الف مبروك يا استاذ حسين على الرخصة
وربنا يرزقك بعربية كويسة
الف مبروك يا استاذ حسين على الرخصة
وربنا يرزقك بعربية كويسة
الله يكرمك يا احمد ويسعدك
ويبارك فيك
واشوفك عريس اد الدنيا
وتفرح بأولادك
والله انا لو عايش بطولى
كنت اشتريت البيجو 504 بدون تردد
لكن اليومين دول بصراحة عمال افكر
اخواتى مافيش عندهم مانع فى شراء بيجو 504
ام الاولاد خايفة شوية من موضوع "اشاعة الاحلال"
هى تقول لى: اشترى اللى انت عايزه
لكن انا حاسس انها خايفة
اتفرجت كثيير قوى وموش لاقى حاجة كويسة خالص
كل الكويس فوق الـ 35 الف
وكل ما افكر فى
ماروتى
او سويفت
او كيا برايد
او حتى دوجان
واقارنهم بالبيجو 504
ما لاقيش اى منافسة بينهم
البيجو تكسب على طول بدون نقاش
لدرجة انى لما اشوف موتور البيجو وهو شغال
احس بالأمان والقوة والثبات
احس ان فلوسك موش هاتترمى على الارض
لما تشوف موتور اى عربية تانية خصوصا وهو شغال
تحس انه موتور لعبة
وتسمع اصوات غريبة
وتحس ان العربية متلصمة
ما عدا
الجولف
التيوتا كورولا
الهوندا سيفيك
السيات ابيزا
الفولكس بولو
مرة اقول لنفسى خلاص ريح نفسك وهات اى حاجة فى التسعينات حتى ولو وحشة
ومرة اقول لنفسى هو انت ناقص عذاب
يا عم سيبك من الكلام الفارغ والمناظر اشترى البيجو وريح دماغك من العربيات المضروبة
اخويا الكبير بعد مناقشة بالامس لحد الساعة 3 بعد منتصف الليل فى التليفون
قال لى خلاص اشترى بيجو 504 او فيات 131
هو نفسه قال لى : انا كان معروض على عربية سويفت بـ 27 الف ولما شوفتها وجدت انها عربية ورق وموش هاتنفعك وخسارة فيها الفلوس
ههههههههههههههههههههههههه هههه
حاجة غريبة وقت الدفع ... "دماغك تلف وجيب يخف"
ههههههههههههههههههههههه
من غير فلوس تفكر كويس جدا ونفسيتك بتكون مرتاحة
شعور غريب اول مرة احسه
ادعى لى
مع اطيب التمنيات
اخوكم حسين غزالة
أقولك على حاجة طول مالنية خالصة لوجة الله وتبتغى الحلال فى افعالك باذن الله ربنا هيوقفلك ولاد الحلال ومش هيضيع مجهودك وتحويشة العمر توكل على الله فهو خير معين واعقلها وستخير وتوكل وباذن الله لن يخزيك الله وربنا يهديك للخير وصالح الامور
مساء الفل يا هيرو
مافيش احلى من الكلمتين دول والله
الله يكرمك
النهارده روحت مشوار لمرور التجمع الخامس ... واحمد ربنا انى رحت المشور ده مع اخويا فى عربيته
ده حتة مشوار .... سفر ... حاجة فظيعة
وانا كنت فاكر انى رايح حى قريب من مدينة نصر ههههههههههههههههههه
المهم المرور موجود فين ؟؟؟
فى آخر المدينة واعوذ بالله بجوار "الترب" ههههههههههههههههههههه
رحت بدرى ... عشان كده جلست على القهوة واكلت سندوتشين وكوباية شاى ... طبعا القهوة ماكنتش موجودة فى التجمع الخامس .... هههههههههههه
القهوة كانت تابعة لمساكن الزلزال .... الله يكون فى عونهم ...يفصلهم عن التعامل والخدمات المحترمة شارع
دول فى مساكن الزلزال ودول فى فيلات وقصور التجمع الخامس
المهم
دخلت المرور ولم اصدق عينى
خلال نصف ساعة بالضبط كنت واخد الرخصة
معقولة
معقولة احنا فى مصر وآخد الرخصة خلال نص ساعة ... موش ممكن
احد الموظفين قال لى ايه رايك فى الفرق بين هنا ومرور السلام ... قلت له مرور السلام الله يسامحهم
دى تعاملهم غير آدمى منتهى قلة الادب
قال لى : لا مؤاخذة يا بيه ده تعاملهم مع الناس زى الحيوانات بالضبط
المهم اهى غمة وانزاحت الله يسامحهم على حرقة الدم
يا ريتنى كنت رحت التجمع او حتى مدينة نصر وامتحنت هناك
وكنت وفرت حرقة الدم وقلة الادب
التفرقة فى التعامل دى بايخة قوى
اكن الناس اللى ساكنة فى الاحياء الشعبية دى موش بنى آدميين
وعشان الواحد نصيبه ياخد الرخصة من التجمع الخامس "لان سكان مصر الجديدة اتحولوا على هناك"
كل امورك تخلص فى ثوان
لدرجة اخويا الكبير كان مضايق من المشوار
لكن بمجرد ما شاف ان الموضوع خلص فى ثوانى
قال لى : والله الواحد يبقى ييجى يجدد الرخصة من هنا احسن
يوم الجمعة القادم ... يوم مصيرى
انا هاعمل زى ما هيرو ما قال
خليها على الله
وانزل شوف السيارة اللى حالتها كويسة
بغض النظر عن نوع معين
