ياجماعه حد يعرفنى ممكن احول الماتركس بنزين 80 وازاى وكدا وفى فيشه اوكتان فى العربيه زى الانوس ؟؟
عرض للطباعة
ياجماعه حد يعرفنى ممكن احول الماتركس بنزين 80 وازاى وكدا وفى فيشه اوكتان فى العربيه زى الانوس ؟؟
ايه السؤال الغريب ده؟؟؟؟؟؟؟؟؟؟؟؟؟:whtauwant:
وبعدين ما فيش حاجة اسمها فيشة اوكتان :36_1_1[1]: دي فيشة Knocking Sensor وماينفعش تشيلها ولو مش قادر تحط 90 جبت عربية جديدة أصلا ليه؟؟؟
ثانية أقل حاجة تقبلها العربيات دي هي بنزين 88 وانت اقرب حاجة ليها ال90 وفكك من أسئلة الخيال العلمي
مممممممم متشكر يازوق على ردك الى يدل على انك بجد انتا انسان محترم وربنا يسامحك
تانى حاجه انا حولت الانوس بتاعتى بنزين 80 علشان فى فيشه اوكتان وفى الهيونداى اكسنت كمان
لو انتا ماتعرفش قول مش عارف مش ترد رد زى دا وبجد انا هجولها 80 ومش هقول لحد علشان واحد بيرد زيك مايستفدش اديك ضريت الناس التانيه
ايه يا جماعة انتو حتتخانقو مع بعض :N_no[1]: يا باشمهندس مروان الاستاذ بيسئل عن حاجة معينا حضرتك شايف ان دى حاجة غريبة ومش موجودة وانت معندكش حل ليها متردش وعموما حصل خير وبالنسبة لسؤال حضرتك ان شخصيا اعرف ان العربيات الانجكشن مينفعلهاش بنزين 80 والحضرتك بتقول عليه انا مسمعتش عنه قبل كده فلو حضرتك جربتوه قبل كده قول لنا انا كان معايا سيينا واكسيل كنت بحتط ساعات 80 وساعات 90 ولو حضرتك عايز توفر حولها غاز زى الاعلانات اللى بتيجى فالتلفيزيون:shine[1]:
العربيات الانجكشن مينفعلهاش بنزين 80 ممكن فى ناس جربت بنزين 80 ومحستش بفرق فى السحب بس بعد فترة البخاخات او الرشاشات هتحتاج تغير والله اعلم
سهله هات ماتور الاكسنت القديم وحطو في الماتركس
انا بشوف عربيات كثير ماتريكس بتحط 80 و بشوف تويوتا الهضبة و لانسر شارك احيانا كمان
سالت اصحابهم فية ناس قالتلي انهم بيزودوا فلتر بنزين تاني احتياطي و فية ناس بيحطوا نص صفيحة 92 و النص التاني 80
بس الكل اجمع ان الرشاشات مفيش منها اي مشكلة لانها بتبوظ من الشوائب اللي في البنزين و دية موجودة سواء في اماكن تخزين المحطات سواء كانت بنزين 80 او حتى 95
كلامك اكيد صح ان الرشاشات بتبوظ من البنزينه نفسها لان فى ناس بتمون 92 فى بنزينه مثلا فى راس البر وفجاه الرشاشات تتسد لان التانك فيه رمل وشوائب او دخل عليه ميه
الحاجه التانيه انى حولت الانوس بتاعتى بنزين 80 هيا بتكركر عادى لو حطيتهلها 80 بدون ما احول فيشه الاوكتان
بس لما حولتها ( عمليه سهله خالص ) ماعادتش بتكركر خالص وبمون 80 عادى الماتور ياجماعه بيشتغل على اى بنزين لان اساسا لو شوفت المركب الى فى اى بنزين هوا C6H6 سواء 80 او 100 بس الى بيفرق الاوكتان (رابع اكسيد الرصاص ) ودا وظيفته بس انه بيمنع الكركره وهوا غالى بس لو جيت تشوفوا الفرق بين ال 80 و 90 فى السعر ( كبير جدا ) وبالتالى انا حاسس انها سياسه فى البلد دى ( ضريبه للعربيات الجديده ) بس لو شوفت تصميم الانوس هتلاقى فيشه الاوكتان والعربيه نازله متظبطه على بنزين 88
فيشه الاوكتان فيها 3 اختيارات هيا 93 و 88 و 83 فبالتالى انا حولتها على 83 وحطيتلها 80 ومش بتكركر
والمفروض ان اى عربيه بنزل حتى لو بى ام فيها فيشه اوكتان علشان الحوار دا
على العموم انا هدور عليها ولو لقيتها انا هقولكم علشان افيد الناس كلها ( مش بحب ابخل بمعلومه على حد ) واكيد فى ناس الميزانيه ماثره معاهم جامد بسبب البنزين :shine[1]: ادعولى بقى
السلام عليكم ورحمة الله وبركاته
الأخ الكريم / عاصم
بارك الله فيك يا أخي على سؤالك
