الموضوع: الي خبراء الهيونداي برجاء الدخول للاهميه

الاكسل عربية جميلة جدا واحلى من الكسنت وجامدة اوى وشكلها احلى من الاكسنت بس عيبها الوحيد مرايتها كبيرة ومش بتتقفل ولو حتجبها هاتها 1500 مش 1300 احسن وتكون مكيفة ومبروك مقدما

المشاركة الأصلية كتبت بواسطة elkok

السلام عليكم ورحمه الله وبركاته
عاوز رائيكم احلي شباب واعضاء نايل
انا عاوز اشتري عربيه رينج 25 او 30 الف
وقررت اني اجيب اكسنت او اكسل
عاوز اعرف انهي احسن وايهما افضل
سيارة بالسعر دا والمهم كمان قطع الغيار
بصراحه عاوزة حاجه شبابيه وعمليه
اتمني تعتبروني اخ ليكم وتقولولي انهي
سيارة افضل وبسعر كويس
بانتظاركم حبايب

هات1500 اكسيل ..........عربية فلتة من هيونداى ...........لكن اهم حاجة الحالة............. خبرة 10 سنين ........ وندمت لما بعتها

المشاركة الأصلية كتبت بواسطة shemoo

بص يا معالى الباشا

أنا كان عندى اكسيل وبعتها وجبت أكسنت

أقدر اقولك أن العربيتين زى الفل وماشاء الله عليهم

لكن فى فروق بينهم هقولك عليهم

بس الأول فى ملحوظة

الرينج ده يخليك تكلم على الأكسيل بس ويمكن تحتاج تزود حاجة بسيطة وأن دخلت على الأكسنت هتكون 1300 سى سى

نجى بئه للفروق
بس خلى بالك كلامى على 1500 سى سى

: 1- المتور *

الأكسنت تتفوق فى قوة المتور بشكل كبير تقدر تقول أن الأكسنت من حيث التسارع والكلام ده ( مجرمة ) بس ده مايمنعش أن الأكسيل برضه ممتازة

- الحقن : الأكسنت أنجيكشن أما الأكسيل كربرايتير ( لو هتحط بنزين 80 يبقى الأكسيل أحسن ) مع أنى كنت بحط للأكسنت 80 وكانت شغالة زى القرد

- أستهلاك البنزين : تقريباّ واحد ( موفرين جداّ جداّ جداّ )


2- العفشة والثبات *

الأكسنت ثباتها أحسن وتحس أنها متماسكة أكتر وأن كانت مش سوبر يعنى - الأكسيل ناعمة بس الجزء الخلفى فيها طول ما العربية ماشية على سرعة بيطنط ويا سلام لو حتة فية مطب هوا تبقى مراجيح


3 - الصالون والأوبشن *

- من حيث الخامات: الأكسيل أفضل( تابلوه الأكسنت اللى فى مصر كلها مشروخ من فوق العدادات أساسى ومن النص أحياناّ) مفيش الكلام ده فى الأكسيل

- من حيث الشكل : دى اذواق لكن الأكسنت شكله أحدث وشبابى أكتر

- من حيث الأوبشن :الأكسيل أفضل ( 4 زجاج كهربه - أريال كهربه - تنك وشنطة من الداخل - باور - سنتر )
الأكسنت ( 2 زجاج كهربه أمامى- أريال كهربه - تنك وشنطة من الداخل - باور - سنتر )

- من حيث الأتساع : تقريباّ نفس الأتساع الطولى لكن الأتساع العرض الأكسنت أفضل بسبب البومبيه اللى فى تصميمها

4 - التكيف *

- واحد فى مستوى الأداء ( محترم جداّ ) تلاجة

- تأثيره على السحب والتسارع وأستهلاك البنزين : محدود لو العربية مظبوطة وأن كان تأثيره أقل بشكل بسيط على الأكسنت ( متور أقوى + أنجيكشن )


5 - قطع الغيار والصيانة *

- قطع الغيار : متوفرة جداّ جداّ جداّ ورخيصة جداّ وأن كانت أرخص شوية بالنسبة للأكسيل
- الصيانة : أى مكانيكى مبتدئى يعرف يشتغل فيهم بسهولة وأن كانت الأكسيل أسهل ( كربيراتير - تكيهات عادية )


6-الشكل الخارجى والصاج*

- الشكل الخارجى : اذواق وأن كنت بفضل الأكسيل ( أرقى) وشنطة أكبر
- الصاج : الأتنين تعبانين جداّ طبعاّ بس فى عيب فى الأكسنت ( التقاء الرفرف مع الأكصدام ادام و ورا دايماّ فيه فروق بينهم وشكلهم مش حلو )



يعنى أن حاولت ألملك كل حاجة فاكرها - أعذرنى لو كنت نسيت حاجة

عموماّ لو أفتكرت حاجة تانية هبقى أضيفها ان شاء الرحمن

....* خلى بالك أن العربيتين دول مطحونين بقالهم سنين
( تاكسى - أيجار - شركات - ملاكى )
فركز أوى أوى وأنت بتشترى
وميغركش المظهر الخارجى
(مطحونةوبعدين أتشدت)
لازم تتأكد جداّ من أن
الشاسية والقوايم(الدواخل)تمام التمام و أن المتور والعفشة تكون حالتهم على الأقل جيدة والصالون ميكونش مبهدل

وربنا ييسرلك الحال ويكرمك بعربية محترمة


أسف على الأطالة





اللهم أعنا على ذكرك وحمدك وشكرك وحسن عبادتك

تسلملي يا باشا علي المعلومات الجميله دي
تسلم بجد وربنا مايحرمنا منك ابدا
شكرا للمرور

المشاركة الأصلية كتبت بواسطة mimimomojojo

هات1500 اكسيل ..........عربية فلتة من هيونداى ...........لكن اهم حاجة الحالة............. خبرة 10 سنين ........ وندمت لما بعتها

جزاك الله خيرا
شكرا للمرور اخي

المشاركة الأصلية كتبت بواسطة yahiahelaly

بلنسبة للفلوس الي معاك مينفعش غير اكسيل وعشان تجيب حالة حلوة هتضر تزود كمان ولو هتجيب هات ال 1500
بس طبعا الاكسينت احلى كفاية موديل اعلى وشكل من رئي انه احلى

اكيد الافضل انا اتمني يكون معايا
تسلم يا باشا للمرور