الموضوع: أفبدووووني ياشباب بالله عليكم

بص يا سيدى:

نمسك العربيات اللى انت اقترحتها واحدة واحدة

1- الريتمو: لو طبقنا نظرية دارون على شركة فيات يبقى هنقول ان الريجاتا اصلها 128، وبالتالى توجد حلقة مفقودة للتطور من ال128 الى الريجات، هذة الحلقة المفقودة هى الريتمو، العربية الريتمو تمثل مرحلة وسيطة فى تطوير السيارة 128 الى السيارة ريجاتا، شملت الريتمو بعض التعديلات البسيطة فى الشاسيه عن ال128 وده ادى بالتالى الى اتساع الصالون، لكن كان يعيبها ان الموراتير اللى ركبت عليها اما انها كانت مناسبة لقوه تحمل الشاسيه زى الموتور ال1100 لكها ضعيفة بالنسبة لحجم العربية (55 حصان فقط) او المواتير الأكبر زى ال1300 وال1500 اللى كانت فعلا مناسبة لحجم العربية لكن شديدة على الشاسيه وبتالى كانت بتظهر فيها مشالك الشاسيه بتاع ال128

المشاكل دى كلها تم علاجها فى الريجاتا وفى الموديلات الحديثة من الريتمو زى الريتمو 70 والريتمو 80 ،
بالنسبة لقطع غيار الريتمو فسنجد ان نصها 128 ونصها ريجاتا، علما بأن اصلا ال128 والريجاتا متشابهين فى معظم قطع غيارهم، لكن هنلاقى اختلافات فى حاجات زى الكاربراتير وقطع الغيار الداخلية بتاعة الجيربوكس(علما بان جيربوكس اليجاتا بيركب كله على بعضه مكنا جيربوكس ال128 لكنه داخليا مختلف، والمساعدين وأكسات الجر، الخ، لكن فى النهاية الريتمو ايا كانت قطعة الغيار الميكانيكية اللى هتعوزها لها هتلاقيها، كذلك الريتمو الشكل القديم لو عوزتلها فوانيس امامية فإن فوانيس ال128 العادة بتركب عليها، مشكلة الريتمو الحقيقية فى الإكصدامات امامية وخلفية، نادرين جدا ولو عوزتهم هتلاقيهم غاليين اكثر من النار بشوية، الخلاصة ، العربية الريتمو ميفرقهاش عن ال128 غير المنظر الخارجى واتساع الصالون، كل قطع غيارها الميكانيكية موجودة، لكن لو لاقدر الله حصلت حادثة وحتجت قطع غيار خارجة مش هتلاقيها

2- ال128 ، سيارة شراء الدماغ واللعب فى المضمون، ملهاش حاجة مش موجودة، ملهاش حاجة غالية، المعروض منها كتير والنضيف منه كتير، عيبها بالمقارنة بالسيارات الأكبر انها مش سريعة اوى (عادة بتوصل لل120 لكن بعد كدة صعب جدا، لازم يكون الهوا فى ظهرك علشان تعدى 120، وفى كل الأحوال مش هتعدى 140 لو ضربتها على قلبها)، كما انها ككل السيارتا الصغيرة يقل ثباتها على الأرض بعد ال100،وطبعا عيبها الأشهر فى القيادة وهو اتساع زاوية الدوران، بس عموما ده مش معناه انى بعيب فيها لأنى لما بركب 128 نظيفة لحد النهاردة مش بحس بفروق تذكر عن الكيا برايد او الأونو او اى عربية فى نفس الفئة سوى موضوع اتساع زاوية دورانها
اما عيوب الصيانة التى تظهر على المدى الطويل فهى تنحصر فى مجموعة من العيوب البسيطة انا كنت اتكلمت عليها بالتفصيل فى منتدى فيات وده الرابط بتاعها


http://www.nilemotors.net/Forum/viewtopic.php?t=747

بالتالى ال128 عربية خدومة جدا ولو نضيفة مش هتقل بأصلها معاك، لكن لا تتوقع منها غير انها 128 ، يعنى توديك وتجيبك الشغل والمول والسينيما وبلدكم واسكندرية كمان لو حبيت، لكن مش هتقطع بيها العربيات اللى ماشية فى الشارع، وكذلك انسى موضوع شرم الشيخ ومرسى مطروح بال 128 خصوصا لو قديمة ، لاداعى للمغامرة