أنا شخصيا لو قدرت أحط مية مع البنزين هأحط وده مش عيب في ولكنه عيب في النظام
السستم يعني وكلنا طبعا عارفينه
وكل واحد حسب ظروفه
ومش عيب إن الواحد يحاول يركب حاجة نظيفة ويفكر في فكره بحيث
إنه يخفف أعبائها شوية بما يتلائم مع ظروفه
ولا لازم الفقير اللى يدوبك قدر يعصر نفسه علشان يشتري عربية لازم يجيبها عربية بتمشي لورا
ومش عايزين نزعل من الأخ العزيز مروان أكيد هو مش قصده الإهانة لآحد
أنا هأضيف حاجة بالنسبة لموضوع البنزين والغاز الطبيعي
بالنسبة لموضوع البنزين تمانين هو مالهوش دعوة بكون العربيةإنجكشن أو كربراتير وهو بنفس نقاوة أي بنزين آخر إلا إذا كان التانك الأرضي اللى في محطة البنزين مش نضيف وده ممكن يحصل مع أي بنزين
المشكلة في رقم الأوكتان واللى بيخليه يحترق عند ضفط أقل من الضغط الذي يتحمله الموتور والمصمم عليه ( يعني البنزين هيتأكسد ويحترق قبل ما يعطي أكبر ضغط ممكن )
ده هيخلي البنزين يعطي طاقة حرارية بنسبة أعلى
وطاقة إنضغاط بنسبة أقل
وده بيؤثر على عمرالموتور وخصوصا البساتم وكده
المواتير في الأول كانت بتتحمل ضغط أقل من الحديثه
وعلشان كده كانوا بيصمموا نقطة اشتعال البنزين عند الضغط المنخفط واللى كان بطبيعة الحال مناسب لبنزين تمانين
اللى زي ما قلنا بيشتعل عند ضغط أقل
ومع تطور التكنولوجيا قدروا يزودوا الضغط الداخلي اللى بيقدر يتحمله الموتور
وبكده بدأو يرفعوا الوقت او الضغط اللى بيبدأ الموتور فيه بإشعال البنزين
وبما أن البنزين تمانين هيشتعل قبل ما يوصل لأعلى ضغط للماكينة ففي حلين
1- إما إنهم يشعلوا البنزين كهربيا قبل الوصول لآعلى ضغط
وطبعا كده هيكون الموتور مش شغال بأقصى جودته وكأن ما فيش تطور حصل فيه
3- والشئ التاني إنهم يشعلوا البنزين على ضغط أعلى وطبعا في الحالة دي لازم يغيروا من مواصفات البنزين وده بيتم برفع رقم الأوكتان وده بيكون في بنزين تسعين والأكثر من كده
طبعا لو موتورك قديم بمعنى إنه بيستحمل ضغط أقل من الحديث ومصمم بحيث يقوم بإشعال البنزين عند ضغط أقل من الحديث فمش هيفرق لو وضعتله بنزين تمانين او تسعين لآنه في كلتا الحالتين هيشتعل عند ضغط منخفض وهيكون الثمانين في الحالة دي سعره أرخص وبيؤدي نفس النتيجة
أما في حالة المواتير الحديثه فبالطبع لو البنزين تمانين يبقى هيشتعل قبل ما يعطي أكبر ضغط له وبكده هتكون كفائةالأداء أقل ومحتاج تغير في كهربة الإشعال بحيث يشعل البنزين قبل الوصول لضغط الموتور القياسي وممكن يكون الموتور مصمم بحيث يتحمل ضغط عالي لكن لا يتحمل حرارة كما في الموتاير القديمة وبكده هيتأثر بشدة حرارة الإحتراق وعمره الافتراضي هيقل وخصوصا البستم
وكمان لما تستخدمله بنزين ثمانين مش هتستفيد في الحالة دي من تطور الموتور وأعتقد هيكون الاستهلاك أكثر
لكن أكتر بكام في المئة لا أدري
أماالغاز الطبيعي له خواص بتأثر على عمر الموتور وأنا مش خبير فيها لكن أقدر أقولك إن من المشكل دي عدم وجود كربون في الغاز الطبيعي بنفس الكمية الموجودة في البنزين
الغاز الطبيعي ch4
يعني مع عملية الأكسدة أو بيسموها الإحتراق وهي اتحاد جزيئات الغاز مع الأكسجين
هينتج عن كده
جزئ ثاني أكسيد الكربون واحد co2
وجزيئين ماء في صورة بخار ماء h2o
وفي حالة الإحتراق الجيد مش هينتج كربون مترسب على السطح الداخلي للموتور
والكربون المترسب في حالة البنزين بيعمل كأنه طبقة حماية رقيقة تحمي أجزاء الماكينة أو الموتور من الداخل من آثار عملية الإحتراق
لكن في حالة الغاز الطبيعي هذه الطبقة مش بتتكون
