الموضوع: الى خبراء سيات قرطبه

المشاركة الأصلية كتبت بواسطة beihoo

أيوه سامح يقصد سعر الزيرو لكن سعر كسر الزيرو بيعتمد على العرض و الطلب و العربية مشيت أد إيه و حالتها شكلها إيه.

في نقط أحب ألفت نظر حضرتك ليها في القرطبة:

- موتور فولكس فاجن 1600 بقدرة 105 حصان و العزم 153 نيوتن متر .. القوة الحصانية هنا هي قوة الموتور و هو في العربية ولو جيت تبص على الحصان الكوري -المعلن من الشركات الكورية- فهو غالبا قدرة الموتور الخالصة بدون التركيب على السيارة و بفرض أن شيفورليه التزمت بالمعايير الامريكية فالملاحظ أن الفرق في العزم في العربيتين لصالح القرطبة -الاوبترا 150 نيوتن متر- فالموتور ليس نقطة تفوق للاوبترا لكن إذا تكلمنا عن العمر الافتراضي المتوقع للموتور فأعتقد القرطبة تكسب.

- الجير بوكس في القرطبة متطور عن الاوبترا فتيس 6 نقلات "تيبترونك" -الاوبترا 4 نقلات فقط- موفر في إستهلاك الوقود و مريح جدا للموتور في السرعات العالية -العربية عند سرعة 140 كم بيبقى ال rpm عند 3100 تقريبا- دا غير النقلة الاسبورت اللي بتغير أداء العربية بشكل كبير.

- سعر إعادة البيع خادع لأن السوق مليان متغيرات منها على سبيل المثال إنخفاض الجمارك على العربيات الأوروبي تدريجيا مما يعني إنخفاض اسعار قطع الغيار و بالتالي أنخفاض تكاليف تشغيل السيارة دا غير معدل استهلاك قطع الغيار و البنزين اللي ممكن في النهاية يخلي اللي هاتكسبه في إعادة البيع تخسر في فرق الصيانات و البنزين. فارق استهلاك البنزين (8.1 - 6.7 = 1.4 لتر كل 100 كم لصالح القرطبة) و بفرض إنك هاتبيع كمان 5 سنين و بتمشي 20 الف كيلو في السنة و بتحط بنزين 92 يبقى في القرطبة هاتوفر حوالي 2600 جنيه دا لو بنتكلم على متوسطات الاستهلاك لكن لو بنتكلم عن السواقة داخل المدينة يبقى (11.4 - 9.3 = 2.1 لتر كل 100 كم لصالح القرطبة) و بنفس الحسبة السابقة يبلغ التوفير في الوقود على مدار 5 سنين حوالي 3900 جنيه! كنت شفت مشاركة لواحدة معاه أوبترا زيرو و كانت بتعمل 140 في الصفيحة و من غير تكييف! و طبعا ده معدل أكبر بكتير من اللي استخدمته فوق حسب البروشور بتاع الاوبترا و لو حسبنا عليه يبقى التوفير حوالي 14300 جنيه في 5 سنين !!! يعني لو كمان خمس سنين هانبيع العربيتين و فرق السعر هايكون 10 ألاف لصالح الاوبترا يبقى الفارق الفعلي حوالي 6100 جنيه دا من غير حساب الفوارق في الصيانات و استهلاك قطع الغيار .. أخر حاجة في النقطة دي صيانة القرطبة حسب الكتالوج كل 10 الاف ميل يعني تقريبا كل 16 ألف كم و دا يبين إعتمادية العربية و كفائتها في التشغيل.

- القرطبة كمالياتها مش قليلة و خاماتها متميزة و التقفيل و العزل ممتازين. الكماليات حسب ما شفت في البروشور بتاع الاوبترا مش أكتر غير في الفوجات و الزجاج الملون و القرطبة تتفوق في فتحة السقف و السي دي أم بي ثري و 6 سماعات و فتحة aux-in غير حساس مطر لضبط سرعة المساحات و التحكم في ارتفاع المصابيح الأمامية و الشنطة الأكبر بحوالي 80 لتر و إن كانت الاوبترا تتفوق في المساحة الخلفية لزيادة طول قاعدة العجلات. لو فيه حاجة تانية غير كده و مش مذكورة في البروشور فاعذرني لأني معرفش عنها حاجة.

- لو بفرض إنك مش هاتبيع بعد 5 سنين .. أعتقد إن القرطبة ساعتها هاتكون في حالة أفضل كعادة سيارات الصانع الاماني.

-قطع الغيار في القرطبة -ميكانيكا و كهرباء- متوافرة بنفس ال part number عند سكودا و فولكس ناهيك عن سيات. الاوبترا ممكن تكسب في توافر قطع الغيار الغير أصلية.

ملحوظة أخيرة .. الاوبترا هي الدايو لاسيتي و تم تسويقها تحت اسم شيفورليه أوبترا بعد إنتقال مصنع دايوو لملكية شيفورليه .. لا أقصد التقليل من السيارة لكن من الواجب توضيح أصلها لأن هناك فارق معروف بين سيارات فولكس و سيارات دايو.

اولا متشكر جدا على رد حضرتك .... ثانيا اسمح لى ابدى اعجابى باسلوب وتفكير حضرتك المنطقى والمتسلسل والذى ينم على انك فاهم
اخيرا احب اوضح انه على الرغم من امتلاكى للاوبترا بس انا معجب جدا بالسيات القرطبة وعموما الالمانى مش محتاج شهادتى بس انا شايف ان الى يفكر يركب قرطبة تكون 1600 مش 1400 سى سى وخصوصا لو اتوماتيك بالاضافة اعتقد الكماليات فى ال 1600 اكتر زى فتحة السقف والفرامل اabs ..... شكرا ليكم مره تانية