عربيتى الكانشل 850 سى سى موديل 98 ركبت لها تكييف أخيرا
قصة تركيب التكييف كانت رحلة عذاب وضنا
بس فى الآخر فرقت معاها
حد عايز يعرف القصة؟
عرض للطباعة
عربيتى الكانشل 850 سى سى موديل 98 ركبت لها تكييف أخيرا
قصة تركيب التكييف كانت رحلة عذاب وضنا
بس فى الآخر فرقت معاها
حد عايز يعرف القصة؟
أكيد يا دكتور .. مبروك عالتكييف و مستني القصة بالتفصيل
سألت فى بنها عند محل التكييف الوحيد قاللى هيكلف 2000 جنيه ويومين منهم يوم سفر للقاهرة لتركيب قاعدة للكمبرسور وكله هيكون جديد عداالكمبرسوراستيراد
سألت عن الراجل ده ممدحوش فيه فسألت المعارف جابوا لى واحد محترف شغال فى المعادى وهيعمله فى الجراج عندى فى البيت والتكلفة ممكن تكون هى هى لكن الجودة والأمانة أفضل
توكلت على الله
مشوار رقم 1:
سافرت الحرفيين لأسأل عن أجزاء التكييف الخاص بالسيارة نفسها ولم تعجبنى (قديمة قوى) ، ومنها انتقلت للمعادى حيث يعمل الفنى الذى سيقوم بالتركيب فى محل مشهور واشتريت من هناك جميع لوازم التركيب ( التكلفة 1700 جنيه ، 1600 بعد الفصال ) عدا الكمبرسور - قررنا نجيبه من بنها
قابلنى الفنى مساء اليوم التالى فى بنها وظل يعمل عندى من 10 مساءا وحتى 5 صباحا حيث تسحرنا سويا وانصرف بعد تركيب معظم القطع لكنه كسر كلبسات اتنين من الهوايات اللى فى التابلوه!!!
مشوار رقم 2:
رحت معه لمحلات السوزوكى المتقطعة وهى كثير فى بنها واشترينا كمبرسور ب 200 جنيه بقاعدته
روحنا لقينا القاعدة مش مناسبة للموتور ولازم مشوار للقاهرة لتفصيل قاعدة
فكرت وقلت طالما هنزل القاهرة يبقى أجيب لها الكمبرسور بتاعها بقاعدته أحسن
مشوار رقم 3:
نزلت التوكيل ولم أجد هناك أىكمبرسور
نزلت الحرفيين واشتريت كمبرسور ميرا بقاعدته "نفس الموتور" ب 450 ج ورجّعت كمبرسور السوزوكى وعرفت ان قطعة الهواية الواحد بيبيعوها ب 150 ج (ههههههه)
فى البيت ركبت الكمبرسور بنفسى واشتريت له سير ، الناس شافوه قالوا دا الطنبورة بتاعته فيها رفة وأحسن يتغيربدل ما ياكل السير .. فكيت الكمبرسور!
مشوار رقم 4:
نزلت الحرفيين تانى (كل دا فى نهار رمضان والصيام) ورجعت الكمبرسور وجبت واحد تانى شكله أحسن ومافيش فيه أى شعرة رفة
مشوار رقم 5:
رحت أجيب الفنى من قريته ولم أجده واتنرفزت وفكرت إنى أشوف واحد غيره
تانى يوم هديت واتصلت بيه ورحت له بلدهم تانى وشلت معاه العدة والاسطوانات وخدته للجراج وكنت ركبت انا الكمبرسور مكانه
مشوار رقم 6:
أخدنا الخوابير واللواكير والألومنيوم وذهبنا لمحلات فى بنها لعمل كبس للخراطيم ولحامات
ثم جاءت اللحظة الحاسمة : لحظة الشحن....
قلت له مش نتأكد ان الكمبرسور سليم من جوه؟ قال لى متقلقش!
أول شحن خد كيلو فريون كامل!!!!
وشغّل ياعم..............
هو فين التبريد؟
- ماهو شغال أهو
أنا حاسس بطراوة انما مش تبريد
- لأ خد العربية مشوار وشوف
......خدت العربيةمشوار ..تكييف زفت ماركة طين
مافيش هوا ساقع ، شوية طراوة وحتى الطراوة بعد 10 دقايق وقفت
رجعت له وهو لسه فى الجراج ، فك الدايرة لقاها مليانة زيت أسود تقيل (كان هيغمى عليه)
قعد ينفخ هنا وهناك وشحن تانى!!!!!!!!!!!!!