وعلشان كده في البداية بتشغل الموتور على البنزين علشان يرسب شوية كربون قبل ما تبدأ عملية إحتراق الغاز الطبيعي
لكن طبعا طبقة الكربون اللى بتعملها بشوية البنزين اللى في البداية مش هتكون كبيرة أو متجددة زي اللى بتتكون في حالة استخدام بنزين فقط طول مدة التشغيل
ده ملخص بسيط لفكرة المشكلة في حالة استخدام بنزين تمانين أو غاز طبيعي
وأرجو أن أكون أفدتكم
ورمضان كريم
مرسى جدا على ردك بس كلامك صح 100% بس انا بتكلم على عربيات جديده زى الانوس 2 والاكنست الى فيها فيشه اوكتان ومش بتكلم على اساس انى ماعملتش الحوار دا بايدى فيهم لا دا انا عملت الحوار دا فى اللانوس بايدى وبنفسى وماسمعتش حاجه من حد دا بايدى انا وكانت النتيجه ممتازه ولا تاثير فى السحب ولا اقل كركره ولا استهلاك بنزين
على العموم متشكر جدا على تعبكم معايا انا هدور على الحوار دا بنفسى انا لانى متاكد انه فى كل العربيات
اشطه يلا سلام
بس أنا من أنصار ان لما نقول للناس معلومة تكون ملومة أكيدة و على أساس علمي و موثق علشان الناس ماتتناقلش معلومات خاطئة و ننهار بمستوانا الفكري و بالتالي المادي لأان مش كلنا عارفين كل حاجة
انت بس يا معلم زعلت مني على الفاضي و ولاد الحلال تدخلوا بالخير و الحمد لله
المهم انت المفروض لما تيجي تعرض موضوع تقبله صعب بالنسبة للناس علشان الناس مش عارفه فانت لازم تنقل تجربتك للناس أولا ثم تسأل سؤالك أو تعرض فكرتك..
يعني في مشاركة لطيفة جدا بخصوص ان العربية تشتغل بالميه على انها حاجة مش هاتحصل و اعدت أضحك أوي علشان أنا فعلا شغال في الموضوع ده و مش عايز أقول لحد عليه غير لما أخلصه و أجربه...
بس على فكره الى عنده عربيه لانوس وعايز يحولها يقولى علشان يصدق انى بتكلم بجد وعلى اساس علمى وعملى كمان مش اى هرت :) وانا اساسا الحمدلله معايا الى يشيلنى 10 عربيات ماتركس يعنى تولع مصاريف البنزين ماتهمنيش بس الحوار انى عايز اخدم صاحبى الى معاه الماتركس
بالمناسبه عربيتى اساسا دايو لانوس وماشيه 80 اخر حلاوه وعندى دلوقتى تويوتا ياريس وان شاء الله هحولها بس كمان شويه لما ازهق منها :)
يا استاذ عاصم حضرتك قلت ان موضوع الفيشه ده كمان موجود فى الاكسنت القديمة طيب انا معايا فرنا فيفا وهيا فيها نفس موتور الاكسنت القديم بالزبط ممكن حضرتك تفيدنى فى الموضوع ده او تورينى صوره للفيشه عشان اعدلها واكون شاكر لحضرتك
وعلى فكره يا جماعه فعلا موضوع الفيشه ده حقيقى وصح ميه فى الميه وموجود فى عربيات كتير زى اللانوس يعنى مش كلام بس فعلا بس انا اول مره اسمع انه فى الاكسنت القديمه كمان
تمام انك مصدقنى :) بس اقولك انا شوفت موضوع ليها طريقه تحويلها فى الاكسنت هقولك حاجه ادخل منتدى الدايو الى هنا ودور على تحويل فيشه الاوكتان هتلاقى الراجل اى عاملها عاملها للاكسنت اساسا وبعديها انا دورت عليها وجبتها من الانوس برضو نفس الشكل هيا فى الانوس تحت كرسى الراكب اليمين الى جنب السواق وعامله زى الجامبر كدا تقريبا فى الاكسنت جنت ecu دور عليها بس اتاكد الاول من منتدى الدايو على مكانها فين وهيا سهله مش معقده خالص ماتقلقش
تمام ياباشا هفك الكرسى اليمين والفرش وابص عليها
الف شكر
مجهود رائع بس لو الموضوع علي اد الفيشة وبس يبقي زي الفل بس يا ريت ميكونش لية عواقب وخيمة اخري علي الماتور فهل انتا بقالك فترة كبيرة علي البنزين 80 دة في الانوس
ممكن تصورلنا الفيشه دى لو سمحت
حضرتك درست كيمياء في ثانوي و لا لأ؟
الاوكتان رابع اكسيد الرصاص؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟
لا بجد دي جديدة
حضرتك الاوكتان ch3(ch2)6ch3.
