الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

المشاركة الأصلية كتبت بواسطة razor_2004

مبروك يا باشا على الرخصه
انت شتت نفسك جدا بين 505 و 405 و 504 و 127 و سويفت و برايد و عربيات كتييييييير اوىىىى صلى صلاه استخاره الاول و ربنا يوفقك

مساء الفل

والله يبارك فيك

انا فعلا حاسس انى مشتت جدا
انا صليت صلاة استخارة فعلا اكثر من مرة

يمكن عشان دى اول مرة اشترى فيها سيارة

وكمان
زمان كان الواحد لما يفكر يشترى سيارة مافيش امامه غير الفيات والبيجو والمرسيدس ....
طبعا المرسيدس "انسى" موش اى حد يركبه
والبيجو كان الاسد الحقيقى وبرده مافيش حد يحلم انه يشتريه ودلوقت بعد ان اصبح يقول "ارحموا عزيز قوم ذل" ... تخيل برده الواحد متردد موش عارف ليه

واحد قريبى قال لى كل العربيات دى ورق ومافيش غير البيجو عشان ما تتعبش نفسك خصوصا الـ 505 وكان معترض على الـ 504 فقط بسبب شكلها ... وكان بيقول دلوقت مافيش حد بيركبها غير "المعلمين" ... هو شايف كده
قلت لنفسى : يمكن بسبب انه عايش فى الخليج منذ مدة طويلة قوى

العربيات التانية كلها عربيات ظريفة اعتقد
لكن شوارعنا اعوذ بالله

لو اشتريت العربية القوية مثل البيجو مثلا 504 او 505
تصطدم بموضوع استهلاك الوقود والاحلال اللى الناس مغرقة الدنيا بيه اشاعات واللى يقولك دى كلها عربيات شقيانة ومشدودة وكانت شغالة تاكسى وصعب تلاقى حاجة بيتى "نادر"

واذا فكرت فى السيارات الصغيره الموفرة للبنزين واللى تبعدك عن شبح فكرة الاحلال اللى مخوفين بيها الناس ... تفتكر الطرق والمطبات والمتروهات والشوارع الجميلة عندنا اللى ممكن تفك اجدع عفشة عربية

وفى الآخر تجد ان مافيش اثنين يتفقوا على راى واحد
اللى عايز القوى الاصيل مثل البيجو
اللى عايز الصغير الموفر مثل الـ 127
اللى عايز الجديد الحديث مثل الـ كيا برايد والسويفت والبولو والايبيزا والاكسيل

كل واحد وله دماغه

انا عايز
القوى
الحديث
الموفر
والرخيص
ههههههههههههههههههههههههه ههههههههههههههههههههههههه
طماع قوى ... عايز كل حاجة
وكمان عايز اللى السيارة المقنعة .... يعنى خايف اجيب حاجة ... تلاقى الناس تقولك احنا موش قلنا لك خليك فى كذا احسن لك
ما دى عربية غالية عليك وكلفتك مصاريف

واذا جبت الرخيص
الناس تقول لك يا اخى ما دام ربنا فتحها عليك ليه جبتها بس انت ناقص عربيات تعبانة وكل شوية مصاريف
ههههههههههههههههههههههههه ههههههههههه

واذا جبت القوى
الناس تقول لك يا عم حرام عليك حد يجيب عربية بالشكل ده برده ماجبتش حاجة ليه من الاشكال الجديدة وتخلى البيت يفرح
ههههههههههههههههههههههههه

واذا جبت الحديث
الناس تقول لك يا عم العربيات دى كلها ورق من الآخر واحسن حاجة فيها العربيات اللى فوق الـ 42 الف مثل اللانوس والاكسنت واحسنهم كلهم الابترا اى حاجة خلاف كده ورق وهاتطلع عينك
ههههههههههههههههههههههههه هههههههه

الكلام الوحيد اللى الواحد مقتنع بيه
انك تشترى "زيرو" وعربية تكون اكبر من "الماروتى" ... لكن انا لا احب الاقساط وخصوصا طبعا الربوية وعايز اركز فى اكل عيشى انا والعيال
ههههههههههههههههههههههه

على فكرة هاتلاقى ناس كثيير قوى بالشكل ده

بكره انا نازل السوق انا وصديق لى
هانتفرج تانى وناخد فكرة
بس انا قلت له افرض اننا وجدنا حاجة كويسة وفرصة ايه العمل

قال لى ربنا يسهل بس ننزل ونتفرج
والحاجة الكويسة هى اللى هانجبها

انا قلت له : برده نشوف البيجو عشان تعرف انا كلامى صح ولا لأ

ده انا عملت قاعدة بيانات للعربيات كلها خصوصا البيجو
وموش متصور بعد كل ده انى ما اشتريش بيجو

ربنا يهدى

بسم الله الرحمن الرحيم

اسلام حبيب قلبى
مساء الفل والورد والياسمين

الله يبارك فيك وفى كل احبابك واصدقائك

النهاردة الصبح الساعة 10 صباحا ذهبت انا وصاحبى "راجل مية مية" بمعنى الكلمة
الراجل عدى على فى البيت واخذنى معاه بعربيته "لانوس" الى السوق

