من فترة كنت محتار أشترى ايه فى متوسط الفلوس المعايا, لغاية ما ربنا الهمنى ان حان الوقت ان الواحد يجرب الالمانى, و رسيت على اختيار احدى السيارتين الأتيتين (بورا 2000 - 2002 أو أوكتافي A4 2004 - 2006), و كنت مركز أكثر مع الأوكتافيا حيث انى ممكن الاقى موديلات حديثة بسعر مناسب و قطع غيار متوفرة و اعادة بيع ممتازة مع قدرتها على الحفاظ على سعرها فى السوق.

و بعد النزول و معاينة أكثر من سيارة موديلات 2004 الى 2006 (مع العلم انى فى بحثى كنت بسعى لحاجتين الحالة أولا و كيلومتر أقل من 100,000 ثانيا) لقيت الناس العارضة بتتطلب أسعار وهمين و كلو بيتكلم فوق ال 90,000 ج لغاية 105,000 ج فى بعض الحالات, مع انى عملت اتصالات مع قدامى العارضين فى الوسيط و contact cars لقيت الى باع خلص على رينج أسعار (76 - 83 ألف ج) على حسب الموديل و الحالة.

المهم بردو لحظت الفرق النفسى الكبير بين ركوبى عربية أوكتافيا A4 تكييف و كاسيت عادى, و بين النازلة تكييف تاتش و كاسيت C.D أصلى, كأنك بتتكلم فى فئتين مختلفتين.

و بالصدفة كنت معدى فى شارع النزهة و أنا عارف ان فى معرض هناك عارض بورا للبيع, قلت اقف و أتفرج بسرعة اخذ فكرة.

السيارة أتوماتيك F\O, تكييف تتش, كاسيت سى دى, و بمجرد جلوسى فى السيارة و فتح أنوار التابلوه و تشغيل التكييف, بهرتنى ب شياكتها و رونقها بصراحة و نستنى الأوكتافيا بتوافر قطع غيارها و سهولة بيعها, و بينى و بين نفسى قررت انى أركز على البورا الكاملة الأتوماتيك بالتكييف التتش.

طبعا فى النهاية فوقت تفسى و قمن اتفرج على باقى العربية القلى انها راشة حزام فقط (الكبوت و السقف و الشنطة فابريقة), لكن مع بداية الفحص و الدنيا ليل, لقين الكبوت راشش حاول يماطل قلتيلو الفليتو بتاع الكبوت مفكوك و ملعوب فيه, و بعد اعترافو ان الكبوت فعلن فيه بوية بس الوش و الصدر زى الفل(ال مكنش واخد بالو يعنى), لقيت الشبكة القدام بتلعب فى ايدى و مش متربطة يعنى غالبا العربية واخدة خبطة محترمة من قدام و الصدر كان متغطى ببلاستك اسود الخاص بالعربية فتعذر فحصو ساعتها و بينى و بينكم كنت شاكك فى الشنطة بردو فسلمت و مشيت.

نيجى للمهم بأه أنا ان شاء الله ناويت أركز على البورا زى ما قلت قبل كده و فى سيارتين أو ثلاثة قدامى مع تفاوت غريب فى السعر (72,000 - 83,000 - 92,000 و اكييد الأخير ده موهوم), ال أولى و الثانية يشتركوا فى الكماليات و الموديل و عدد كيلومتر أقل من 100,000ك, و يختلفوا فى الحالة الخارجية (الأولى رشة بابين و كابوت الثانية مفروض فابريقة بالكامل) عموما أنا بروح مع صديق نعمل الفحص الأولى للدهان و حالة الصالون و العافشة, و بنسوق نشوف أخبار السيارة فى الجرى و صوت العفشة فى المطبات , يعنى الحجات البدائية و لو كان فى قبول ان شاء الله أخذ السيارة على ورشة متخصصة (سواء سمير الورا حديقة بدر او الثانى العند سنترال مصر الجديدة فى جسر السويس)

جه بأه دور الأخوة الأفاضل ال فى المنتدى و خصوصا ملاك البورا, كل عربية و ليها بصمتها و قد يتوحد الشعور ب عيوب او مشاكل خاصة فى الموديل أو مزايا بردو, ف و أنا بفحص السيارة الفحص الأولى تنصحونى أركز فى ايه اكتر (هل فيه حاجة معينة فى الموتور أو الكهرباء ممكن تتلاحظ, أو العفشة هل فيه مؤشرات تخلينى أبتعد عن سيارة بورا بعينها, أنا كنت سمعت مثلا كلام عن مروحة التكييف بتاعتها مابتعمرش و من مشاكل محتملة فى الاتوماتيك و ايه حوار ان الموتور 5 سلندر مش أربعة, هل احد الملاك حصلتلو معاناة من حاجة عيب صناعة فى السيارة (انا مثلن كنت عامل موضوع عن مشاكل عفشة السبكترا القديمة بتاعتى لغاية معرفت ان ده عيب فى السيارة و شكوى عامة ان عافشتها غير معمرة و عاوزة ايدك فيها علطول), و أخيرا بخلاف ارتفاع اسعار قطع الغيار هى أساسا موجودة ولا صعبة حبتين توافرها

ف يا ريت يا جماعة العارف حاجة مايبخلش و اهو تبقى فايدة ليا و لغيرى, و انا عارف انكم مش هاتكسفونى خصوصا مع عامل الوقت لأنى ان شاء الله احتمال أتفرج على السيارتين السالف ذكرهم اليوم.

و شكرا جزيلا