او c8h18
و ده احد مركبات الألكان و اوكتا باللاتيني يعني تمانيه عشان هو عبارة عن 8 ذرات كربون
و اما البنزين يبقى 92 اوكتان يعني 92% منه اوكتان و 8% حاجات تانية (غالبا هيبتان c7h16)
بالاضافة ان البنزين في مصر خالي من الرصاص بقاله حوالي 10 سنين
يا جماعة بجد ......... اللي يكتب حاجة يتأكد منها ارجوكم
طيب ممكن تقولي الفيشه دي فين للنوبيرا
انا عاوز أسالكم سؤال طيب يا جماعه انا معايا عربية ماتركس جديدة و مكتوب فى الكتالوج ان افول بنزين اوكتان 91
هل فى الحاله ديه ينفع أفولها 90 و لا لازم 92
و لو حطين 90 ايه الاضرار المتوقعه
شكرا
السلام عليكم
انا وجهة نظرى انا التجربة خير دليل
اولا) انا معاي شاهين 1400
ثانيا)كنت بحط بنزين 90 من سنة 2001 حتى تقريبا لما البنزين غلى اول مرة يعنى تقريبا فى 2006
كانت العربية بتصقف كتير غيرت كذا بنزينة مفيش فايدة (يمكنة تكون الكهرباء ماكنتش مظبوطة) المهم قلت اجرب وحط بنزين 92
الاختلاف
1)صوت التسقيف اختفي.
2)تسارع العربية باحسن.
3)المهم اختلاف معدل استهلاك الوقود
ازاي يعني مثلا اللتر فى 90 كان بيعمل 220تقريبا 16 لتر.
فى 92 كان بيعمل فى 220 تقريبا 13 لتر
اسف على الاطالة بس انا حبيت انقل تجربتي ليكو (انا عارف ان فى ناس هاتقول دي شاهين لو حطيت ..... حتمشي بس بردة حبيت اقول)
وشكرا
عن تجربه بنزين 80 ماينفعش
ياجماعة الموضوع لازم يكمل لان حيحل ازمة لناس كثير
انا معايا اكسنت 98 وبحطلها بنزين 92 ؟؟؟
معلش يا جماعه على التاخير فى الرد حيث انى لقيت هجوم كتير عليا هنا انا معلش والله لو لقيت حد بيعارض كلامى الى انا مش بقوله من فراغ انا ببقى مجرب بايدى وبقياسات كمان زى الهاى اسكان الى شاريه ب 5000 جنيه مش هقول اى حاجه مفيده ليكوا واحتفظ بيها ليا انا وخلاص
وبالنسبه للاخ احمد كمال لو هوا مزاكر الثانويه العامه خليها تنفعك فى حاجه اسمها ماده احتراق داخلى دى بدرسها فى كليه هندسه قسم ميكانيكا باور
ياجماعه البنزين 80 زى ال 100 فى التركيب الكيميائى بس بيتضاف عليه ماده الى هيا بتزود نسبه الاوكتين ودى مسئوله عن انها بتمنع الاحتراق المبكر للوقود عن معاد احتراقه ( بتمنع الاحتراق الزاتى المبكر الى بتسمعها على هيئه كركره )
وبالنسبه ل amrdat الفرق دا بيبقى بسبب رجلك انتا لازم تظبط رجلك مع الدبرياج والماتور مع بعض علشان تمنع الكركره وماتقرصش عليها علشان ماتعملش الاشعال المبكر للوقود دا وصدقنى لو رجلك حلوه هتلاقيها فروق بسيطه خالص ممكن نص لتر مع المسافه الى بتعملها دى
الحوار دا متجرب فى الدايو وزى ماقولتلكم الفيشه تحت الكرسى اليمين والى جرب يقول للناس انه شافها وجرب بس لو معلش بقى انا انا هدور على طريقه لتحويل الماتركس ولقيت بتاع الياريس كمان خلوا الى بيردوا ردود مش كويسه بقى يفيدوكوا
الحمد لله هي نفعتني كتير
و مع احترامي للمادة و اللي بيدرسها لك و لحضرتك الأوكتين مش رابع أكسيد الرصاص
Octane - Wikipedia, the free encyclopedia
و ده كلام علمي ...... و اللينك بتاع ويكيبيديا أهوه
و لو دكتور في هندسة قال ان الاوكتين هو رابع اكسيد الرصاص يبقى مع احترامي ما بيفهمش و ما يستاهلش يبقى صنايعي حتى
الجزئية دي نصها صح و نصها غلط
بنزين 80 يعني 80% منه أوكتين و 20% مواد اخرى (هيبتين و اضافات اخرى)
بنزين 90 يعني 90% أوكتين
و هكذا
و كل ما الاوكتين يزيد الاحتراق الذاتي المبكر بيقل (ده الجزء الصح في كلامك)
الاحتراق المبكر مالوش ادتى علاقة برجلك و الدبرياج و البنزين ......... الاحتراق المبكر سببه ان البنزين رقمه الاوكتيني اقل من الرقم المناسب لمعامل الانضغاط Compression Ratio بتاع المحرك ..... فالمحرك في شوط الضغط (الشوط التاني من اشواط المحرك) بيضغط البنزين مثلا بنسبة 11.5 إلى 1 و لو البنزين مثلا 80 هيفرقع قبل ما المحرك يضغطه للاخر لانه مش هيستحمل الضغط و ده اللي هيعمل الكركرة
اول مرة بقى اعرف ان فيه علاقة بين ضغطة رجلي عالبنزين و ضغطة البستم على خليط الهوا و البنزين !!!!!!!!!!!!!!!!!!!!!!!!!!!!!!!!! بجد جديدة !!!!!!!!!!!!!!!!!!!!
