الموضوع: رابطة مالكي السويفت

احب انضم للرابطة اشتريت سوزوكيسويفت 94 كاملة فابريكا برا وجوا

يا هلا بيك

بس عايز اعرف ازاي اجمع سرعة يعني لو بشد مع حد او عايز اعدي من بين عربيتين اعمل ايه؟

اللي انت بتتكلم فيه ده موضوع كبير جدا بس مبدئيا لازم موتورك واسبيراتير وكربيراتير ممتازين ومتظبطين....وحكاية الشد ده نمط قيادة ونصيحة خالصة مش هتفرق في الاخر....انت واللي شديت قصاده يمكن لو سبقته بكيلو هيحصلك عند أول مطب أو اشارة فمفيش داعي ليه...ممكن انت لو عاوز تشد يبقى تتأخر فالنقل وانا شخصيا باحس ان الترسين التالت والرابع هما تخصص الشد يعني تدي التالت على 50 كده لحد 80 وبعدين تدي الرابع وهكذا بس نصيحة بلاش اسلوب الشد الا في المواقف التي تستدعي وحتى كنوع من الحفاظ على العربية وتوفيرا للبنزين

وسؤال حصل موقف بسيط كدا واطريت اشد الهاند العربية زحفت نض متر بعد كدا لما جيت امشي بسمع صفارة على السرعة الخفيفة جاية من الفردة اليمين ورا ولما بزود سرعة بتختفي

دي هتروح للميكانيكي بيتاعك او حد بتاع فرامل هيظبط لك رجلاش فرامل اليد من الطنبورة اللي ورا وخليه يظبط لك العجلتين بالمرة

وسؤال كمان اعرف ازاي ان التكييف محتاج شحن او مشحون؟؟

بص ياباشا...انت بتشغل التكييف على وضع AC والسرعة على 4 وتسيب الشباك مفتوح وتبص على وش العربية فيه حاجة اسمها مجفف هتلاقيه علبه معدن اسطوانية كده جنب الكلاكسات من قدام وفيه عدسة ازاز من فوق....والتكييف شغال هتدي سنة بنزين صغيرة وتبص فالعدسة لو شفت الفريون سايل او فيه فقاعات هوا بسيطة بتعدي يبقى الشحن تمام ولو كانت كتير يبقى عاوز تزوده....التزويد بعد ما تعرف نوع الفريون ايه وكنت عملت موضوع عن تزويد الفريون خش هنا تشوف الموضوع ده انا اللي عامله

واية انسب نوع زيت للماكنة عشان هغيرو بعد 200 كيلو يعني اليومين دول

الموضوع ده فيه خلاف شديد جدا...بس هاقول لك على حاجة وهو رأيي الشخصي اللي مبني على تجربة....انا العربية في يوم الميه اتصفت منها وانا ماشي من كام يوم فالحر ومشوار بتاع 150 كيلو لدرجة اني على ما خدت بالي وفتحت الكبوت لقيت الدخان مغطي الدنيا (وكانت هتيجي فالنشرة) المهم اللي نجدني يومها الزيت انه كويس...وانا باستعمل موبيل وان ب 235 جنيه وباقعده 10000 كيلو بس باجيب فلتر ياباني اسمه VIC علبته خصرا ودلوقت ب 25 جنيه وتقريبا مقاس السويفت فيه C110 ودي تتأكد منها من صاحب المحل.....واستعملت برضة شيل هيليكس الترا 10000 كيلو....كان كويس ومش مخللي للعربية صوت....بس يعيبه انه خفيف شوية عن موبيل فباستعمله ساعات فالشتا

وبالنسبة لصوت البيبان في المطبات اية حلة

حله انك تظبط البنوز وكاوتشات الباب عند حد كويس بس هيفضل موجود بعض الشئ برضه

ولو حصل وخمست بالعربية دي في مناسبة مرة في السنة يعني بس بعقل في مشاكل عليها ؟؟؟؟؟؟؟؟

الطيـــــــــــــب أحسن

خلاصة الكلام عاملها كويس هتعيش معاك وهي مش بتاع حركات عشان العربية خفيفة (حوالي 850 كيلو) بدل ما تطيش منك

بجد يا د/ مصطفى انت ملكش احل افدتني جامد جدا

Merci Beaucoup

ومعلش هتقل عليك في سؤالين كدا عشان انا جديد هنا في مصر لاني مولود برا

ولا يهمـــــــــــك

كنت عايز اعرف سعر التربيط على العفشة والترصيص؟؟؟
ولما اغير الزيت الراجل ياخد مصنعية قد اية ؟؟؟
وظبط الفرامل الي قولت علية يكلف كام بردو ؟؟؟؟
وتزويد شحن التكييف يكلف كام؟؟ ولو جبة الفريون من عندي ؟

