الموضوع: انقذوا مريم

ده نص رسالة دكتور محمد كمال صاحب الموضوع
وانا استأذتة اني انشرها عشان عموم الفائدة
ولذا تم غلق الموضوع ولن يسمح بتكرار مواضيع مشابهة عن الحالة مريم :
----------
اخي العزيز كريم منير
الوضع يا سيدي كما يلي:
1- انا عرفت الموضوع من الاهرام الاسبوعي اتنشر 4 اسابيع
2- موقع مملكة تاميكوم على النت راح صاحبه ومعاه مجموعة اعضاء للبنت وزاروها ونزلوا صور ليها اللى انا نقلتها هنا بعد ما استاذنته
3- كلمت والد البنت اكتر من مرة
4- في مرة رحت له علشان اديله مبلغ معين كمساعدة مني ومن اختي
5- حين قابلت والد البنت لقيت كلامه متضارب جدا ومريب جدا
6- كلمت صاحب مملكة تاميكوم ونقلت له شكوكي
7- الراجل عمل تحرياته عن طريق ناس يعرفهم واتضح ان حالة البنت حقيقية فعلا لكن ابو البنت بيستغلها علشان يلم فلوس
8- صاحب مملكة تاميكوم بعد ما كان عامل اعلان زي اللى حضرتك اتكرمت وعملته شال الاعلان فورا
9- مكانش ينفع اني اخبي حاجة زي دي عليك او انى اسيب بقية الاخوة الاعضاء يقعوا ضحية نصب اب تخلي عن معاني الابوة وبيتاجر بمرض بنته والعياذ بالله
10- الحمد لله اللى انت عملته ان شاء الله ينكتب لك في ميزان حسناتك وبيثبت اد ايه انت انسان محترم بجد واب حقيقي وربنا يخلي لك ولادك لكن اذا كانت التبرعات ستذهب لمكان غير المخصص له يبقي المفروض انبهك لانى انا اللى نقلت الموضوع وانا اللى طلبت منك تنشره وانت ربنا يكرمك علمت اعلان مجانى وفيه اعضاء اتبرعوا وانا منهم وان شاء الله ربنا يكتبه في ميزان حسنات الناس اللى اتبرعت اما الاب فحسابه عند الله وعند اجهزة رقابية اخري قام صاحب مملكة تاميكوم بتحريكها ضد الاب
وفي كل الاحوال ربنا يشفي البنت لان ليس لها دخل في اختيار ابوها


بعتذر يا كريم اذا كنت سببت لك ازعاج او ورطتك في حاجة زي دي وانا اسف جدا وفي نفس الوقت شاكر ليك جدا انسانيتك وتحت امرك في اي حاجة تؤمر بيها

اخوك محمد كمال

المشاركة الأصلية كتبت بواسطة ابو الوليد المصرى

انا عايز اعرف التفاصيل يعنى ايه الراجل كلامه مريب وازاى بيتاجر بمرض بنته .
هو ظاهر الرجل انه محتاج وبنته فعلا مريضة .
انا بصراحة مش عارف اقول ليه الواحد مننا يقول يتبرع بنفسه عشان يضمن الحاجة توصل لمستحقيها الصح اللي يتعمل بعد كده ان التبرعات تروح لأهل الأختصاص الجمعيات الخيرية وهم بيوصلوها بطريقتهم .

اخي ابو الوليد والله ولا انا كمان عارف ازاي اب يقدر يعمل كدة ومهموش غير جمع المال وبنته مريضة
لكن للاسف انا اتفاعلت مع الموضوع زي الكل هنا وانا اللى نشرته وطلبت من الاخ كريم يعمل اعلان عنه واستجاب مشكورا وبدون دفع تمن الاعلان لكن والله فعلا الراجل مريب بشكل غير طبيعي لدرجة انه اتصل بيا وطلب مني اشيل رقم الحساب اللى بيتم التبرع عليه بحجة ان الاموال العامة وامن الدولة بيتحروا عن الحساب علشان بيجمع تبرعات بدون ترخيص معلش انا لو اب وبنتي مريضة كدة مش هيهمني اي مخلوق
وللصدفة بعد ما قابلت ابو البنت واديته مبلغ من المال وانا ماشي بفكر لقيت كل حاجة مش مريحة وكلمت في لحظتها اخونا محمد البحاري صاب مشروع المصحف في رمضان لانى قابلته وعارفه وشرحت له الموضوع وقلت له انا مديتش الراجل كل الفلوس اللى كنت ناوي اديها له وخايف اكون ظلمته وخايف يكون بينصب قالى حطها في اي وجه من اوجه الخير والحمد لله حصل وراحت مستشفي 57357