اول مرة اذهب الى السوق فى وقت مبكر قبل الصلاة
المهم

اول حاجة وقعت عينى عليها ايه
عربية 505
قلت لصاحبى هى دى الـ 505
كانت مرور الاسماعيلية

كل حاجة فيها جميلة
إلا حاجة واحدة فقط "من وجهة نظرى أنا"
حجم العربية كبير قوى
يعنى بصراحة عايزة شوارع فاضية مثل الخليج
او مدن جديدة
لكن مشى فى شوارع القاهرة وزحمة المواصلات اعتقد تبقى صعبة شوية
وكمان الحالات اللى شوفتها كانت "عادية" موش بحالات مميزة
العربية كبيرة قوى وواسعة من جوة وطويلة "حاجة ماشاء الله"

المهم ثوانى واشوف لك عربية جولف موديل 1989 1300 سى سى
العربية بحالتها وشغالة بموتورها الاصلى
وفرشها الجلد الطبيعى الاصلى بتاع بلدها
ممكن يكون فيه شوية رفايع من جوه عايز تضبيط
لكن فى العموم كان شكلها كويس جدا
طبعا افتكر انها كانت "باب واحد" للأسف
اعتقد انها جولف 1 زى ما بيقولوا والله اعلم
المهم صاحبها كان طالب كام ؟
عايز فيها 31 الف جنيه ... يعنى ممكن يكون طالب فيها 30 الف
الموتور شكله بحالة جيدة وكان فيه شوية تعريق زيت
صاحبها قال ان السبب ان فيه غطاء الجوان بتاعه محتاج تغيير وهو ده اللى معرق الزيت
طبعا ما عرفش غطاء ايه اللى بيكلم عليه

وكمان فى وسط الكلام حاجة ضحكت صاحبى
صاحب العربية قال له: ان قطع غيار الجولف متوفرة ورخيصة
انا طبعا ما عرفش اى حاجة عن قطع غيار الجولف
كل اللى اعرفه ان حاجتها المانى وغالية
لكن معمرة
صاحبى عشان راجل ذكى ومؤدب "َضحك وماردش على الراجل"
طلبنا منه السعر النهائى قبل ما نلف فى السوق
صاحبها تمسك على 31 الف

المهم صاحبى اعجب جدا بالعربية الجولف عاما
هى ما كنتش فى حساباته
لكن عجبته

طبعا شوفت عربية بيجو ولونها الخارجى كان جميل ومعمول فيها شغل حلو
قلت له تعالى نشوف العربية دى
الراجل لسه بيبص على العربية من جوه
قال لى يالا بينا كفاية
دى رشه كل حاجة
اكيد عملت حاجة وصاحبها رشها "برغم ان شكلها كان من الخارج جميل"
والغريب صاحبها كان بيكلم فى 36 الف جنيه "تقدر تقول بجاحة"

بعد شوية شوفت عربية جولف 2 بس فعلا حكاية
ترويش وتضبيط ولون اسود خرافة
وسماعات
وجنوط
وفلتر رياضى
وعفشة رياضية
من الآخر فابريكة
عايز كام يا استاذ
صاحبها طالب فيها 40 الف جنيه
على آخر النهار العربية لسه واقفة زى ما هى ونزل المبلغ الى 38 الف جنيه وبرده ماتبعتش
ماسك جامد ومصمم على المبلغ
بصراحة حتة عربية حكاية

لدرجة بعد ما تعبنا من المشى جلسنا جنبها نشرب شاى ونتفرج عليها شوية ونريح رجلنا

بعد ما فطرنا "طبقين فول بالزيت الحار"
أعوذ بالله
شوية فول "مالهومش اى لازمة" واخذ فيهم 6 جنيه على الفاضى

شفت عربية فولكس بولو
اول مرة اشوفها واركز فيها
العربية يا جدعان حكاية
وفابريكة فعلا اكنها لسه خارجة من الاجانس
مطلوب فيها كام تقريبا برده 40 الف
وموديل حديث بس موش فاكر كام "انسى الموديل على طول بمجرد ما اسمع السعر"
ههههههههههههههههههههههههه هههههه

وشوفت عربية سيات ابيزا
كانت جميلة قوى
وسعرها برده زى البولو

وشوفت عربية هوندا سيفيك "حكاية"
لكن سعرها كان فى حدود 36 الف

واخيرا شوفت عربية تيوتا كورولا
موش هاقول لك اكثر من انها مذهلة
مطلوب كام فى الكورولا
مطلوب حوالى من 36 الف الى 38 الف تقريبا
وكانت موديل 1989 - 1990 - 1991
تقريبا ده اللى انا فاكره
ان العربية التيوتا كورولا كان رائعة الجمال

