الموضوع: الحمد لله ركبت كروز كنترول و اليكم التفاصيل

أولا انا باعتذر عن عدم ارفاق صور علشان مش عارف ادخل على اى موقع رفع من كمبيوتر الشغل، بس اوعدكم انى ارفقهم فى اول فرصة.

من سنة تقريبا كنت شفت اعلان فى موقع فلجول عن جهاز كروز كنترول و كان ثمنه 1900 جنيه، بس صرفت نظر علشان مكنتش محتاجه، المهم لما نقلت سومة من 3 شهور و المشوار حوالى 550 كم، بصراحة حسيت انى لازم اركبه علشان رجلى كانت بتتحنط على الدواسة، خصوصا لما بيكون عندى مشوار الغردقة و جوه البلد السرعة 60 كم و الرادارات على ودنه.

المهم، حجزت و رحت ركبته يوم الاربعاء، الورشة بتاعة الشركة فى بنزينة وطنية فى اول طريق القطامية-العين السخنة، الشركة اسمها Endless Creations ، الجهاز بقى تفاصيله كالأتى:

- تمنه 1500 جنيه
- صناعة صينى
- ضمان سنتين
- من خامات و تقفيله واضح انه نضيف، صحيح علبته عليها شهادات جودة كتير، بس التقفيل و الخامة بتفرق معايا

التركيب استغرق حوالى ساعة و نص و ملاحظاتى على التركيب هى:

- الباشمهندس و الصنايعية ناس فاهمة قوى و شغلهم نضيف و بيعرفوا يقرأوا المانيوال و التوصيلات اتعملت باحترافية و جربوا كتييير مع انه اشتغل من اول مرة، بس جربوا سيناريوهات التشغيل كلها، زى المطالع و المنازل.
- الجهاز فيه جزء ميكانيكى بيركب فى الحوض و بيطلع منه واير على المنافول.
- جهاز التحكم عبارة عن ريموت بيركب فى الطارة و بيبعت الاوامر بالاشعة تحت الحمراء لوحدة التحكم.
- الجهاز فيه اوبشنز كتير و استخدامه سهل جدا، يعنى غير تثبيت السرعة ممكن تزود و تقلل السرعة من الريموت بكذا اوبشن، يعنى ممكن تفضل دايس و السرعة تزيد و تقل طول ما انت دايس، او تدوس مرة و السرعة تزيد او تقل بمعدل معين انت تبرمجه بنفسك.
- الجهاز بيفصل لما تدوس فرامل او دبرياج او تفصله من زرار التشغيل.
- الجهاز فيه عوامل امان كتير.
- الجهاز بيعمل بين سرعة 40 - 150 فقط.

انا طبعا حبيت اجربه قبل ما اكتب عنه و فعلا جربته فى مواقف كتير و اخرها مشوار للعاشر من رمضان النهاردة و اشتغل كويس جدا، يعنى مثلا ما فصلش خالص و فى المطالع و المنازل كان بيزود و يقلل لفات الموتور حسب الاحتياج.