الموضوع: هل صوت الموتور في اللوجان 2010 عالي أرجو الاهتمام

بص يا استاذ اكرم فى فرق بين الشكوى والملاحظة
محدش اشتكى من صوت الماتور وسبق واتكلمنا فى الموضوع دة كتير
وصوت الماتور عالى شوية فى السلانسية ولما العربية تكون واقفة
والصوت بيظهر خارج العربية لكن داخل العربية عادى جدا
وسبق وقولنا ان عزل الكبينة جيد ومش بتسمع غير صوت خفيف من الماتور
والسيارة جيدة جدا بشهادة ملاكها الكل مبسوط منها جدا
ممكن اسأل حضرتك سؤال حضرتك سوقت عربيات ايه قبل كدة عشان اقولك
انك حتلاحظ صوت الماتور ولا لا عشان انا اصلا شايفوا اهدى من مواتير تانية يامة
وكل سنة وانت طيب

بص يا اكرم العربية مسمعة جامد وهى من افضل السيارات الموجودة
فى السوق فى فئتها السعرية اذا ما كنتش هى الافضل على الاطلاق
واللى بينافس اللوجان هى اللانوس والفيرنا وبعض السيارات الهاتش باك
اللى ميدخلوش مع اللوجان فى مقارنة لاختلاف الفئات
اللوجان بتتفوق على اللانوس والفيرنا فى كل حاجة ثبات واوبشن وعوامل امان
الفيرنا اقوى ماتور فيهم لكن ثبات وامان مافيش
اللانوس عربية كويسة وهى الوسط بين اللوجان والفيرنا
لكن بيعيبها بعض الاشياء مثل شكلها القديم اللى ماتغيرش من 10 سنين
وصاجها ضعيف لكن هى عربية متجربة وجيدة فى فئتها
الفيرنا واللانوس بيتفوقوا على اللوجان فى اسعار قطع الغيار نسبتا
الى وجود السيارتان من قبل اللوجان فى شوارع مصر من سنين كتيرة
عكس اللوجان حديثة العهد لكن ينتظر اللوجان انتشار كبير وذلك سيؤدى
الى انخفاض اسعار قطع غيارها فى المستقبل القريب ان شاء الله
ان عارف انك لسة بتقارن وموسوس شوية فى الوقت دة عشان فى مرحلة الاختيار
وانا حاسس بيك عشان كنت واقع فى نفس الحيرة والحمد لله المقارنة اتحسمت للوجان بتفوق وحجزتها ومنتظر الاستلام ان شاء الله
الخلاصة :
جرى وشد مواتير مع قلة عوامل الامان والثبات = فيرنا
اقتصادية فى الصيانة و وسع داخلى للصالون جيد قلة عوامل الامان = لانوس
ثبات وامان وتسارع مرضى صالون اوسع مع عوامل امان = اللوجان
كل دة انت اللى تحدده من خلال احتياجاتك فى العربية
و ربنا يرشدك ال الاختيار الامثل ان شاء الله
واى استفسار بالنسبة للوجان انا تحت امرك

المشاركة الأصلية كتبت بواسطة akramayad

متشكر جداً يا عمرو على اهتمامك ، وعلى فكرة انا بسأل الأسئلة دي وأنا حاجز اللوجان فعلا ( تخيل ) ومع ذلك ممكن في أي لحظة أرجع في كلامي وأخسر بعض من اللي دفعته في سبيل ما أخسرش كل حاجة ، وعلى العموم أنا مطمئن للعربية وده من كلام ملاكها بس الموديلات اللي قبل كده وتصنيعها روماني أما الموديل الجديد اللي نازل من المغرب الله أعلم ، وربنا يسترها معانا .
مرة تانية شكرا على الردود السريعة وأتمنى نكون أصحاب يا عمرو وعلى تواصل دايما في المنتدى وغير المنتدى وده رقم موبايلي 0105758571

العفو يا اكرم على ايه احنا اخوات ومش عايزك تقلق من العربية ابدا العربية كويسة جدا
وحتنبسط منها جدا وكل اللى راكبها وجربها تفاجأ بحاجات كتير ما كنتش موجودة
فى الفئة دى من العربيات واللى مخالينى متطمن اكتر توكيل رينو قوى جدا بجد ناس محترمة
وان شاء الله نستلم كلنا على خير وانا لى الشرف انك تكون اخويا وصاحبى

هو انتوا يا جماعة لما بتقولوا ان الفيرنا بتتفوق عن اللوجان في الشد و التسارع بتقصدوا اللوجان ال 16 صباب و لا ال 8 صباب
انا بصراحة حاسس ان الموتور ال 16 صباب اللي راكب في اللوجان mcv موتور شديد و كذا مرة اشد مع فيرنا و اعديها بس بصراحة مش عارف ان كان صاحبها بيطلع كل ما فيها ولا بيخاف
يعني بصراحة ما حسيتش حتي الان ان موتور اللوجان ضعيف و انا بتكلم عن الموتور ال 16 صباب 105 حصان و تقريبا هو نفس الباور بتاعت موتور الفيرنا