ماشي لو فيه فيشة يبقى معنى كده ان الموتور هيقدم معاد الشرارة (مش هيضغط البنزين للاخر) و ده بيمنع الضرر عن الموتور بس بيهدر بنزين و بيدي اداء اقل بكتير ......
شكرا على ذوقك و اسلوبك اللذي يدل على مستوى نضجك العالي
بصراحة اول مرة اعرف ان البترول في مصر بقى خالي من الرصاص!!!!
الرصاص بال e
يعنى lead
ورمزه الكيميائى pb
وده التركيب الكميائى للسلسله الهيدروكربونيه للأوكتان
Octane is a straight-chain alkane with the chemical formula CH3(CH2)6CH3.
من خلال موسوعة المعلومات المجانيه اللى محول اللينك بتاعها
أخونا الفاضل : الأستاذ / أحمد كمال
وكلها (التركيب الكيميائى لسلسلة الأوكتان الكيميائيه )
عباره عن زرات كربون وزرات هيدروجين بنسب معينه
يبقى كده واضحه أن الأكتان مش رابع أكسيد الرصاص
وباينه بالبلدى أهو من خلال تركيب حروف زرات مركب الأكتان التى لاتحتوى على الحروف pb
يبقى على رأى أبله نظيره لما قالت
القطنه مبتكدبش
يعنى الأمور واضحه جدا
وبعدين البنزين (كمركب عطرى ) خالى من الرصاص عندنا من زمان
لأن الرصاص ماده سامه وضاره باليئه
على الرغم أن وجوده كان مفيد فعلا فى أطالة عمر صبابات المحرك
وعدم الحاجه لعمل روديه للمكنه بنسبه كبيره
لأنه كان بيفيد فى عمل تطبيع للصبابات على قواعدها برأس السلندر
أثناء حركة الصبابات التردديه فى شوطى النزول والطلوع للصبابات
مع خبطات كامات عمود الكامه (أثناء أشواط المحرك الأربعه الخاصه بدورة حريق المحرك)
على قمم سيقان الصبابات من أعلى
خالص تحياتى
وياريت نتمسك بروح الهدوء أثناء تناول أى مشكله فنيه
ومش عيب أن نتمتع بسياسة الرأى والرأى الآخر
لأن مفيش حد عارف كل حاجه
ولو أستفدنا من بعضنا بدون تعصب
فبلاشك سننمى أنفسنا
لو بكلام سيادتك كدا يبقى بمجرد اننا نحط بنزين 80 العربيه هتكركر بمجرد ما تدورها تقعد تكركر تكركر
اشمعنى بقى لما نحمل عليها يعنى تعشق كدا زى الشاطر وتنقل اول وتانى وتحمل على المكنه تكركر فهمنى بقى ايه الفرق
بكلامك دا يبقى مفروض تكركر اول ما نحط ال 80 على طوووول وبمجرد تشغيلها مش بمجرد التحميل عليها
طيب هنقول العربيه مش هتكركر على السلانسيه او على عدم التحميل عليها انتا بقى تقدر برجلك كدا الحنينه على البنزين والدبرياج انك تخلى الماتور ماتيحملش عليه اوى يعنى تخلى فى فرق بسيط بينه وبين السلانسيه فى الحمل دا قصدى وعن تجربه فى الدايو وعلى فكره الدايو لما حطيتلها 80 ما اتغيرتش الاستهلاك البنزين ولا اتغير السحب خالص وكنت بسافر بيها مسافات طويله جدا عادى خالص بص يا ريس من الاخر خالص هات دايو لانوس كدا واعمل حوار الفيشه دى وتعالى قولى انتا حمار مش بتفهم او فى كليه بطيخ :)
او اقولك حاجه ادخل كدا على قسم الانوس وشوف الناس الى حولت 80 وتجاربهم مع ال 80 فى الانوس لو لقيت واحد بيشتكى منها قولى يمكن مابعرفش اقرا :)
الاحتراق المبكر مالوش ادتى علاقة برجلك و الدبرياج و البنزين ......... الاحتراق المبكر سببه ان البنزين رقمه الاوكتيني اقل من الرقم المناسب لمعامل الانضغاط Compression Ratio بتاع المحرك ..... فالمحرك في شوط الضغط (الشوط التاني من اشواط المحرك) بيضغط البنزين مثلا بنسبة 11.5 إلى 1 و لو البنزين مثلا 80 هيفرقع قبل ما المحرك يضغطه للاخر لانه مش هيستحمل الضغط و ده اللي هيعمل الكركرة
اول مرة بقى اعرف ان فيه علاقة بين ضغطة رجلي عالبنزين و ضغطة البستم على خليط الهوا و البنزين !!!!!!!!!!!!!!!!!!!!!!!!!!!!!!!!! بجد جديدة !!!!!!!!!!!!!!!!!!!!
