ما هى علاقة حجم الجنط بالعفشة؟؟ سؤال يهم كل من يبحث عن جنط سبور
السؤال البديهى اللى الواحد لازم يسالة.... ايه علاقة المقاس بالعفشة؟؟؟ يعنى العفشة حتعرف منين اذا كان دة جنط 12 ولا 18؟؟؟؟؟
الاجابة ولا حتعرف اساسا... اللى بيفرق بالفعل هو الوزن... و الوزن هنا بياثر على الوزن الغير منبوض non sprung weight و دة الوزن اللى مش متحمل على سوست العربية... وعشان العفشة تادى اداء صح لازم الوزن دة يكون اقل ما يمكن
ايه الحكمة فى كدة؟؟
تخيل انك صحيت الصبح لقيت نفسك مساعد فى عربية... و العربية ماشية فى طريق مكسر... و سيادك ماسك الركبة بالصرة بالطنابير بالجنط بالكاةتش و شغال بدراعك فوق و تحت و فوق و تحت اكنك بتتمرن تمرين بنش طول ما العربية بتعدى على المطبات
لو الاوزان اللى انت ماسكها دى تقيلة حتتعب عضلاتك و تجهدك... و ساعتها رد فعلك مع المطبات حيقل لان لما العجلة ترتفع لفوق و هى تقيلة زى الداهية انت مش حيبقى عندك قوة تردة لتحت عشان العجلة تفضل على الاسفلت و بالتالى العجلة لحظيا حتطير من على الارض لحد ما تنزل تانى... كرر الموضصوع دة باستمرار حتلاقى البات زفت لان عجل العربية بيفقد تماسكة مع الطريق باستمرار نتيجة قصورة الذاتى العالى بسبب وزنة اضافة الى اجهاد مكونات العفشة اللى بتحاول تقلل و تسيطر على حركة العجل التقيل اللى طالع و نازل مع المطبات
تخيل بقى العكس... لو الاوزان دى خفيفة جدا... حتلاقى الحياة زى الفل و تقدر تتعامل مع اى عدم استواء فى سطح الطريق بسهولة و يسر حتى لو المطبات كتير وورا بعضها و السرعة عالية... و بما ان الوزن اللى انت بتتحكم فيه قليل فا مستوى الاجهاد اقل كتييييير من الحالة الاولى و بالتاى سيادك حتعمر فى الشغلانة دى و مش حتجيب جاز
معلش هو المثال غريب شوية بس دى اقرب حاجة قدرت اتخيلها عشان توضيح الفهوم دة لان ناس كتير اوى فاهمة القصة غلط و فاكرة ان المقاس هو الفيصل فى الموضوع... طبعا من المنطقى ان الجنط الاكبر يبقى اتقل بس مش هو دة الاساس... ما فيه جنوط OZ معمولة للعريات السباق اخف من الريشة و حجمهم 18 بوصة تقريبا
و بناء على الكلام دة فا انت كلامك صح ان لو جبت جنط 15 جفيف افضل و احس 14 التقيل لان العفشة بتتاثر بالوزن مش المقاس... العفشة اصلا حتحس بالمقاس ازاى؟؟؟ لكن حتحس بالوزن من خلال القصور الزاتى و رد فعل الكتلة الغير منبوضة لما تعدى على مطب فى الطريق
بالنسبة للاوزان فا مفيش وزن مثالى... كلة حسب العربية... و دايما بنصح ان يبقى فرق الوزن من 10 لى 15% من وزن الجنط الاصلى... يعنى لو جنطك وزنة 7 كيلو يبقى جنط 8 كيلو كويس مش وحش...طلع بقى الجنط دة 14 او 18 براحتك
معنى كدة انك لازم توزن جنطك الاصلى عشان تبقى عندك نقطة اساس و منها تقدر تقيم الجنوط اللى حتشتريها
MMamdouh
