حد عايز يعرف او يتعلم يتفرج على فورميلا 1 ؟؟

**Ahmed Nouh** · 09-09-2009 05:56 AM

المشاركة الأصلية كتبت بواسطة أبو حمزة

فكرة أكثر من رائعة تُشكر عليها يا أستاذ أحمد
متابع باهتمام

العفو يا ابو حمزه وربنا يقدرنى على الافاده

شكرا لمشاركتك

المشاركة الأصلية كتبت بواسطة terrible_darsh

موضوع رائع , الف شكر .

و لكن انا شكل عربيات الفورميلا دى مبيعجبنيش خالص و بيكرهني فى الفرجة على السباقات .

دلوقتى بتابع سباقات الموتوسيكلات على طول , فيها اثارة و مهارة اكتر ...

و لو حضرتك بتابع هتعرف انا بحب مين من الرقم دا (46) !

بس ليا سؤال صغير كده .

هو ليه مارلبورو و فودافون على طول الراعي الرسمي كده بشوفهم على طول من زمااااااان راعي رسمي مفيش غيرهم و بريدجيستون كمان !!

العفو يا درش , بص هو شكل العربيه مش معمول علشان يكون عاطفى بس لو عرفت فعلا الوظيفه بتاعت التصميم ده هتعرف انه عبقرى وهتحبه لمجرد قدرته على تثبيت عربيه الفورميلا على الارض فى المنعطفات

على فكره عربيه الفورميلا هايفه اوى بالنسبه للهواء والسرعات اللى بتمشى عليها لان وزنها بالسواق 600 كجم فكل الثبات ده جاى من التصميم , لدرجه ان فى نظريه بتقول من قوه دفع الهواء لجسم عربيه الفورميلا 1 للأسفل العربيه دى تقدر تمشى على الحيط على سرعه 250 كم فى الساعه

يعنى بفضل تصميمها اللى بيخلى الهواء يدفعها كلها للألتصاق بالسطح اللى ماشيه عليه تقدر تمشى على الحيط من غير ما تقع :)

بخصوص الدعايا فى شركات بتبقى شريك رئيسى فى الفريق ده زى مارلبورو وفودافون وفى شركات بتعمل اعلانات بس زى اى اعلان بتشوفه على العربيات , الشريك ده بيصرف على الفريق وليه ميزانيه بتدفع كل سنه فى سبيل انه ياخد اماكن مميزه اوى للدعايا على العربيه زى وش العربيه والاسبويلر وخلافه وفى شركات تانيه بس بتشترى اعلان على العربيه وكل مكان فى العربيه ليه ثمن على فكره , الشراكه هتشوف شركات عالميه بس هى اللى داخله فيها علشان بيدفع فيها ملايين ويكفى انى اقولك ان مصروفات فريق ماكلارين مرسيدس الموسم اللى فات وصلت ل 285 مليون يورو

بريدجستون اعلانها على كل عربيه اجبارى علشان هى اللى بتمد الفرق بالاطارات وهى الوحيده دلوقتى , طبعا الفرق بتدفع فلوس على الكاوتشات دى لكن بيتم تخفيض جزء منها فى مقابل الاعلان , نفس الكلام هتلاقى كل فريق بياخد الوقود بتاعه من شركه محدده وحاطط اعلانها على العربيه زى فيرارى بتاخد من شيل وماكلارين بتاخد من موبيل

على فكره انا متابع الموتسيكلات خالص بس على ما اتذكر ان ده الدكتور مش كدا ؟ اصل بقاله فتره هيموت ويروح الفورميلا 1 وحاليا فى كلام انه هيسوق لفيرارى فى اخر سباق السنه دى فى ابو ظبى الا انه ياماها مش راضيين وبيقولو ان ده لا يتناسب مع تدريباته للموسم الجديد او فى اختبارات مش فاكر

المشاركة الأصلية كتبت بواسطة s m a r t m a n

موضوع رائع جداً
متابع وفي انتظار البدايه
الارقام بتاع التسارع والفرمله والمنحنيات تخض بصراحه !!
طب سؤال سريع :
لو عندي طريقين أقلل وزن العربيه ولا ازود الhp اختار مين؟؟

شكرا على مشاركتك يا استاذ احمد , وفعلا ارقام الاداء هى اكتر حاجه تشد فى الفورميلا

بالنسبه للسؤال , قوه اكتر هتحسن التسارع والسرعه القصوى انما وزن اقل هيحسن التسارع والسرعه القصوى والفرمله والهاندلنج , يعنى بكل المقاييس كل ما قل الوزن كان تحسن فى كل جوانب الاداء

**Ahmed Samy** · 09-09-2009 06:27 AM

أخيرا !!!!!!!!!