والنتيجة أحسن لمدة 3 دقائق وقطع بعدها تماما!!!!!!!!!
الكمبرسور الاستيراد بايظ وبوّظ الدايرة كلها وعايز يتغير هو على الأقل!!!!!!!!!
يالهووووووووووووووووى
ماذا تفعل لو كنت مكانى وقتها ؟
منتظر باقى القصة يادكتور ...
بس الله يخليك بلاش تشويق ...
خلى السرد متواصل ... وبدون فواصل ...
ولو انا مكانك ....ولا بلاش
يا دوكتور انا لو مكانك كنت بعت العربيه و كملت عليها اللى انت دفعته و جبت واحدة مكيفه جاهزة لان اللى حصل معاك محسسنى اكنك كنت بتخترع التكييف مش بتركبه
هيص بيص
دا كان حالى
ياترى أرجع الحرفيين عند سيد الفراش وآخد كمبرسور تانى وأشحن تانى وفى الآخر بختك يابوبخيت؟
وللا أجيب كمبرسور جديد ماركة ساندن اليابانى ب 1100 جنيه وأعمل له قاعدة ب 100 جنيه وأنضف الدايرة اللى اتملت زيت أسود ويبقى كله جديد فى جديد؟
تسمح لى أعيط؟
الاختيارين = عطلة أكتر وتعب أكتر ومخاطرة مع الأول وتكلفة مع التانى وانا استويت
المهم
توكلت على الله هنزل أرجّع الكمبرسور فى الحرفيين وأروح المعادى أجيب الكمبرسور وأعمل الباقى
المشوار رقم 7 (الأسوأ):
نزلت الساعة 10 ونص تقريبا ووصلت الحرفيين على الضهر
رجّعت الكمبرسور والحقيقة ان الراجل كان فى غاية الذوق والاحترام
شكرا
أخذت الكانشيل وطلعنا على دايرى المعادى ووصلتا محل ساندن
اتكلمت مع المهندس سمير ونزل السعر ل 950 بعد كفاح مرير وعكس ما قلته عن سيد الفراش
مفاجأة: الكمبرسور الطنبورة بتاعته مش نافعه!!!!!!!!! دى سيرها عريض وعندى مش عريض ولازم تتبدل!!!
ماشى يللا شيلوها..... إنها تتشال... أبدا ولا بالزرجينة!
جابوا واحد تانى (منا مبخت) وشالوا طنبورته,, الحمد لله
جم بقى يركبوا عليه الطنبورة الصح طلعت قصيرة وبتحك!
حطو وردة ... لسه بتحك
وصلوا ل 3 ورد علشان الحكة تروح ، وركبت!!!!!!!!
خدت الكمبرسور ونزلت دار السلام
وما أدراك ما دار السلام
مافيش سلام خالص!
رحنا عند الحاج أحمد بتاع القواعد
3 ساعات يفنن ويخترع وأنا أنام فى العربية وأصحى وهو لسه بيشتغل!
ولما خلص أبص ألاقى الكمبرسور معووج لفوق من ناحية السير
وهو مش مقتنع لأن فاضل نص ساعة على الفطار!
صممت وربنا سهل ورضى وعدله قبل المغرب بدقايق وخد ال 100 جنيه
خدت القاعدة ورجعت المعادى من الدايرى وفطرت فى السكة وكملت فى مؤمن
بعد المغرب غسلوا الدايرة بفريون11 (عامل زى ماء الاكسجين بياكل الحاجة ويفور فيها) وعدلوا الخراطيم وكبسوها من تانى وشحنوا والساعة بقت 9 وعايز أروح العيادة فى بنها (مواعيد كتير)
ما صدقت خلصوا وجربوا وشغلت التكييف (بقى حلو فعلا) وطرت على بنها
بعد 5 دقائق فى طريق الرجوع التكييف توقف عن العمل!!!!!!!!!!!
حد بقى يلحقنى قبل ما أولع فى الصنايعية وفى العربية
رجعت لهم طلع ان الوردة التالتة منعت "اللقطة"
شالوها ورجعت حكة خفيفة (بيقولوا هتروح مع الوقت) ، ودا خد كمان ساعة
طبعا اعتذرت عن العيادة
روّوحت وانا مشغل التكييف طول السكة ... تلاجة فعلا ، لكن فيه فتحة مش بيطلع منها هوا!