بجد انتا بقى اقرا او افتح كتاب اسمه ثرمودينامك لان كدا بجد غلط انك تعارض بكلام غلط ماشى انا محترم فيك تصميمك انك تطلعنى غلطان بس انا هثبتلك برضو ان كلامك فى غلط
ال compression ratio : دا نسبه الانضغاط وبيعرف انه حجم الاسطوانه عندما تكون عند النقطه الميته العظمى مقسومه على حجم الاسطوانه عند النقطه الميته الصغرى
يعنى من الاخر مافيش اى علاقه بين ال compression ratio والاوكتان خالص
بكلامك دا المفروض ان المحرك يكركر عند السلانسيه او عند تشغيله لو حطينا 80 مش عند الحمل زى مابيحصل :)
انا قلت الفيشة فعلا مش هتضر الموتور
بس هتقلل الاداء
انتا لقيت الفيشه فى الماتركس يا باشا ؟اقتباس:
الى هيحس بالاداء دا يبقى بقى محترف بجد بجد لان انا قارنت بين بنزين 92 فى السحب على الرابع وبين ال 80 فى السحب على الرابع برضو بالانوس وبدون اى كركره ودوسه اخر البنزين لقيت مافيش فرق خالص
مهو فعلا بيحصل اشتعال مبكر (detonation) و العربيه على السلانسيه.... بس الصوت بيكون مختفي و غير مسموع لغايه ما تبتدي تحمل على الموتور.اقتباس:
بكلامك دا المفروض ان المحرك يكركر عند السلانسيه او عند تشغيله لو حطينا 80 مش عند الحمل زى مابيحصل
وجود فيشه في الانوس حقيقه و هيه بتغير توقيت الاشتعال لتناسب البنزين اللي اوكتانه اقل.
بالنسبه للماتريكس انا اعرف واحد مهندس زميلي في الشغل معاه ماتريكس موديل ٢٠٠٥ او ٢٠٠٦ مش متأكد و العربيه مانيوال و مشغلها ببنزين ٨٠ من يوم ما اشتراها و حسب كلامه هوه بس بيحتاج يشبع الغيارات. و حاليا باع العربيه لمهندس تاني زميلنا بردو و ماشي على نفس النظام (هما معملوش اي تعديل)
يا نهار اسود!! حضرتم متأكد ان اللي بتقوله ده مكتوب في كتب كلية هندسه؟!!!اقتباس:
يعنى من الاخر مافيش اى علاقه بين ال compression ratio والاوكتان خالص
ازاي يعني نسبة الانضغاط ملهاش دعوه برقم الاوكتان؟!! طبعا العلاقه بينهم وطيده جدا و هيه علاقه طرديه... يعني كل ما تزيد نسبة الانضغاط يزيد رقم الاوكتان المطلوب لتشغيل الموتور.
