أنا متشكر جدا يا جماعة..أنا فكرت في حكاية الصيدلية لكن للأسف في واحدة في الشارع. و السوبر ماركت في إتنين.والحلاقة في واحد.هما حاجتين مش موجودين..مطعم أو محل عصير..محتاج أفكر كويس.و برده ساعدوني بالرأي في أي وقت.والله المستعان.
عرض للطباعة
أنا متشكر جدا يا جماعة..أنا فكرت في حكاية الصيدلية لكن للأسف في واحدة في الشارع. و السوبر ماركت في إتنين.والحلاقة في واحد.هما حاجتين مش موجودين..مطعم أو محل عصير..محتاج أفكر كويس.و برده ساعدوني بالرأي في أي وقت.والله المستعان.
بعد قراءة كل الردود متهيالي ممكن اقولك زي ما ناس كتير قالت:
1- اهم حاجة تدرس المنطقة وتشوف فيه محلات ايه موجودة عشان متفتحش زيهم ويبقي زحمة على الفاضي ومش هتكسب
2- سيبك من محلات الموضة زي الاتصالات والموبايل لانك بتقول عايز حاجة تسندك مش حاجة سنة ولا اتنين وتلاقيها شكرا وبعدين كل شارع في مصر دلوقت فيه بين كل محلين موبايلات واتصالات 10 محلات موبايلات واتصالات يعني كتروا اوي
الصيدلية مش هينفع لان المساحة 16 متر والصيدلية قانونا متقلش مش فاكر عن 50 متر ولا 100 متر
البيتزا بردو متهيالي لا لانها مش شغالة اوي لان الناس بتفضل المحلات المعروفة اياها وهتحتاج فرن ونصبة والمكان ميساعدش
متهيالي حلاق يبقي كويس بس يتوقف على عدد المحلات في الشارع والمنطقة وسمعتها وانك تجيب 2 صنايعية بجد مش اي كلام وتبقي موجود طول اليوم
طب ليه 2 ؟؟؟؟ عشان متبقاش رقبتك في ايد واحد منهم والاتنين يتنافسوا
وليه تبقي موجود طول اليوم ؟؟؟ عشان متتسرقش يا ناصح
وربنا يرزقك
محل عصير شغله موسمي وانت بتقول عايز حاجة تبني مستقبلك منها مش تقعد جنبها من الموسم للموسم
ومحل حلاقة واحد مش كتير المهم تعرف تجيب صنايعية كويسة وامينة انا في منطقتي في مربع لا يزيد عن 100 متر في 100 متر فيه 4 محلات وكلهم شغالين ما شاء الله كويس جدا ومنهم واحد صاحبي ربنا يرزقه يا رب ومش محله كمان ده بيشتغل فيه ومن امانته صاحب المحل علشان عنده محل تانى سايب له ده هو اللى واقف فيه وبيشغله كانه محله بالظبط ورزق الاتنين على الله والحمد لله ربنا رازقهم جدا ويا رب يرزقهم ويرزقنا ويرزقك ويرزق الجميع بالحلال يا رب
مع احترامى لكل النصائح إياك أنك تسلم رقبتك لصنيعى عموماً أصبح شئ عادى فى ثقافتنا أن لما العجلة هتمشى الصنيعى هيتغير و هيقولك 50 % أو هسيبك و المحل "هيؤع" و طبعاً أنتا هتدور على صنيعى تانى و ممكن يحصلك نفس المشكله لأنهم بيحسوا انهم بيتعبوا و انتا المستفيد فقط .
انتا فى يومين أجابة دعاء أدعى أن ربنا يبعتلك الفكرة و استشير أصحاب خبرة فى السوق و استخيييييييييييير كتيييييييير . و الله الموفق
حضرتك انا فى نفس الموضوع حاليا ... والافكار دى هتفيد اى حد جدا وشكرا يا جماعه للافكار
بس انا شوفت رد من الردود انك تأجر المحل .. وانا رأى ان الموضوع ده مش تمام لان احنا عندنا محل كنا مأجرينه لواحد وبعدها اما العقد بتاعه خلص مرضيش يطلع من المحل وقالك انا موضب المحل وعاوز 17 الف جنيه !!!!.. رحنا رافعين عليه قضيه وهو كمان جاب محامى والقضيه فضلت شغاله حوالى سنتين او اكتر ! وكل ده و المحكمه كانت سايبه قاعد فى المحل عادى جدا .. واحنا عائله ملهاش فى شغل البلطجيه .. ولا اصلا حد فى العائله له فى المجال التجارى بتاع المحلات وكده ... بس اهو اللى حصل بقى والمحل اتشرى واحنا كنا بره مصر وبقى ملك لينا .. وبعدها دلوقتى القضيه خلصت حمد لله وكسبناها ومش عارفين نشغله ايه ولا مين هيعد فيه حتى ! هو مساحته 25 متر وناحيه شارع احمد سعيد .. قرب عماره الاعلامين ..