تانى يوم شلت التابلوه علشان أشوف السبب وصلحته
وآديها ماشية ومتكيفة وانا متكيّف قوى
الموضوع كلفنى أسبوعين عطلة و7 مشاوير عظيمة ومتعبة وأكتر من 3200 جنيه
حمدا لله على السلامة
وجعت دماغكم بس حبيت أشارككم التجربة كلها
اولا و قبل كل شئ الف الف مبروك بجد والله انا فرحتلك و احييك على إرادتك الحديديه و اعصابك الفولاذيه لانك استحملت عذاب و شغل و اشتغالات الصنايعيه و بجد احييك
مبروك يادوك
اخبار السحب ايه وانت مشغل التكييف؟ولو حد قاعد في الكنبة بيحس بيه ولا لأ؟
ماتعرفش لو ركبت تكييف في ساندن يتكلف كام؟
الله يبارك فيكم
السحب يكاد يكون مافيش تأثير عليه
كل اللى قاعد فى العربية بيحس بيه بس طبعا اللى الهوا البارد جاى عليه مباشر بيحس بيه أكتر
التكييف فى ساندن أسعاره هتختلف حسب نوع العربية وسعتها اللترية اللى هتحدد حجم الكمبرسور ونوع السربنتينة
الأسعار مش رخيصة
يعنى الحاجات اللى من عندهم كلفتنى فى أصغر عربية ممكن يتركب فيها تكييف حوالى 2700 بدون المصنعية
الف مبروك يا دوك وفعلا انا بعاني من عربيتي برضوا وكنت بفكر اركبلهات تكييف بس بعد ماسمعت قصتك يتهيالي اشتري عربيه جاهزه بالتكييف
واحيك ع صبرك ومثابرتك
ربنا يباركلك في التكييف
هي رحلة طويلة
وأنا حاسس بيها
لأني منذ حوالي أكثر من أربعة أشهر بدأت هذه الرحلة بالجهود الذاتية لتكييف شاهيني بمساعدة أخي
تم تركيب كل الأجزاء جديدة تماماً
والكباس ساندن ياباني
والكثير الكثير
وعملته بمزاج أوي أنا وأخويا
قطعة قطعة على حوالي شهرين
والحمد لله تم بحمد الله بسم الله ماشاء الله تبارك الله
وأسأل الله أن يعينني وأفرد له موضوع بإذن الله
ومبروك مرة أخرى
الف مبروك يا د/ أحمد بس اعتقد اللي هيقرا الموضوع مش هيفكر يجربه ابدا
الكباس إشتريته من واحد إسمه علام بشارع جسر السويس بجوار قسم عين شمن
كباس ساندن 508 وسعره 950 جنيه
وبقية الأجزاء من علام أيضاً وبعضها من العجوزة
حاولت شراء بعض الأجزاء من ديافيا لكنهم أعطوني أسعار غالية خرافية
وبعض الأجزاء مثل مروحة السربنتينة من عزبة شلبي بتاعت كورولا 1995 وهي أفضل مليون مرة من الجديد الغير موثوقة المصدر وسعرها 150 جنيه
دا كان امتى يابشمهندس؟
انا شارى كباس 505 بنفس السعر!!!!!!!!!!! وبعد فصال فظيع من 1100!!!!!!!!!
