بص يا سيدي

الشعور بالعفشة ده مختلف من شخص لأخر

هاحاول انقلك شعوري بشكل واضح .

كل الاختبارات القادمة فوق سرعة 80كم/س

لو ماشي على طريق مسفلت حرير = حرير في حرير طبعا

لو ماشي على طريق مسفلت و فيه نقر أو خرابيش بسيطة = هاتحس فورا بوجود خرابيش بدون اي تأثير على راحة القيادة

لو ماشي في طريق "ترابي" بدون حفر أو مطبات = أداء قوي جدا جدا و احساس بالنعومة

طريق ترابي فيه عالي وواطي و مطبات و حفر (زي المصايف كده) = هاتحس ان انت في سيرك (زي أي عربية) بس هاتلاقي تماسك ملحوظ للعريبة بجد هاتحس انها ماسكة نفسها . لو مشيت بالراحة 30 -40 = نعومة كاملة

طريق بيتسفلت جديد و فيه الحصو و الزلط ده = زفت طبعا مش هاتقدر تسرع عن 30 و إلا هايجيلك ارتجاج في المخ

لو خدت حفرة أو نقرة أو مطب عالي بسرعة = هاتحس بخبطة مسموعة وواضحة يا إما الجنط ..يا أما المساعد يا إما المقص

بس الحقيقة ..العربية عفشتها قوية جدا

أنا و أنا راجع من المقابلة كنت راجع على طريق طنطا

و "شربت " مطب جبل و الله على 140

العربية نطت من فوقه و نزلت اكحورت في الأرض و سمعت أصوات دشدشة و قولت الحمد لله جبنا عفشه قدام

و الحمد لله الحمد لله ولا حتى الزوايا اختلفت (فكرتني بالبولو أيام العز)

بس مرة خدت حفرة في الزراعي على 140 برضه ..جابتلي كاللو في الكاوتش


لو هاتمشي في طريق غير مستوى

الركاب الخلفيين بيكون احساسهم بالطريق مباشر بس في الطرق المستوية و السفر العربية مريحة للركاب الأربعة

غير الأوكتافيا مثلا مهما كان الطريق الركاب الخلفيين بالذات و حتى السواق بيشعروا بالتعب

انا كنت راجع من مطروح شوت واحد ..وكان معانا اوكتافيا مسافرة جنبنا وقفونا مرتيم في الطريق علشان ظهرهم وجعهم

و احنا كنا الحمد لله تمام ..أعتقد ده تصميم الكراسي برضه بيفرق فيه .


عموما هي ليست بنعومة التويوتا ...و أرحم كتير من الألماني


عموما الجنط الـ17 هو أكبر سبب في الإحساس بالنشفان