الأولست: انسى يا عمرو، ولا كأنك سمعت حاجة، الأولست دى بتاعة شركة رومانى كانت اشترت خط انتاج قديم من ستروين بتاع عربية اسمها ستروين فيزا كانت تنتج فى التمانينات، وخدت ايامها فى كستروين فى فرنسا وخدت ايامها كاولست فى رومانيا وانتقلت الى رحمة الله تعالى وسبحان من له الدوام، الشركة الرومانية اللى كانت بتعمل الاولست دى زمان قفلت خط انتاج الاولست من سنوات طويلة بعد ما دايو اشترتها قبل ما دايو بحالها تتباع لجنرال موتورز ،وحاليا هى اللى بتنتج اللانوس والنوبيرا ودايو مصر بتاخد منها الكثير من مكونات العربيات دى للتجميع، يعنى من الآخر الأولست دى عربية مكانها الوحيد هو متحف الركائب الملكية بالقلعة، علما بأن كل الللى اتباع منها فى مصر هم 700 عربية، يعلم الله وحده كام واحدة منها لسة شغالين(على فكرة كانوا عاملين لنفسهم رابطة فى مصر من حوالى 7-10 سنوات لتبادل المعلومات وقطع الغيار، الخ بس معظمهم ربنا فتح عليهم وغيروها ولذلك اعتقد ان الرابطة دى ماتت)

ال125: احد الديناصورات التى افلتت من الإنقراض: عربية انتجت فى ايطاليا فى الستينات وفى بولندا فى السبعينات، كانت طبعا تحفة فى عصرها لكن سبحان من يغير ولا يتغير، قديمة أوى وكثيرة المشاكل وشكلها لا يتناسب مع شاب صغير، الإنظابع اللى اى حد بيكونه عن واحد راكب 125 فى الشارع انه يا إما راحجل حرفى او صاحب ورشة ودى عربية البهدلة، او انه لو شاب صغير ولابس لبس موظفين يبقى دى عربية بابا الحاج -وكيل وزراة على المعاش والشاب الصغير مستلفها،او انها عربيه المرحوم والشاب الصغير وارثها، لو انت مصر عليها(وهو ما لا أنصح به) دور على الإيطالى منها لأن كل حاجت ال132 بتركب عليها

فيه عربيتا تانية انت مجبتش سيرتها مع انها فى نفس الفئة:

الريجاتا: لو لقيت واحدة نضيفة فى حدود امكانياتك اشترى ومتفكرش، عربية ممتازة وعن تجربة
ال323: نفس الكلام عن الريجاتا
ال131: صحيح هى مش حديثة اوى، لكن كل قطع غيارها مشتركة مع الشاهين تقريبا، ودى ميزة كبرة لأن انت ضامن توافر قطع غيارها طويلا

لو امكانياتك المادية لا تسمع بواحدة من ال3 دول فانا افضل ال128 من وسط اختياراتك، عربية جميلة وشكلها شبابى ومشاكلها قليلة ومعروفة، وفى نفس الوقت لما ربنا يوسع عليك ويجيلك قرشين هتقلبها فى نص ساعة وتجيب حاجة احدث او اكبر او كلاهما (انا 3 مرات امتلكت 128، والتلات عربيات ساعة لما بعتهم، اكثر واحدة طولت معايا فى البيع اتباعت بعد 12 ساعة من لما قلت انا ناوى ابيع، الإتنين التانيين واحدة اتباعت فى نص ساعة والتانية اتباعت بعد ساعة )