات... ودي حاليا تابعة لمجموعة رينو نيسان، وهي اللي بتعمل الرينو اسكالا
* شركة سانجيونج... ودي كانت مشهورة انها كانت مرتبطة بمرسيدس، بس حاليا هي تابعة لمجموعة ماهيندرا الهندية



...