شوف بقى يا مستر أحمد

انا عايزك ترسينا على الدور واحدة واحدة

يعني بلاش تاخدنا في الغويط على طول

انت تدينا كلاس في الفكرة عموما

و كلاس عن المجريات الحالية لأني مش عارف أبدأ أتابع منين أساسا يعني مين اللي خد الدوري السنة اللي فاتت ...مين لو لعب بكرة يدخل دور التمانية كده يعني

و بعدين كلاس في العيال السواقين بقى

من أحسن واحد و مين اللي بعده و مين ساب فريق ايه و ليه و هايتعاقد مع مين و طبعا هاندخل في الفرق الكبيرة

و بعد كل كلاس تعملنا كويز صغير كده

و تقلنا نتابع فين و على قناة ايه

انا عارف انه كتير بس انت اللي دبست نفسك

و أنا لازم أفهم

ده مستقبل الواد

ووعد ....لو الواد مسح قزاز عربية بس في الفورميولا ....هاخليه يحط صورتك على قفا الخوذة

مرضي يا عم

بس ادعيله ربنا يكرمه و يشتغل معاهم اي حاجة انشا الله سواق

**Ahmed Nouh** · 09-09-2009 07:21 AM

المشاركة الأصلية كتبت بواسطة ahmed samy

أخيرا !!!!!!!!!

شوف بقى يا مستر أحمد

انا عايزك ترسينا على الدور واحدة واحدة

يعني بلاش تاخدنا في الغويط على طول

انت تدينا كلاس في الفكرة عموما

و كلاس عن المجريات الحالية لأني مش عارف أبدأ أتابع منين أساسا يعني مين اللي خد الدوري السنة اللي فاتت ...مين لو لعب بكرة يدخل دور التمانية كده يعني :ka_che1[1]:

و بعدين كلاس في العيال السواقين بقى

من أحسن واحد و مين اللي بعده و مين ساب فريق ايه و ليه و هايتعاقد مع مين و طبعا هاندخل في الفرق الكبيرة

و بعد كل كلاس تعملنا كويز صغير كده

و تقلنا نتابع فين و على قناة ايه

انا عارف انه كتير بس انت اللي دبست نفسك

و أنا لازم أفهم

ده مستقبل الواد :oc_sun1[1]:

ووعد ....لو الواد مسح قزاز عربية بس في الفورميولا ....هاخليه يحط صورتك على قفا الخوذة

مرضي يا عم

بس ادعيله ربنا يكرمه و يشتغل معاهم اي حاجة انشا الله سواق

لالالالا كدا الموضوع كبر قوى قوى , طالما وصلنا لقفا الخوذه يبقى يتم التنفيذ فى الحال يا دكتور

يا باشا انت قريت الفكره , انا فعلا ده اللى كنت هعمله اجزاء منفصله كل جزء فيهم بيتكلم عن حاجه محدده ومش هنقل للجزء اللى بعده غير لما يكون الجزء ده خلاص انتهى كل الاسئله فيه

ان شاء الله هبدا خلال يومين بس انا لى سؤال بقى , الموضوع هيبقى اجزاء منفصله فى موضوع واحد مغلق ويكون فى موضوع تانى للنقاش والاسئله ولا اخلى كل جزئيه فى موضوع منفصل بكل اسئلته واجوبته وخلافه ؟

غالبا الفكره التانيه احسن بس رأيكم مهم علشان يبقى الموضوع اسهل فى الفهم حتى للناس اللى هتقراه بعد كدا , ان شاء الله الجزء الاول

مين الاتحاد الدولى لرياضه السيارات ( fia ) وايه سلطته على الفورميلا 1 ؟ وايه طبيعه الفرق اللى بتدخل الفورميلا 1 وهتستفاد ايه من دخولها ؟ وليه مش اى حد يقدر يلعب فى الفورميلا بفريق خاص بيه ؟ ويعنى ايه ميزانيه فريق والازمات الماديه بالنسبه للفرق ؟ ويعنى ايه فريق اتباع ؟ وبعدين الموسم بيتكون من ايه ؟ وايه طريقه حساب الفائزين فيه ؟ وايه اسلوب اللعب فى الفورميلا ؟

