الموضوع: الحمد لله استلمت نيو اكسنت 2010

شكرا جزيلا للاستاذ lans145

الف مبروك
و يارب تاخد خيرها و يبعد عنك شرها
بس ليا استفسار
اصلى ناوى احجز واحدة ان شاء اللة

لية اللى استلمتة مع السيارة
زى الاستبن فية اية تانى
و البنزين اية الاخبار استهلاكة قد اية
وشكرا مرة اخرى
و كل عام و انتم بخير

المشاركة الأصلية كتبت بواسطة mhoss

ممكن أعرف حضرتك فضلتها عن الكيا ريو ليه؟...
أنا مهتم جداً بالكيا ريو و كنت شايف إنها أفضل ممكن حضرتك توضحلنا الأسباب اللى خلتك تستقر علي النيو أكسنت...

الله يبارك فيكم جميعا
بالنسبة للكيا ريو فهى عربية جميلة جدا و شكلها اجمل من الاكسنت وانا كان معايا كيا برايد سيدان اتوماتيك و الكيا عربية محترمة جدا بس انا فضلت الاكسنت للاتى :
1. النيو اكسنت 1600 سى سى و الكيا 1400 فاعتقد ان دى نقطة تفوق للاكسنت بالنسبة ليا لانى بشغل التكييف كتير جدا و حتى ساعات فى الشتاء فكده الموتور يقدر يستحمل معايا و خصوصا ان البرايد لما كانت معايا 1300 سى سى فكنت بحس ان التكييف بيحمل عليها و بتسخن جدا لانها طبعا قديمة موديل 99 و كنت لازم اقفل التكييف علشان تبرد ...فقلت اجيب سى سى كبير يستحمل التكييف
2. موضوع اعادة البيع الكيا ريو صعبة فى اعادة بيعها و بتخسر فى تمنها كتير عكس الهيونداى و ممكن الواحد يحب يغير العربية قدام فيعرف يبيع محدش ضامن انا كنت بقول عمرى ما حبيع البرايد لانها ممتازة بس موضوع السخونة ده خلانى ابيعها .. النصيب..
3. كل مميزات الاكسنت دى وبرضة ارخص من الكيا ريو ب 3000 جنيه رغم ان العربيتين تقريبا حاجة واحدة مع اختلاف الموتور و الشكل الخارجى و لو شفت مقارنات بين العربيتين حتستغرب من مدى التشابه و على فكرة هما دلوقتى شركة واحدة و فى كتالوج الكاسيت عندى عليه علامة كيا - هيونداى

المشاركة الأصلية كتبت بواسطة ali_amr

الف مبروك وربنا يبارك لك فيها ... جبت مانيوال ولا اتوماتيك... وايه رايك فى الاتوماتيك؟

متشكر جدا ... بص انا حقولك على حاجة انا كان معايا كيا برايد اتوماتيك و كان ممتاز جدا و عمرى ما اشتكيت منه بس يمكن لان العربية مكانتش مستهلكة يعنى كانت موديل 99 و مرفوعة 3 سنين... بس انا لما جيت ابيعها حسيت ان الناس فى مصر بتخاف تشترى اتوماتيك مستعمل كتير اوى يشوفها يقولوا جميلة جدا بس كنا عاوزين مانيوال... فقلت اجيب مانيوال علشان انا بصراحة ناوى ابيعها بعد 3 - 4 سنين كده ان شاء الله لانى نفسى فى اللانسر 1600 اتوماتيك بس تمنها غالى عليا فقلت اجيب مانيوال تقعد معايا كام سنة و اعرف ابيعها...
و بعدين الاتوماتيك لازم تخلى بالك من شحن البطارية باستمرار مرة البطارية فى اسكندرية عطلتنى يوم و كلفتنى حوالى 70 جنيه توصيلات فقط كل شوية اجيب الكهربائى ياخد 20 جنيه و بعدين تبطل تانى مع انها كانت بطارية جديدة بس اكتشفت السبب انى كنت شارى بطاية 70 و هيا المفروض تكون 55 فالدينامو مكانش بيخلها تشحن كويس ... طبعا فهلوة بتاع البطاريات قالى هات بطارية كبيرة علشان تستحمل .. بس طلع مبيفهمش...
غير ان الاتوماتيك لما بيعطل لازم تشيل العربية على عربية نقل توديها للميكانيكى عكس المانيوال ممكن توديها سحب او تزقها... مش عارف بيقولوا الاتوماتيك الحديث فيها خاصية بتلغى كلبشة العربية لما تكون عطلانة و ممكن حد يفيدنا فى المعلومة دى..
بس حقولك على حاجة بعد ما سوقت يومين فى زحمة رمضان انا دولقتى ندمااااااااااااااااااااااا اااااااااااان جدا انى مجبتش اتوماتيك و خصوصا انا كنت راكب عربية اتوماتيك قبل دى و بالنسبة للاعطال انا مأمن فى كونتكت و عندهم حاجة انك لما تكون عطلان و العربية مش بتتحرك يبعتولك ونش مجانا و عربية ليموزين..
و فى ناس بتقولى انت بس علشان لسة مخدتش على العربية لكن بعد كده حتلاقى المانيوال لذيذ على فكرة انا ركبت 5 عربيات قبل الاكسنت 4 منهم مانيوال و 1 اتوماتيك.. الاتوماتيك متعة بس لو يابانى او المانى .. انما الكورى انت و حظك و طريقة سواقتك ....
نصيحة هات اتوماتيك وتوصيلة بطارية تكون معاك باستمرار و امن فى كونتاكت و ريح نفسك .. .