فا ياريت لو حد عنده افكار برضه او من المنطقه دى يقول .. لانى معنديش اى خلفيه عنها .. والمحل ممكن اشغله ايه ومين يقعد فيه لان المحل المفروض انى هكون مسؤول عليه لان محدش متفرغله !
وشكرا
وانا اسف انى عملت مشاركتى معاك ف نفس الموضوع بس انا قلت عشان الافكار تبقى فى موضوع واحد .. والاستفاده اكبر
دراسة المكان اهم شئ
- متطلبات الإنسان اليومية وخصوصاً الأكل مشروع مضمون بنسبة عالية جداً. (سوبر ماركت مثلاً).
- نصيحة خاصة : لو المكان عندك فيه حركة وشباب يعنى طريق سيارات وكده وبتفكر فى مجال مش منتشر قوى ولكن هيبدأ ينتشر يبقى ممكن تفكر فى محل قطع غيار ( انا حالياً فاتح محل لقطع غيار الموتسيكلات الصينى ) والمجال ده ممكن أساعدك فيه وتحت أمرك فى أى مشورة تطلبها .
- ممكن تفكر فى محل كماليات سيارات ، شغل الفسفور (شغل حلو قوى بس للأسف معنديش خلفية كبيرة عنه ).
- لو فيه حركة كتير من الناس فى الشارع عندك ممكن تفكر فى مشروع الإكسسوارات الحريمى كالعطور والطرح والذهب الصينى وغيره ... ( أسعار الحاجات دى بتبقى رخصية ومكسبها مع الحركة كويس قوى ).
- محلات الألبان شغلها فله شمعة منورة ( جبن ولبن وزبادى وقشطة ومخلل وكده ). بس محتاج تجهيزات مكلفة شوية.
* فى الأول والآخر لازم تعمل الحاجات دى :
1) تدرس المكان كويس قوى.
2) تحدد رأس المال مع ترك جزء احتياطى للتوسع او لأى ظروف طارئة غالباً بيبقى ربع المبلغ المخصص.
3) لازم تحدد من الأول عاوز توصل لإيه يعنى بتفكر تكبر ولا بتقول بس المشروع يشتغل ومش عاوز اكتر من كده (النقطة دى مهمة قوى على فكرة).
4) استعدادك لتحمل مشاق العمل والقدرة على التعامل مع نوعيات مختلفة من البشر.
5) اى مشروع فكرت فيه واقتنعت بيه لازم تحاول تشوف حد يكون يبشتغل فيه تتعلم منه بعض اسرار المهنة ومفيش مانع انك تدرب عنده فترة ولو تشتغل عنده ببلاش لغاية اما تشوف هتقدر تكمل فيه ولا لأ.
ده اللى فى دماغى حالياً وربنا يوفقك لما فيه الخير
اول حاجة لازم تشرف على المحل و مينفعش تعمل مشروع وتسيبه لغيرك
الافكار اللى فى دماغى
1- محل خطوط وكروت و عداد موبيل واكسسوار ( المجال ده لو بتفهم فيه يبقى عنب )
2- محل سوبر ماركت ( و لو معاك فى نفس المنطقة ماركت تانى تحول تنفسه وتجيب بضائعة احسن منه )
3- محل ادوات كهرباء ( لمبات و ترانسات ودوايات ........... محدش بيستغناء عن الحاجات دى وشغلها مش موسمى )
4- مكتبة وادوات مدرسية و تلاجة حاجة ساقعة وايس كريم ولو مفيش حد بيبع جرائد فى المنطقة ممكن توزع انت ( اغلب شغلها هيبقى موسمى )
واخيرا ربنا يوفقك
محل بلاى استيشن 3 والمتش بجنيه وانتا وشطرتك بقى
انا شايف سوبر ماركت مشروع حلو قوى
وممكن يبقى اكتر من مشروع فى وقت واحد
يعنى يبقى بجانب السوبر ماركت و العصاير و البيبسى والمقرمشات والكلام دا
مفيش مانع تبقى بتبيع كروت موبايل ويبقى فيه موبايل فى المحل الناس تتكلم منه
وكمان ممكن تعمل رفين او تلاته فيهم كراسات و اقلام واستيكرز
يعنى ممكن واحد يبقى داخل المحل يشترى اى حاجه يلاقيك بتبيع كراسات فيفتكر انه عاوز قلم او كراسه او اجنده
اهم حاجه تتاجر بلحلال و تشترى بضاءع كويسه وربنا هيوفقك و يرزقك