الف مبروك يا دكتور... بس ليه دالودخه ووجع القلب ده مكنت عملت التكييف عند بتاع التكييفات بـ 2000 جنيه ولو مستلمتوش منه سليم وشغال وتلج حط صوابعك العشره فعينيه وتبقي ريحت نفسك وبالك ولحقت عيادتك
بالمناسبه بتاع التكييف اللي فبنها دا يبقي هاني ؟؟ :ma:
mabrooooooooooooooooooooook
ربنا يبارك لك في نعمة الصبر اللي ربنا انعمها عليك
انا كان زماني ولعت في العربية بالتكييف بالصنايعية نفسهم
ياااااه بسم الله ما شاء الله على صبرك وطوله بالك
الف مبروك على التكييف , بيتهيألى لو حد قالك فك اى حاجه كدا ابص عليها ممكن تحط دماغه فى الكبوت وتقفل عليه :)
أيوة كدة يا دكتور هي دي الروح .. أحب انا الناس اللي تفضل ورا الحاجة كدة
ما شاء الله .. انا لو كنت مكانك كنت يأست بصراحة ده إختراع التكييف كان أسهل من كدة
مبروك عالتكييف
الف مبروك يا دكتور
و ربنا يبارك لك فيها
بصراحة ماعنديش الصبر بتاعك دا
انا لو فى مكانك كنت بعت العربية و ريحت دماغى
هههههههههههههه
لا أحب تركيب تكيف لعربية مش راكبلها أصلا تكييف الا لو هيركب فى التوكيل
1- راضي علام بشارع جسر السويس (أسوأ ما تتخيل) (يفضل عدم الشراء منه بدون تواجد أخصائي تكييف لأنه ألعبان كبير لو أحس بأن الذي أمامه مش فاهم الصيني من الياباني وخاصة في الكباس ممكن ينصب كويس قوي) والله أعلم بحاله (هذه ليست غيبة ولكنها مجرد تحذير)
2- ديافيا بكوبري القبة بجوار الششنجي بتاع العسكرية
حاجته ممتازة لكن غالية جداً
بالإضافة لأنه يمتلك مصنع للأجزاء الخاصة بتكييف السيارات في 6 أكتوبر لإسمه هاي كوول
3- العجوزة خلف مسرح البالون
أخصائي تركيب تكييف كبير بالإضافة لأنه يبيع أجزاء التكييف والكباسات
4- ساندن المعادي عند المهندس سمير
ونصيحة لكل الزملاء
لا تتساهل في شراء الأجزاء أو تسترخص
لأن الغش كبير جداً
والكباس بيبقى ساندن ومكتوب عليه ياباني وهو صيني
والفرق لا يعرفه إلا متخصص
فلا مانع من أن تشتري الكباس غالي شوية بس تكون متأكد إنه ياباني من واحد ثقة وليس صيني
ألف مبروك يا دكتور
واللة يا دكتور انت انسان مجاهد وتستاهل نوبل علي اللي عملتة
مبروك التكييف والحق انبسط بية قبل الشتا
الف مبرووووووووووووووووك
لي تجربتين في تركيب التكييف
الأولى في شاهين 1400 موديل 2008
والثانية في فيات 131 موديل 1984 ألماني
الشاهين تم شراء كل الأجزاء كما وضحت في مشاركات سابقة في هذا الموضوع
دون أي إسترخاص
والنهاية كانت إن التكييف جيد لو هيكيف شخص واحد
ومقبول لو هيكيف الإثنين اللي قاعدين قدام
وضعيف جداً لو هيكيف اللي قاعدين في الخلف
وكلمة السر في هذه النتيجة الغير مرضية هي الثلاجة ومروحتها ومخارج الهواء (الكويل والمروحة الداخلية وأماكن توزيع الهواء)
بمعنى أن الكويل الذي يباع في كل تلك المحلات التي ذكرتها من قبل لا يعطي أداء جيد مقارنة بتكييف السيارة الأصلي في اللانوس مثلاً أو النيوبيرا
لذلك أنصح كل من يدور برأسه أن يركب تكييف ل فيات 131 وأولادها من شاهين وغيره
بلاش أحسن
أو لو مصر يبقى تكون الثلاجة بمروحتها بالذات نوع قوي جداً كأن يكون مثلاً ثلاجة نوبيرا أو فيرنا
والمشكلة اللي هتقابله
هل التلاجات دي ينفع تركب عندك ولا لأ
-
-
-
شاكر جدا لردك على استفساري
فكره التكييف بدئت معايا بمشاكل ( موتور 2 كامه ) (اغير كامه واجيبها بالاسبراتير ولا احمل الكباس ع حامل فلتر الزيت و اداري بصمه الموتور )
اولا ادور ع مكان احط فيه الكباس بعيد عن مكان بصمه الموتور و الاسبراتير والا هيكون لازم اغير مكان الاسبراتير باني اجيب كامه علوية بالاسبراتير الراكب فيها و بصمه الموتور دي اللي هتكون مشكله ومش عارف قاعده الكباس هتكون ازاي
و طريقة التحكم في التكييف مش عاوز اخرم في تابلوة العربية وعاوز اشغل وحده الهوايات ووحده التحكم بتاعت المروحه او بتاعت التكييف للموديل اللي بينزل فيه
هل حضرتك شكل الكويل اللي ركبته كان انبوبي الشكل بحاول ادور ع صور له
يااااااااه.. ده مشوار طويل قوي
هل اللي جبته زي الموجود في اسفل الصورة الصورة الثانية والثالثة
http://www.facebook.com/media/set/?s...type=3&theater