طبعا كان فيه فولكس بولو على 36 الف
وكانت فاضية
مافيهاش اى حاجة لا تكيف ولا باور
وفيها شوية "مرمات خفيفة قوى" خدوش خفيفة
وصاحبتها ارسلت عامل من عندها عشان يبيع
والزبون عرض 32 الف جنيه
لكان العامل صمم على 36 الف
الزبون طلب منه انه يكلم صاحبتها ويعطى له الحلاوة
برده مافيش فايدة
تقريبا هو كان مضبط نفسه على 35 الف من الآخر
بصراحة الفولكس البولو دى برده جميلة قوى

وشوفت عربية فيات 131
كانت جميلة قوى
ومرفوعة 10 سنين ويمكن اكثر
فابريكة
اكنك شارى ثلاجة وعمرك ما استعملتها
مطلوب فيها كام 27 الف جنيه
لكن موديل كام
موديل 1979

وشوفت عربيات بيجو كثيير ومطلوب فيها مبالغ كبيرة
لكن للاسف الشديد
عارفين كل ما اى حد يضبط فى البيجو
ويركب للعربية اى جنوط وخلاص
ويرفع العربية بشكل غير عادى ومبالغ فيه
بيخلى العربية شكلها اكنها "معلم بجلابية" فى وسط ولاد الناس

احسن بيجو شكلا وموديل
كانت الـ 405
بصراحة وجدت منها كثيير لكن فى حدود اكبر من 35 الف
وحالات كويسة قوى

اخيرا شوفت عربيات سكودا فلاشيا
واغلب الموديلات تقريبا 1996 - 1997 على ما اتذكر
والمطلوب فيها كان 33 الف
واحيانا 31 الف
وفيه واحد كان طالب 27 الف لكن صاحبى قال لى العربية دى موش طبيعية وصوت الموتور موش تمام انا حاسس ان فيها حاجة

وطبعا فيها عربيات كان راكب فيها تكييف
وفيها عربيات فاضية مافيهاش اى كماليات

ووجدت منها عربيات رائعة من الخارج ومن الداخل

لكن للاسف انا ما عنديش فكرة عنها خالص
لدرجة ما عرفش الاسكودا فلشيا دى مين اللى عملها
وما عرفش عنها حاجة خالص

كل اللى انا اعرفه انها مطلوبة
وشكلها كويس قوى
والصاج بتاعها قوى
وعداد السرعة اعتقد انه كان 200 كيلوا

دى صورة التيوتا كورولا "عربية رهيبة" وجميلة قوى وفى البيت عجيتهم قوى ... لكن للاسف مافيش فلوس وكمان عشان تيجى لازم انتظر لحد ما ربنا يفرجها ... وكمان لازم العملية هاتفتح معايا جامد ... والاهم انى ما اعرفش اى حاجة عنها ولا عن قطع غيارها
لو الواحد معاه فى حدود 35
ممكن تلاقى حاجة كويسة موديل 90 او 91




والهوندا السيفيك برده عربية جامدة قوى وحلوة قوى
وسعرها كان فى حدود 36 الف
لكن اللى عرفته ان السيفيك قطع غياره اغلى حاجة فى اليابانى كله


اما الاسكودا فلشيا
شكلها حلو وبيجارى العربيات الحديثة فى الشكل
وصاجها جامد
وموديلاتها حديثة كلها 95-96-97
وسعرها معقول
يعنى النضيف منها ممكن يخلص 30 الف
واللى فيها خدوش اوى اى حاجات خفيفة ممكن تخلص على 27 الف
واجمل لون عليها هو اللون الابيض رائع


طبعا المرة دى كان كل اللى احنا ركزنا عليه
العربيات الجديدة
فليشيا
جولف
بولو
ابيزا
كورولا
سيفيك

كلهم مالهومش حل فى حدود 36 الف وانت طالع ده للحالات النظيفة
يعنى على الركوب
فرش من الداخل ممتاز
ودهان من الخارج فابريكة
ومافيش اى مرمات
على الركوب على طول بدون اى مصاريف

لما وجدت انى صاحبى عجبته الفلاشيا برده
وقال لى انها موش بطالة برده وشكلها حلو
قلت له اعتقد ان عندى جارى عنده عربية فلاشيا وافتكر انى سمعت انه ممكن يفكر يبيعها عشان عايز يركب حاجة "زيرو" زى اخوه ما عمل
وهو كان شاريها من سنتين بحوالى 27 الف من واحد اول يد
وهو ضابط فى الجيش يعنى نص وقته راكنها امام البيت
واذا نزل اجازة ما فيش مشى غير لزيارة والده واسرته فقط لا غير
وركبت معاه مرة لاقيت سواقته هادية وكويسة مافيش "قرص" ولا حركات وماشيه بالعربية جميل وبعقل
يعنى لو الراجل ده فكر يبيع بسعر اقل من 30 اعتقد يبقى كويس بالنسبة للى شوفته فى السوق والله اعلم
واذا ما فكرش فى البيع
يبقى من دلوقتى لحد يوم الجمع اللى جاى هافكر كويس قوى

والبركة فيكم برده نسمع ارائكم القيمة

مع اطيب التمنيات
اخوكم حسين غزالة