السلام عليكم جميعا ،

كملت بالعربية 25000 كم قبل العيد بحوالي أسبوع و طبعا كان لازم الصيانة الدورية قبل الأجازة و السفر فاشتريت كل الفلاتر أصلي من الشهابي ( زيت و هواء و بنزين و تكييف ) و أجلت تيل الفرامل لصيانة 35000 كم ان شاء الله لأن الفرامل كويسة طبعا مش زي حالتها عند استلام العربية ولكن ممكن تستحمل للصيانة الجاية.

حاولت الاتصال مرارا بكبير الفولكساوية م / أسامة موسى لترتيب موعد في مركزه الخاص للصيانة طبقا لوعدي له بذلك و لكن موبيله كان مقفول باستمرار و توقعت انه معتكف آخر 10 أيام من رمضان.

روحت لمحمد سمير و عملوا صيانة ال 25000 كم كاملة مع تربيط العفشة و الزيت طبعا و أصروا على تغيير البوجيهات الأصلية بأخرى NGK اليابانية لأنها ماينفعش تكمل لغاية 35000 كم مع التيل و طبعا كنت رافض بشدة أركب بوجيهات غير الأصلي ولكن كان صعب جدا ارجع تاني للشهابي مصر الجديدة علشان أجيبها فوافقت و قلت أجرب و أشوف تأثيرها على أداء العربية و غسلوا المحرك كويس جدا و أخيرا فحص العربية عن طريق جهاز الفحص الخارجي لكل جزء في العربية - كهرباء و موتور- حتى اللمبات و الحمد لله بدون أكواد أعطال. المهم نيجي للحساب :
1- زيت محرك شيل ألترا 275.00 جنيه
2- طقم بوجيهات NGK 80.00 جنيه
3- غسيل محرك 20.00 جنيه
4- اسبراي 10.00 جنيه
5- مصنعيات ميكانيكا 120.00 جنيه

الاجمالي 505.00 جنيه و طبعا يضاف اليهم قيمة الفلاتر من الشهابي في حدود 250.00 جنيه مش فاكر بالظبط للأمانة. لو حسبنا ان صيانة ال 5000 كم كلفتني 350.00 جنيه مع صيانة 15000 كم كلفتني 425.00 جنيه بزيادة 75.00 ج عن صيانة 5000 كم تكلفة الفحص بجهاز vag com يبقى اجمالي تكلفة الصيانات و الفحص و قطع الغيار للسيارة في سنة كاملة - استلام السيارة 9/2008 - مجموع و قدره 1530.00 جنيه تصل لحوالي 1600 جم باكراميات العمال في الثلاث زيارات.

أداء العربية من ناحية السحب اختلف تماما مع البوجيهات الياباني و واضح جدا ان السحب أحسن و استجابة الموتور للكيك داون أفضل بكتير- بس لسه معدل استهلاك البنزين في حدود 220 كم كمتوسط بمعنى 11كم / لتر طبقا لكمبيوتر العربية وأكيد تغيير فلتر الهواء له دور في كفائة السحب المحسوسة بشدة.
و برضه عندي احساس - قد أكون مخطىء - ان صوت الموتور علي عن الأول و ده أصلا من ضمن عيوب الجيتا ان صوت الموتور مسموع جوه الكابينة ودي مسألة تصميم وليس عيب في عزل الموتور لأن فولكس كشركة مش محل نقاش في موضوع العزل ده بصراحة. ولكن بأمانة موضوع صوت الموتور بينرفز و خاصة مع المقارنة مع سيارة والدي الكورولا ، مفيش صوت للموتور خالص.

كفائة التكييف أحسن بكتير جدا بعد تغيير الفلتر و ليس مجرد تنظيفه بالهواء و دي نصيحة مني بتغييره كل سنة.

أنتظر تعليق م / أسامة على جزئية البوجيهات ال NGK و تحت الأمر في أي استفسار اضافي.

خالص احترامي للجميع.

محمد حمدي