ان شاء الله خلال يومين

**Ahmed Samy** · 09-09-2009 07:37 AM

انت تعملها أجزاء زي ما قولت كده

و ممكن بعد كده نطلب من الإدارة تضمهم مثلا

المهم ان الجزء الأولاني يكون درس و مناقشة لحاااااااد أغبى واحد ما يقول أنا فهمت ههههههههههه

و بعدها ننقل على الكلاس اللي بعديه

أنا في انتظارك

SS · 09-09-2009 10:06 AM

المشاركة الأصلية كتبت بواسطة ahmed samy

المهم ان الجزء الأولاني يكون درس و مناقشة لحاااااااد أغبى واحد ما يقول أنا فهمت ههههههههههه

و بعدها ننقل على الكلاس اللي بعديه

تمام كده يا دكترة ...لحد ما اقول انا فهمت..

فى انتظار الموضوع يا استاذ احمد....انا بصراحة ماليش فى الموضوع خالص
بس بصراحة الدخلة بتاعتك شدتنى

**human** · 09-09-2009 10:43 AM

اللى اعرفه ان معظم العربيه من composite carbon و الفرامل من نفس الماده و بتستحمل احتكاك و حراره لغايه 1000 درجه

المواتير اللى بتجيب 22 الف لفه كانت ال v10 3.0 L
و ديه معديه ال 1000Hp و لما نزلوا عدد اللفات من موسم 2000 ل 18 الف لفه برضه كانت المكنه بتطلع 980Hp
فالاتحاد قرر ان المواتير تقل ل2.4L and v8

الكلاتش بيكون برضه كاربون كومبوسيت و يزن حوالى كيلوجرام و نصف قطره خمسه سم

اقصى سرعه كانت 369.9KM/h و كانت بسياره BMW
هوندا عندهم رقم غير رسمى ب 413KM/h

وزن السياره لا يتعدى 650KG بالسائق
بعض السيارات لا تصل حتى ل450KG حتى بوزن السائق و يمكن ان يضعوا سبائك بجسم العربيه و توزيعها للمساعده فى الثبات

**islambana** · 09-09-2009 10:47 AM

المشاركة الأصلية كتبت بواسطة ahmed0nouh

الموضوع كان كاتبه صديقى العزيز احمد الحداد وهو اللى عرفنى على عالم الفورميلا 1

احمد فعلا موسوعه فى الموضوع ده ومفوتش سباق من اكتر من 6 سنين , ان شاء الله اقدر اقدم موضوع بنفس تميزه

يمكن الموضوع مكانش عليه اقبال لانه بيشرح الفورميلا بأستفاضه قوى وده يشد اكتر اللى متابع وعايز يزود معلوماته لكن انا هحاول على قد ما اقدر ابدأ من العدم لاى حد عمره ما سمع عن الفورميلا وان شاء الله ربنا يوفق ويكون فى استفاده ودى اهم حاجه عندى

بنا يوفقك ياباشا ومنتظرين موضوعاتك

**Ahmed Nouh** · 09-09-2009 05:21 PM

المشاركة الأصلية كتبت بواسطة human12

اللى اعرفه ان معظم العربيه من composite carbon و الفرامل من نفس الماده و بتستحمل احتكاك و حراره لغايه 1000 درجه

المواتير اللى بتجيب 22 الف لفه كانت ال v10 3.0 L
و ديه معديه ال 1000Hp و لما نزلوا عدد اللفات من موسم 2000 ل 18 الف لفه برضه كانت المكنه بتطلع 980Hp
فالاتحاد قرر ان المواتير تقل ل2.4L and v8

الكلاتش بيكون برضه كاربون كومبوسيت و يزن حوالى كيلوجرام و نصف قطره خمسه سم

اقصى سرعه كانت 369.9KM/h و كانت بسياره BMW
هوندا عندهم رقم غير رسمى ب 413KM/h

وزن السياره لا يتعدى 650KG بالسائق
بعض السيارات لا تصل حتى ل450KG حتى بوزن السائق و يمكن ان يضعوا سبائك بجسم العربيه و توزيعها للمساعده فى الثبات