اما موضوع الصوت فالموضوع دا احنا اتكلمنا فيه كتير
و انا هلخصه في الأتي
الموتور صوته فعلا عالي نسبيا مقارنة بعربيات تاني بالنسبة للواقف خارج العربية بس صوت عادي جدا يعني مش زي صوت العربيات الجاز مثلا لكنه اعلي من مثيلاتها
اما لو انت داخل الكبينة فمافيش صوت نهائي مسموع علي السلانسية و انت ماشي بالعربية الصوت مش مسموع لغاية ما الأر بي ام للموتور يوصل 3000 و بتكون السرعة 100كم /س عالنقلة الخامسة للفتيس بيبتدي يعلي شوية لغاية ما توصل لسرعة 120 كم /س و فعلا بتحس بيه بس لو انت مشغل التكييف و مشغل الكاسيت او الراديو الصوت بيختفي و بيبقي غير ملحوظ الا للسائق نفسة عشان هو اللي متابع العربية و عارف ايه اللي بيحصل
بعد ما الأر بي ام بيعدي ال3500 لفة بيبتدي الصوت ينعم من تاني و يقل عن الأول و انت بتحس ان موتور العربية اتغير من اختلاف الأداء اللي بتحس بيه بيبقي وحش مفترس بجد بس اللي يطاوعه قلبة و يدوس
انا عن نفسي كراجل بسوق بفضل اني اكون سامع صوت العربية و انا ماشي عشان ابقي مطمئن طالما الصوت لم يصل لحد الإزعاج في الكابينة
و عموما ملاحظة ارتفاع الصوت دي بسبب قلة العزل انا قريتها كتير في منتديات رومانية و روسية و علي فكرة انا قريت لناس كتير حلت المشكلة دي عن طريق زيادة العزل باستخاد لباد عازل بتاع عربيات تاني و من ضمنهم واحد كان بيقول انه استخدم عازل بتاع عربية اودي و مع بعض التظبيطات ركبه فب العربية و الصوت بقي مختفي تماما لدرجة انه ما بيبقاش حاسس باي حاجة و هو ماشي
وانا معيا موضوع بالصور لواحد عامل عزل لكل العربية من تاني من ارضية و صدر و سقف و ابواب و شارح كمان بالفيديو بس مش لاقي الوقت اللي ارفع الموضوع فيه و كمان الموضوع معمول بالروماني و ان استخدمت ترجمة جوجل لترجمة لصفحة و ترجمها 100% بس مش لاقي وقت عشان ارفعها للمنتدي و تشوفوها
و برده ناس كتير جدا علقت عالموضوع بانه بسيط جدا و لا يستدعي زيادة عزل و لا حاجة

بس انا اكتشفت ان اللوجان دي منتشرة جدا و بطريقة كدا فكرتني بالعربية البيجو عندنا في مصر و منتشرة في رومانيا و روسيا وايران والهند و دول تاني كتير معظمها في وروبا الشرقية منتش


عموما انا هكرر كلامي و اقوله في كلمتين
لو انت كنت بتركب عربية قديمة و قررت انك تشتري الوجان فانا بطمنك انت مش هتحس باي مشكلة نهائيا من اللي احنا بنتكلم عنه و توكل علي الله و لا تتردد

اما لو انت نازل من عربية تاني في مثل فئة اللوجان فانا واثق انك هتلاقي الفرق بسيط مش كبير و هتتعود عليه بعد فترة صغيرة بس حتحس بأه بفرق كبير جدا في حاجات تاني ماكنتش حاسس بيها قبل كدا في اي عربية في نفس فئتها من وسع وبراح في العربية يستحيل تشوفه في عربية غيرها في فئتها و من جودة و عملية خاماتها و اتزان و سحب و استهلاك بنزين و ارتفاع عن الأرض مع كامل حمولتها ما يخلهاش تحك في اجعصها مطب فيكي يا مصر و عفشة حمالة اسية و ناعمة و ما بتعومش في الملفات وطبعا اللي فوق كل دا انك راكب عربية اوروبية المنشأ واسعة الإنتشار في اوروبا خاصة شرق اوروبا و عليها علامة شركة عريقة جدا و لها باع كبير و تاريخ عظيم في صناعة السيارات اسمها
ريـــــــــنـــــــــــــ ـــــــــــــــــــــــــ ـــــــــو
وفي الآخر توكيل محترم بيحافظ علي عملاؤه و بيعمل كل ما يرضيهم

يبقي ليه تحرم نفسك من كل دا يا عم الحج ؟؟؟؟