اسمحوا لى اتدخل فى موضوع البنزين والأوكتان، بالمناسبة انا مهندس ميكانيكا باور زى حالاتكم ودارس احتراق فى الكلية
اولا: بنزين السيارات(سنسميه لاحقا وقود السيارات تميزا له عن مركب البنزين) ليس مكونا فقط من البنزين الحلقى اللى هو C6H6 وانما هو مكون من مخلوط من عدة مركبات، بنزين السيارات اصلا لا يطلق عليه بنزين سوى فى الدول الناطقة باللغة العربية، فى انجلترا يسمونه بترول وفى امريكا يسمونه جاس وفى إيطاليا يسمونه جاسولين، وهو مكون من مجموعة من الهيدروكاربونات الأليفاتية CnH2n+2 مثل الهكسان C6H14 والهبتان C7H16وأيزو اوكتان C8H18 مع مجموعة مركبات حلقية مركبات حلقية مثل البنزين C6H6 ,والطولوين C6H5CH3 ، واحيان يضاف له الكحول او اكاسيد الرصاص لتحسين خواصه الأدائية كما سأوضح لاحقا
اما البنزين الحلقى C6H6 فى صورته المفردة فلا يستخدم كوقود للسيارات وانما يستخدم كمذيب ومنظف ويدخل كمادة وسيطة فى انتاج العديد من المركبات العضوية الشهيرة مثل الطولوين والنفاتالين والبنزوات...الخ
ثانيا: بالنسبة لرقم الأوكتان
تعريف رقم الأوكتان لوقود السيارات: هناك خطأ شائع لدى كثير من الناس هو ان رقم الأوكتان لوقود ما معناه نسبة مركب الاوكتان فى هذا الوقود،الصحيح هو ان رقم الأوكتان لوقود ما هو رقم معيارى يمثل مقارنة اداء هذا الوقود بوقود عيارى آخر مكون من الهبتان والايزو اوكتان ولا يمثل نسبة اى مكون من مكونات الوقود محل الاختبار، ولذلك فهو يسمى "رقم الأوكتان المكافئ"equivalent octane number لأنه لا يعبر عن نسبة اوكتان فعلية داخل الوقود وانما يعبر عن اداء الوقود مقارنة بوقود مكافئ مكون من خليط يشتمل علىالأيزو اكتان
معناه ايه الكلام ده: معناه ببساطة انه لدى بعض المعامل محركات اختبارية، يقوم بتشغيلها فى البداية باستخدام الوقود الذى نرغب فى اختباره، ايا كانت مكونات هذا الوقود، ويقوم بتثبيت كل عوامل التشغيل ثم يقوم بتغير عامل واحد، وليكن درجة تحميل المحرك والتى يتم تغييرها باستخدام فرملة هيدروليكية مثلا مثل حتى يبدأ المحرك فى الصفع(التسقيف) وهنا يتم قياس درجة التحميل التى وصل الى اليها المحرك عند بداية التسقيف بأى اسلوب قياس (الضغط او درجة فتحة الفرملة...الخ) ، ثم يتم اعادة تشغيل المحرك باستخدام مخلوط قياسى من الهبتان والأيزو اوكتان، ويتم تغير نسبة المكونين فىالمخلوط فى كل مرة حتى نصل الى مخلوط يجعل المحرك يبدأ فى التسقيف عند نفس الحمل مع تثبيت كل العوامل الأخرى، وهنا يكون هذا المخلوط مكافئا فى ادائه (فيما يتعلق بالتسقيف فقط) للوقود الذى تم اختباره، فلو كان المخلوط المكافئ مكون من 80% أيزو اوكتان و 20% هبتان هنا نقول ان الوقود الذى اختبرناه رقم الأوكتان له 80 ، حتى ولو كانت نسبة الأوكتان الفعلية فى هذا الوقةد لا تزيد عن 40% ، لأن هناك كثير من الاضافات التى تحسن رقم الأوكتان للوقود دون ان يحتوى على اوكتان فعلا، هدف هذة الاضافات هو رفع درجة الحرارة التى يشتعل عندها الوقود ذاتيا وبالتالى يمتنع الوقود عن الاشتعال ذاتيا داخل المحرك قبل الموعد الفعلى لحدوث الشرارة وبالتالى تقل ظاهرة الصفع، اشهر هذة الأضافات هى الإيثانول (الكحول الإيثيلى) و أكاسيد الرصاص، تجدر الاشارة هنا الى ان اكاسيد الرصاص مركبات غير عضوية مكونة من الرصاص والأكسجين ولا علاقة لها بتركيب الأوكتان المكون من كبرون وهيدروجين، لكن اضافتها للبنزين يؤدى الى رفع درجة حرارة اشتعاله الذاتى وبالتالى تحسين رقم الأوكتان المكافئ له، عموما فان استخدام اكاسيد الرصاص مع وقود السيارات قد تم منعه من معظم دول العالم بسبب سمية اكاسيد الرصاص والتى تؤدى الى اصابة الأطفال خاصة بالتخلف العقلى، (يقال ان احد اسباب التصرفات المجنونة لاباطرة روما القديمة مثل نيرون وكاليجولا أنهم كانوا يتناولوان طعامهم فى آنية من الرصاص)