فعلا العربيه كلها كاربون بس انا معرفش الفرق بين الكاربون فايبر والكومبوست بصراحه لكن كل الفرق بتقوله كاربون فايبر اول مره اسمع كومبوست بس هو مش الماده الوحيده المستخدمه فى مناطق فى ال Safety Cage بتكون من مواد تانيه غير بعض الاجزاء فى الجسم نفسه بتكون خليط سبايك معينه بس علشان هو الماده الاكثر استخداما بيقولو انها كلها كاربون فايبر

فعلا المواتير ال V10 هى اللى كانت بتجيب ال 22 بس ال V8 السنه اللى فاتت كانت محدده عند 20 والسنه دى تم تخفيضها ل 18 علشان الموتور يقعد فتره اطول بعد تحديد عدد المواتير المستخدمه فى الموسم لكل فريق ب 8 بس

لكن ده مجرد تحديد الكترونى وفعليا الموتور يقدر يوصل لأكتر من كدا لو الاتحاد فتح تحديد سرعه المواتير

السرعات القصوى بالعربيه الحاليه لا تتعدى ال 360 وده بسبب الداون فورس , شيل كل الاجنحه وعربيه الفورميلا هتخبط ال 400 كم بكل ثقه بس افتكر انها هتطير بسبب خفه وزنها , وكان فى محاولات من فرق انهم يعملو ال SetUp على 0 دون فورس ويجربو العربيه على حلبه من بتوع الأندى كارز ويشوفو اخر السرعه ايه بس محدش جاله الجراءه يعملها علشان غالبا هتقلب بكارثه , عموما عى العربيه فعلا ضايعه فى السرعه القصوى بس ده لأن مش محتاجه اكتر من كدا والتركيز كله على الثبات فى المنعطفات والتسارع

بالفعل وزن العربيه أزمه بالنسبه للفرق وساعات بيتم حشوها زى ما قولت علشان توصل للوزن المظبوط بس الموسم الحالى حد الوزن 605 كجم فقط

**mada121977** · 09-09-2009 11:56 PM

شكرا للمعلومات والموضوع
وفيه معلومه اضافيه قد لا يعرفها الكثير من الاخوه الافاضل وهى ان سباقات الفورميلا يشترك فيها سائق مصرى وحيد وحقق فيها مراكز متقدمه وهو : احمد حماده

**Ahmed Nouh** · 10-09-2009 12:29 AM

المشاركة الأصلية كتبت بواسطة mada121977

شكرا للمعلومات والموضوع
وفيه معلومه اضافيه قد لا يعرفها الكثير من الاخوه الافاضل وهى ان سباقات الفورميلا يشترك فيها سائق مصرى وحيد وحقق فيها مراكز متقدمه وهو : احمد حماده

العفو يا استاذ احمد وشرفت الموضوع

بس على فكره معلومه احمد حماده دى نشرها وتبادلها مجموعه من الجهله العاملين فى الصحافه لان احمد حماده لم يتعدى حدود احد السباقات المحليه اللى بتنظمها بعض الشركات امثال bmw وفورد و رينو وعلى ما اتذكر هو كان البطوله بتاعته تبع bmw , مش متأكد بصراحه لانى مش متابع البطولات المحليه

العربيه اللى بيلعبو بيها بتكون بموتور صغير وعاده لا يتعدى ال 1600 سى سى وبيقولو عليها بيبى فورميلا واى حد يقدر يركبها ويسوقها مش محتاجه سواق محترف او لياقه بدنيه مرتفعه زى عربيه الفورميلا 1 , سواقين الفورميلا 1 فعليا اكثر الرياضين فى العالم لياقه بدنيه وحتى الان لم يشارك اى عربى وحسب معلوماتى ولا حتى افريقى فى الفورميلا 1 , ده تقدر تقول كمان مش كل اوروبا بتخرج سواقين فورميلا 1 مجرد دول معينه بس

الموضوع: حد عايز يعرف او يتعلم يتفرج على فورميلا 1 ؟؟

LinkBack

أدوات الموضوع

عرض

-

-

-

-

-

-

-

-

المواضيع المتشابهه

كام واحد مبتدئ و عايز يشتري و يتعلم السواقة

اللى عايز يتفرج على البولو السيدان 2009 يدخل

لكل الى عايز يتعلم سواقة المتوسيكل عملى-نظرى

اللى عايز يضحك من قلبة يتفرج على الحلقة ديه

اللي عايز يتفرج على بطولة امم اوروبا هلى الهواء على الكمبيوتر

الكلمات الدلالية لهذا الموضوع

المفضلات

المفضلات

ضوابط المشاركة