الموضوع: العربيه والمطبات الحلو بتاعه بلدنا

شوف مساعدين العربيه ولو وحشه غيرها و هات اتنين جداد ما تجيبش استعمال.
لو المساعدين سلليمه يبقي الموضوع عندك شويه جلب و حاجات بسيطه ما تقلقش منها.

طيب معلش يا حازم اعرف انا اكشف علي المساعدين ولا اروح للمكانيكي (اشتغل نفسي ولا اروحله يشتغلني ) وقولي موضوع الجلب ده عشان ابتديت اتجنن

اضغط علي كل طرف من اطراف العربيه لو لقيت العربيه بتطلع و تنزل بسهوله جدا يبقي المساعد اللي في الطرف دا وحش .
لو لقيت انها بتطلع و تنزل بتقل يبقي المساعدين تمام.
و بعدين تروح لعفشجي يجرب العربيه ممكن تكون في جلبه بايظه او بطاحه مساعد علشان الحاجات دي مش بتتشرح لازم تسمع الصوت كويس و تعرف هو جاي منين و بعدين تبدا تفك و تشوف ايه اللي بايظ بالضبط

معلش سؤال اخير انا عارف انا بتقل عليك
يعني انا لو سيبتها كده يحصل حاجه انا بخاف كتير من المرواح لبتوع العفشه وكده

و انا كمان بخاف كتير لما بسمع صوت في العفشه.!!!!!!!!!!!!!!!
بص يا احمد العربيه مهما كان التقدم اللي فيها و التكنولوجيا اللي وصلت ليها ف كل اللي بيربطها بالارض هما الاربع عجلات اللي ماشيه عليهم.!!!
فهمت قصدي؟؟
يعني لازم الاربع عجلات و باللي ماسكهم يكونو تمام و سليمه ميه الميه.
لو ما روحتش لبتاع العفشه انا ما اضمنش ايه اللي ممكن يجري في العربيه ما جايز لا قدر الله صاموله واحده بس تفك و يجري ما لا يحمد عقباه.
فنصيحه روح لعفشجي كويس يكون حد معرفه مجربه قبل كده و بيشكر فيه

لا خلاص انت خوفتني كده انا هانزل النهارده بأذن الله للعفشجي وربنا يستر ولو قالي حاجه هاجي اقولهالك وانت تطمني

بارك الله فيكم