ثالثا : هناك بعض الشوائب التى تؤثر على اداء الوقود وتسبب تدهور رقم الأوكتان له مثل الماء ، والمركبات الكربونية الثقيلة مثل الديزل (جاز السيارات) ، وهى كلها مواد قد يتعرض الوقود للاختلاط بها سواء فى مراحل الانتاج او فى مراحل النقل او البيع فى المحطات، خاصة لو كان وقودا يفتقر الى العناية فى الانتاج والبيع مثل البنزبن 80 نظرا لرخص سعره، وبالتالى فان الابنزين 80 فضلا عن كونه منخفض فى رقم الأوكتان المكافئ فهو لا يلقى العناية الكافية فى النتاج والبيع مما قد يؤدى الى مزيد من التدهور فى خواصه، ناهيك طبعا عن وجود الشوائب الصلبة والتى ستسارع فى اتلاف المسارات الدقيقة للوقود مثل الرشاشات فى السيارات الحديثة او البيكات فى السيارات الأقدم
لعل الصورة كدة تكون وضحت واتمنى ان ينفض هذا الاشتباك على خير، ويبقى لى ان اذكر اصدقائى ان الاختلاف للرأى لا يجب ان يفسد للود قضية وسواء كان الأوكتان مكون من اكسيد الرصاص او هيدروكسيد التين الشوكى فلا يجب ان يؤدى هذا الى ان نخسر الاسلوب الراقى فى الاختلاف فى الرأى
دمتم بخير جميعا
اعتقد مفيش كلام يتقال بعد الكلام دة
--------------------------------------------------------------------
هزود بس حاجة صغيرة بالنسبة لموضوع الفيشة والكلام دة
- اولا تقديم وتأخير الشرارة فى المحركات الحديثة بيتم بطريقتين : حساس الصفع knock sensor ودة بيدى اشارة للكمبيوتر يعدل توقيت الشرارة اوتوماتيك فى حالة حدوث تسقيف والتاينة هى الفيشة وبيتم تعديلها مانيوال وبالتالى مش شرط وجودها فى كل العربيات
- ثانيا : بالنسبة لموضوع ان مفيش علاقة بين نسبة الانضغاط ورقم الاوكتان فامعلش الكلام دة مش مظبوط
* نسبة الانضغاط هى نسبة حجم الاسطوانة قبل شوط الانضغاط وحجمها بعد شوط الانضغاط
وبالتالى مع ثبوت قطر الاسطوانة هيفرق فى مشوار المكبس داخل الاسطوانة , كل لما مشوال الانضغاط هيزيد هيسمح بانضغاط اكبر للخليط وهيسمح باستفادة اكبر من المحتوى الحرارى للوقود فى مشوار التمدد نظرا لزيادة ال stroke بتاع المكبس وبالتالى زيادة القدرة المستفادة من المحرك
معنى كدة انى محتاج وقود بمواصفات معينة لتحمل نسبة الانضغاط الاعلى ومقاومة الاشتعال الذاتى لاعطاء الشرارة فى الوقت المناسب بواسطة البوجية
*معروف انة بزيادة رقم الاوكتان بيزيد مقاومة البنزين للاشتعال الذاتى وبالتالى كل لما اعلى نسبة الانضغاط محتاج رقم اوكتان اعلى لمقاومة الاشتعال الذاتى وتقليل زمن انتشار الحريق flame propagation وبالتالى كفاءة حريق اعلى
- طيب اية اللى هيحصل لو حطيت اوكتان اقل فى محرك نسبة انضغاطة اعلى؟؟
اولا فى احتمالين:
1- احط اوكتان اقل مع ثبوت توقيت الشرارة
فى الوقت دة هيحدث اشتعال ذاتى للوقود اثناء صعود المكبس لأعلى وقبل حدوث الشرارة من البوجية وهيبدأ الخليط فى التمدد اثناء حركة المكبس لأعلى لضغطة ودة سبب حدوث الصفع او التسقيف اللى بنسمعة حركتين مضادين لبعض وعكس بعض فى نفس الوقت وبالتالى احمال زيادة على اجزاء الموتور الداخلية وليها تأثير على المحرك وممكن تؤدى لكسر دراع البيلات connecting rod وبالتالى انهيار شوط التمدد وفقد كبير فى قدرة المحرك
2- تانى احتمال وهو تقديم توقيت الشرارة لتفادى التسقيف
والحل دة اللى الناس بتعملة بتغيير الفيشة (طبعا التقديم بنسب مش مطلق ) .. نتخيل كدة حركة المكبس لأعلى بدل ماكانت شرارة البوجية بتحصل قبل النقطة الميتة العليا top dead center مباشرة حصلت وليكن فى بداية الربع الاخير من نهاية المشوار معنى كدة ان عملية التمدد هيضيع منها جزء فى نهاية الربع اللى باقى بتاع مشوار الانضغاط وباقى التمدد هيحصل فى شوط التمدد .. معنى كدة اننا فقدنا جزء من القدرة المستفادة فى المحرك بدون فائدة
معنى كدة ان العلاقة طردية بين نسبة الانضغاط ورقك الاوكتان للحصول على اعلى اداء من المحرك
يبقى مينفعش ان بنزين 80 زى 90 زى 100 ومفيش فرق فى الاداء بينهم واللا كانت شركات السيارات بتهرج والعالم كلة عايش فى اوهام
بالمناسبة انا معايا فكترا ولانوس والاتنين فيهم الفيشة
الفكترا كانت الفيشة على 87 وبحط 90 مفيش مشكلة وبعدين حطيت 92 طبعا الاداء اتحسن بصورة بسيطة .. بعدها قلبت الفيشة على 91 وفضلت على ال 92 الاداء اختلف بصورة ملحوظة عن الاول
اللانوس حطيتلها 92 من غير ماغير حاجة فى الفيشة , النهاردة لو اتضريت احط 90 بيبقى فى فرق واضح فى الاداء بالرغم من ان الفيشة على الوضع القديم فما بالك ب 80 حتى لو غيرت الفيشة