بص ياباشا....موضوع الاسعار ده بيتفاوت من واحد لواحد ومن بلد لبلد ومن عربية لعربية وقدرتك عالفصال... بس هاقول لك على اسعار اللي باتعامل معاهم
مثلا انا النهاردة مربط عفشة ومركب كاوتشات كوبلن ب 30 جنيه
الترصيص من 4 الى 7 جنيه للعجلة
غيار الزيت بكتيره 5 جنيه
ظبط الفرامل او الرجلشة من 10 ل 20
التكييف ماقدرش افيدك فيه بس بطريقة الموضوع اللي كاتبه متكلف 50 جنيه بالعدة تقريبا على ما اذكر

ولو مسافر مسافة 200 كيلو مثلا و خدت الطريق كلو على 120 على الخامس في غلط على العربية؟؟؟

اللي يحدد الحرارة وحالة العربية والطريق
مثلا انا رحت الزعفرانه ودي حوالي 350 كيلو
فعملت ريست مرة واحدة ربع ساعة وعشان حتى انت ترتاح شوية وتمشي رجلك عشان مترهقش او تصاب بالدوالي
بس يستحسن في رأيي الشخصي انك تخليك على 100 عشان الاقتصاد فالوقود والثبات والامان
ولازم طبعا يكون كاوتشك كويس وضغطه مظبوط عشان تتجنب الحوادث

حاجة اخييرة وانا مشغل التكييف لما بقف مثلا نازل اشتري حاجة بلاقي العربية بترعش على خفيف كدا والا ار بي ام بيطلع وينزل مبيعديش ال 2 يعني ولو لمست دواسة البنزين زودت سنة خفيفة اوي بتروح الرعشة اية الحل؟؟؟؟؟؟؟؟؟

السؤال هو الانتظار شغال وللا لأ.....او هل ده بيحصل وانت فيه حاجة تانية شغاله وللا لأ
ممكن يكون فيه خرطوم مفكوك من الكربيراتير....مش عارف الصراحة

بس انا لسه مركب لعربيتي ار بي ام امبارح (مكنش فيها) واللي ملاحظه ان السلانسية على 800 لو سخنة او 1500 لو بتسخن
لو التكييف شغال وهي سخنة السلانسيه بيكون جنب 1000

وبالنسبة لكشافات انا عايز اقوي نورها شوية ناس قالتلي ركب ليدات والي اعرفو ان في لمبة فيها 20 ليد وفيا مثلا فيها 30 مش عارف اجيب اية وتعمل كام؟؟؟؟

قصدك الورانية؟؟ دي انت تجيب لها لمبات هالوجين الماني 2 بول الواحدة بتعمل من 2 الى 3 جنيه...ودي هتنور كويس وخصوصا لو الستارة اللي حوالين النمر فيها فوانيس ستوب هيبقى عندك 4 زي الفل

وبالنسبة للفلاتر واي زيوت تانية ف العربية او سيور مثلا بتتبدل كل قد اية ؟؟؟؟

وده كمان رأي شخصي....أنا باعمل صيانة كل 10000 ومحتواها كالتالي
غيار زيت المحرك....موبيل وان ب215 جنيه 4 لتر
فلتر زيت المحرك....باجيب نوع اسمه VIC ياباني علبته اخضر زيتي من 20 الى 25 جنيه عشان يستحمل انه يقعد العشر الاف كيلو
سير الدينامو....وده من 15 الى 20 جنيه ....كوري
طقم بوجيهات.....باجيب دينسو ياباني 28 جنيه
فلتر بنزين ب 10 جنيه
رجلشة الفرامل وصنفرة التيل وفحص الطنابير بالنظر
ظبط الكربيراتير والكهربا

من الحاجات المهمة جدا انك تبدل الاطارات....تبدل الشمال واليمين مع بعض او اللي قدام مع اللي ورا....عشان التآكل يبقى منتظم
كل ده باعمله ب 40 جنيه مصنعيه و5 للصبيان

فلتر الهوا يتغير كل 20 الف ولازم تنضفه بالهوا المضغوط مرة كل شهر بالكتير فالبنزينة بنص جنيه

سير الكاتينة ب 65 جنيه ويتغير من 30000 الى 40000كيلو وفيه منه الماني وياباني وده لااااااااااااازم من محل ثقة
زيت الفتيس كل 50000 كيلو


انا طبعا بسئل على الاسعار لاني جديد في مصر ومش عايز حد يضحك عليا


وسؤال اخير بنزين 80 غلط على العربية ؟؟

انا ماشي بالعربية 30000 كيلو في 10 شهور ببنزين 80
اهم حاجة ان الكهربا والكربيراتير والبوجيهات كويسة وتخللي بالك في السواقة انك متخليهاش تصقف....يعني لو لقيتها بتكركر تروح على طول ساند بسنة دبرياج وهو لو انت مش متعود عليه هيضايقك حبة مع التكييف
التصقيف او الكركرة هي مشكلة ال 80
وعلى فكرة انا عندي ال 90 و 92 العربية بتاكلهم يعني تكلفة من كل ناحية

انا اسف اني مطول عليك بس بجد دي فرصة نستفيد من خبرة حضرتك
ولا يهمك يابرنس واي توضيح مطلوب اسأل ومتتكسفش

ممتاز د. مصطفي