الموضوع: عوامة البنزين بتسقط فى الانسر !؟

المشاركة الأصلية كتبت بواسطة gama667

انا كمان عندى مشكلة فى المؤشر بيشتغل بمزاجة وبيدى قرايات غلط بكون لسه مفول التنك والاقى المؤشر على التلت تربع وساعات فجاة تنزل تحت خالص واللمبة تنور ولما اطفى العربية واشغلها تانى يتعدل ومن اسبوع بالظبط فكيت الطبة وهنا عايز اقول حاجة ان الفلتر لوحده بعيد عن العوامة الفلتر له غطاء اسود ب 4 مسامير لكن العوامة تحت الطبة المدورة الالمنيوم دى بتتخلع متركبة كبس من غير مسامير المهم فكيتها وفكيت العوامة وسنفرت الشريحة اللى بتاخد قراية العوامة وركبتها فى مكانها تانى وفولت التانك راح اتعدل بس النهارده رجعت تانى عملت نفس الحركة ولقيت المؤشر نزل تحت خالص
هى فعلا عيب فى العربية لأن كتير اشتكو نفس الشكوى

الحل فى تغيير العوامه كامله و ليس صنفرتها زى ما عملت و كويس انك عرفت تفكها و تتعامل معاها و ناقصك فقط انك تفكها تانى بس تركب مكانها واحده جديده و ترمى القديمه خالص هتلاقى الدنيا إتزبطت (ده اللى أنا عملته و نفس العيب اللى بتقول عليه اتصلح و كله بقه تمام بس لازم تجيبها أصلى من التوكيل و هتعمل حوالى 350 جنيه)

الحمد لله انا صلحتها و شغالة زى الفل ومن الواضح انها مش مشكلة فردية و عند اكتر من فرد لأن الكهربائى الى روحتلة قالى إن ده عيب فى العربية الانسر و اكتر العربيات اللى بتجيلة بمشكلة العوامة, لانسر,.بس معروف طبعا ان الصنايعية كلامهم كتير و مصدقايتهم شبه معدومة, انا عن نفسى مبصدقش اى كلام اى صنايعى يقولهولى بس اللى اثبتلى إن الراجل صادق إن كان شكلة عارف هو بيعمل ايه, حتى بعد مخلص وقبل ما يجربها حتى قالى خلاص يا باشا كده انساها, قولتلة منا روحت لكهربائى زى حالاتك قبل كده و قالى انساها بردة و تانى يوم باظت, قالى يا باشا عالعربية دى (وشاور على عربيتى) قالى لو فيها حاجة مش هجيبلك عوامة جديدة هجيبلك عربية جديدة, قولتلة إما نشوف و فعلا شغالة زى الجديدة بالظبط بقالها اسبوعين تقريبا مفيش مرة فارقت حتى و انا عينى عليها علطول,
عمل ايه هو بقى, مبدئيا مرديش يورينى هو بيعمل اية (سر الصنعة) ,خد العوامة وقالى معلش يا باشا مبعرفش اشتغل و حد فوق دماغى! ودخل فى زخانيق الورشة بتاعتة, الكلمة استفزتنى طبعا بس مرديتش عليه و قلت فى نفسى اما نشوف اخرتها معاه, و لو ما اشتغليتش او باظت بعد كدة ابقا اطلع كل ده بقه فوق دماغة, و برغم كدة بردة كنت شايف هو بيعمل ايه من بعيد جاب زى حتة حديدة رفيعة و كان بيسخنها بولاعة و ثبتها بالطول كأنها دعامة بردة مخادتش بالى اوى لأنة خدها ركبها علطول, خد وقت أد اية.. 10 دقايق اكتر من نصهم كان بيتكلم مع زباين تانية, خد فلوس أد اية.. كان عايز 30 فاصلتة و اديتة 20 و كان مش مضايق.. الراجل مكانة فين فى الحى السابع, مدينة نصر, اى استفسارات اخرى انا تحت امركو...

وانا كمان ياجماعة حصل معايا الموضوع دة النهاردة كنت راجع انا والدي من المستشفي وبيدور العربية لقيت لمبة البنزين منورة والعداد علي empty استغربت جدا ومشيت علشان انا لسة مفوال العربية امبارح ومعملتبش بعد التفويل اكتر من 60 ك وبالتالي التنك مليان ومشيت وكل شوية العداد يرفع لغيت لما وصل الي الفول تنك
فمعن كدة اية

أحنـــــــا عربية اخويا لانسر 1300 سي سي خليجي
عــــاملة 25000 كم وبرده العوامة عملت كده
لغاية مابقينا ماشيين بالكيلوات