شكرا لصاحب الموضوع على تعبه على الموضوع.
أنا لما قريت عنوان الموضوع حسيت ان اسمى هيكون موجود لكن متوقعتش انه يكون اول واحد :)
فعلا انا عندى المشكله دى و أنا متابعها يمكن دلوقتى مش موجوده لكن متابعها علشان العربيه عامله 4000 و الصيانه الأولى على 10000 و لما اروح التوكيل هقولهم عليها.
أنا من النوع اللى ميحبش يسمع اصوات فى العربيه و بتدايقنى جداً. و عايز أقول العربيه مش من بقيه عيلتى يعنى لو حسيت ان ناس كتير عندهم مشاكل فيها أعتقد انى ممكن اغيرها و ادور على احسن منها لو معايا فلوس او اجيب اقل منها بالفلوس الباقيه.
أنا عايز اختلف مع بعض الأخوه فى الرأى بخصوص الصينى.
يعنى العربيات الصينى انت ممكن تحكم على الحاجات اللى ممكن تشفها بعينك او تجربها زى سحب العربيه و صوت عفشتها و التقفيل ودى حتى حاجات متقدرش تقرر على اساسها انك تشترى عربيه يعنى متعرفش رد فعل العربيه فى بعض المواقف الصعبه او الموتور حقيقى كام حصان من مصدر موثوق منه أو طريقه تصنيعه عامله ازاى و العفشه شكلها عامل ازاى و مصنوعه من ايه ممكن حاجات نفس الشكل لكن المواد و المعالجه تختلف حتى ممكن نفس الشكل و حاجه صب و حاجه مجوفه و ده طبيعى اننا شوفناه فى سوق قطع الغيار.
طيب ايه اللى المفروض و الصح انه يتركب فى العربيه لا انا و لا انت نقدر نعرفها دى ترجع للمصنع و التصميم.
نيجى بقى للكماليات ESP , ABS , Airbags و الخ هل يترى الحاجات دى اسم و لا بتشتغل بجد و لا بتشتغل بس مجربتش بما فيه الكفايه. كل حاجه من دول كارثه لو متمش عليها التجارب كويس و كانت مضمونه. مين عارف؟
أنا مش بعيب فى الصينى و لكن بقول اللى بيجى فى بالى لو فكرت فى الصينى. فى ناس اخدوا المخاطره و كانوا اشجع من ناس كتير ( انا واحد من الناس التانيه ) فى شراء العربيات الصينى و ممكن يثبت صحه اختيارهم و ممكن لا
فى حاجات مينفعش المخاطره فيها.
كام واحد مننا راح يشترى جهاز تليفزيون أو تلاجه او خلاط او حتى توستر و كان قدامه االأنواع المجهوله زى JAC , Cairia و فى الأخر خاف و اشترى ماركه عالميه معروفه؟
كام و احد معاه موبيل صينى و كام واحد معاه نوع معروف و ليه مجابش الصينى؟ هل بسبب SAR مثلا؟
أسم الشركه و هو goodwill بيدخل فى ميزانيه أى شركه عالميه و بيكون مئات الملايين من الدولارات و هو بيمثل اسم الشركه و سمعتهاو خبراتها و حجم R&D عندها و حاجات كتير قوى. علشان كده أسم العربيه من الحاجات المهمه جداً مينفعش حد يقول مش هاخده فى اعتبارى لانه يساوى فلوس.
عايز اسأل سؤال للأخوه اللى بيحبوا الصينى. كام عربيه صينى من أى ماركه صينى اتعملها Recall علشان لقوا فيها مشكله كبيره مش صغيره حتى؟
ياريت محدش يزعل منى. مع احترمى لشخص اى حد راكب عربيه صينى.
معلهش احنا بنتكلم :)
المفضلات