تقييم علي قدي للوجان2010 مع قرب ال1000 كيلو (سنه اولي تقييم))

**cheetos_892005** · 18-09-2009 05:45 AM

اعزروني يا جماعه انا لسه مبتديء في موضوع انا اعمل تقييم ده بس انا حبيت اساعدكم
هي فول اوبشن:
اولا الراحه:
بالنسبه للراحه فهي بحمد الله مريحه جدا جدا ووضعيه القياده العاليه بتديك احساس مريح قوي وانت سايق
حتي و انت نازل او داخل العربيه
مبتدخلش تترمي او تقع كده ان صح التعبير في العربيات الواطيه التانيه وانت خارج برده مبتحتجس تسند علي حاجه
الكراسي مريحه جدا و طبعا اللوجان معروفه بالوسع
الفرش خامته جيد جدا و تحس بجوده في تقفيله
العفشه طريه جدا و ناعمه جدا و مريحه عن عفشه اللانسر بتاعت اخويا
ثانيا الموتور:
ان لسه مكملتش الالف عامل حوالي 760 كم معظمهم محور لكن العربيه بسحبها دلوقتي مرضي ليا الحمد لله
ومش عايز اكتر من كده خالص
بنقل علي 2.5 rpm و احيانا لما بسرح بتوصل 3 بلاقي العربيه جابت 100 واكتر بسهوله من غير ماخد بالي
بس بضطر اهدي طبعا عشان التليين
الحمد لله سحبها كويس جدا جدا و ناعمه جدا
ثالثا الهدوء و العزل:
الموتور اول ما تدور باحس ان صوته عالي حاجه بسيطه نتيجه لارتفاع ال rpm عشان التسخين الذاتي
بس اول لما بمشي و اشغل اذاعه القران الكريم الحمد لله و لا بحس انها شغاله و تقريبا مفيش صوت نهائيا
لما العربيه تسخن و حتي و انت مش مشغل حاجه
الكاوتش ناعم و مش عامل صوت نعره زي بعض الانواع
النقر مكتومه

رابعا الثبات:
بالنسبه لسواقتي ممتاز ((سواقتي كلها غرز ديقه حتي لو علي سرعات قليله بس الحمد لله ميتطوحش مني بفضل طبعا الباور اللي مش مياه زي بتاع للانوس مثلا و لكنه ناعم جدا))
العربيه بفضل الله مبتتنططش علي الطريق حتي لو كان معرج او مطبات هوا
و اكتر حته تحس فيها بالموضوع ده
للي ساكنين في اكتوبر او الشيخ زايد و انت خلاص هتحصل الصحراوي في طريق نزولك لميدان لبنان
قبل المطلع الحته ديه معرجه بغباء و مطبات هوا بجد بشوف عربيات في الحته ديه بتطير عن الارض
و اغلبها النيو اكسنت بذات
خامسا الفرامل:
محصليش غير موقف واحد بس الحمد لله لحد دلوقتي هو اللي خلاني استخدمها بقصوه
كنت ماشي في شارع ضلمه في شيراتون و بجري شويه و هبب لاقيت مطب
مكبستش فرامل عالاخر بس دست جامد سنه و لما لقيتها بتستجيب رحت كابس قبل المطب و ملبستوش
فعلا الفرامل فاجئتني
سادسا ارتفاع السياره:
ده انا بجد لو بايدي ادي جايزه للي عمل كده
تمشي في شارع اول ما يجي مطب تلاقي كل العربيات اللي حواليك اتنرفزوا و كلوا يهدي و انتو عرفين بقاالشقلبظات و تعد تاخد المطب بالعرض و كده
و انت ماشي و لا الهوا بتاخد المطب بكل سلاسه مهما كنت محمل بتبقي مطمن انك مش هتحك ان شاء الله
اقصي ظروف للمطبات كنا 4 في العربيه و عبرنا كل مطبات شارع احمد عصمت و عين شمس العاشمه بسلام

سابعا التكيف:

مفيش غير مره واحده بس اضطريت اشغله لما كنت رايح مشوار علي طريق الفيوم في عز الحر و الصيام و شغلته
شغلته علي اتنين و كنت سايق و اخويا الكبير جنبي ووالدي قاعد ورا كنت مشغله علي 2 و كان والدي حاسس بيه عادي و بفضل الله سقع بسرعه جدا ((كان في واحد في معرض رينو نادي الزمالك قالي ان التكيف ياباني اللي بينزل في عربيات نيسان؟؟؟؟))
هتتفاجا لو قلتلك محستش بحاجه ملحوظه قوي في السحب
كل الحكايه مجرد كنت بنقل علي الشرطه اللي بعد 2.5 و قبل 3 rpm و بردو جبت 90 و 100 و اكتر بسهوله لكن بردو بهدي عشان التليين
ثامنا الخامات و التابلوه :
الخامات مرضيه جدا و مفيش طقطقه و شخاشيخ و الكلام ده نهائي بفضل الله و اللون الفضي اللي في الفل اوبشن فعلا مدي احساس بالاناقه و الرضا عن العربيه
و شكل وانوار العدادات في منتهي الجمال و الوضوح
كل ما تحتاجه قريب من متناول يدك
الكمبيوتر اكثر من رائع بجد و مفيد جدا خصوصا للي بيعمل مشاوير طويله زيي و مش بتاع الفئه دي خالص خالص

تاسعا الكاسيت :
صوته عالي و نقي جدا و سهل فس الاستخدام و ال 4 سماعات عاملين شغل حلو والله مبقدرش اعليه اكتر من النص

عاشرا العيوب في و جهة نظري((شويه تلاكيك)):
1-قله اماكن التخزين مع ملاحظه ان الشنطه عملاقه بمعني الكلمه
2-عدم و جود مسند او كونسول بين الكرسيين
3-المرايا اليمين كانت ملخبطاني شويه عشان اصلا المرايات شكلهم مختلف عن كل العربيات بس بعد تاني مره بقت عادي جدا و لقيتها احسن من الباقيين كمان
4-عدم وجود فتح التانك من الداخل
5-اماكن الزراير في الاول كانت ملخبطاني و الكلاكس بس خلاص مع تاني او تالت مره بتبقي عاديه جدا

انا قولت رايي في العربيه و الحمد لله وانا راضي عن نفسي و بدون تحيز
لان تقييم زي ده ربنا هيحاسبني عليه
و كل عام و انتم بخير
و ارجو انو يكون عجبكو وافدتكو
و لو افتكرت حاجه تانيه هزودها

**vectra2ever** · 18-09-2009 06:18 AM

اولا يا رب عقبال متعمل بيها مليون كيلو وربنا يكفيك شرها وشر طريقها بشكرك علي التقييم الممتاز والسهل البسيط العربيه دي هتثيت كفاءه عاليه في وقت قصير وكل يوم بيعدي بقتنع بيها اكتر واكتر واحسن انو اختيار مش غلط

**amr.elsayed** · 18-09-2009 06:39 AM

100 100 يا شيتوس تقييم جميل وسهل وربنا يكفيك شرها ويعطيك خيرها
احسن حاجة فى اللوجان انها مش محتاجة اى تعديل وهى زيرو زى ما عودتنا العربيات اللى فى فئتها السعرية
طبعا كلامى واضح
والف مبروك قربك لل 1000 كيلو وعقبال المليون