اللى تلاقيه كويس هاته
والاهم وده راى صديقى الوفى جدا
ان الواحد ما ستعجلش ويتفرج براحته
لحد ما يجد اللى هو عايزه
عشان كده احنا هاننزل انا وهو وبس
هانروح السوق بعد صلاة الجمعة
الحاجة الوحيدة اللى انا متأكد منها
ان مافيش اثنين متفقين على سيارة واحدة
واجمل راى سمعته من احد الاعضاء هو
ما تشتريش اللى بتحبه ... اشترى اللى منتشر فى مصر
ودى بعض المعلومات اللى قرأتها على السريع فى المنتدى
اكسيل 1500
احلى كماليات وممكن تمشى بنزين 80 او بنزين 90 لكنها بتسخن فى السفر وكمان بتسخن اذا ركبت فيها اوزان ثقيلة
السوزوكى سويفت
تحتاج بنزين 90 وفيها بارومة كثيير
اليابانى منها انتاجه حتى تاريخ 1995 والبارومة قليلة فيه عشان الصاج معالج للصدأ
التجميع المصرى للسوزوكى بدأ فى سنة 1996 وغير معالج للصدأ عشان كده البارومة كثييرة فيها لدرجة ممكن تلاقى البارومة فى سقف السياره ههههههههههههه ... الموتور مصنوع من نوع معين من الالومنيوم لو حصل اى تفويت للموتور صعب انه يتعمل له عمرة والعمرة هاتكون غير مجدية ... والصاج ضغيف جدا خصوصا فى الشنطة لدرجة انه لو اتخبطت العربية من موتوسيكل ممكن "يخرشم الشنطة" ويبهدلها ... الكبالن بتتغير كثير خلال كل سنة ونص تقريبا ممكن تغير الكبالن وثمنها موش رخيص حوالى 800 جنيه الداخلى والخارجى حوالى 500 جنيه ... والاكصدام لا يتحمل اى خبط .. يتكسر على طول
لكن سحب العربية ممتاز ونعومة مثل اى عربية يابانى
كيا برايد
لو العربية بدون تكييف موديل 1996 حتى 1998 ثمنها حوالى 25 الى 28 الف جنيه
لو كانت راكب لها تكييف ثمنها يوصل الى 32 الف جنيه
عربيه جميله واوسع من الفلاشيا وبتوفر بنزين جامد جدا لكن عفشتها غير ثابتة والحل انك تركب لها عفشة سبور ... مع ان فى احد الاعضاء قال : ان العفشة لم يغير فيها اى شىء الا بعد 9 سنين من شراءها
بالنسبة لقطع غيارها غير معمرة ... وصينى
فيات اونو
عربية موش للسفر واحسن حاجة انها للعائلات الصغيرة ولو وفرت لها 100 جنيه كل شهر شامله قطع الغيار " العربية هاتمشى معاك مية مية
اما الاسكودا فلاشيا
عربية لادا فى شكل حديث وثقيلة على الموتور
عشان كده سحب الموتور ثقيل
جميلة جدا من الخارج .. صاج قوى ... موديل حديث ... تابلوه جميل ... قطع الغيار متوفرة جديد ومستورد
ناشفة زى الطوب فى المطبات وبتستحمل
وفى ناس ما بتنصحش بيها
شاهين
قطع غيار رخيصة خصوصا للصاج والفوانيس وتعتبر ارخص قطع غيار فى مصر ... لكن للاسف مضروبة وغير معمرة
ريجاتا
فى منها ريجاتا 85 حصان ودى مصرى
وفى منها ريجاتا 100 حصان ودى ايطالى
افضل موديل ريجات 1990 لكن سعرها غالى ويوصل الى 35 الف ده للنظيف منها والغريب انها تعمل فى الداخلى 200 كيلوا فى الصفيحة وفى الخارجى تعمل 280 كيلوا فى الصفيحة ده اعتقد كلام البشمهندس سبعاوى هو شايف انها اجمل من الـ 131 ده لو لاقيت منها حالة نظيفة
طبعا فيه برده
سيات ابيزا 94
بونتو 94
اونو 94
جولف 87 - 89 .... حلوة قوى بس ماعنديش اى فكرة عنها
تمبرا
على فكرة احنا فى البيت هنا منقسمين
فريق يؤيد البيجو والاصالة والقوة بغض النظر عن الشكل والموديل
وفريق يؤيد اى حاجة جديدة تسعينات للمشى المعقول والخفيف
فى انتظار آرائكم القيمة
خصوصا اللى عنده عربية من الانواع السابقة الذكر
مع اطيب التمنيات
اخوكم حسين غزالة
أستاذ حسين
برضه لسا جواك الحيره والمشكله ان نزول بالشكل ده السوق مش صح
حدد اختيارتك وقول انا فلوسي كذا دول الي علي قدي 1 . 2 . 3
معاك 30 الف
انا شايف انهم مبلغ زي الفل وربنا يباركلك فيهم
وعلي فكره انتا واخد فكره غلط ان الـ 504 اغلي من الـ 505
حاليا الاتنين نفس السعر ويمكن الـ 505 اقل
والمبلغ ده يجبلك حته 505 عاده حالتها 80%
ويجبلك برضه حته 504 عداله بس انتا حدد اختيارك عليها وانتا هتشوف حاجات في الرينج ده
بس انتا انوي لو نويت ان شاء الله هتلاقي الي عايزه
بالمناسبه
الـ 504 (وهتكلم علي الي شايفه هنا في اسيوط) ابتدا يرفع تاني
والي باع بيرجع يشتريه تاني لان الي نزل منه مش عارف يركب غيره
حاول تفكر ومتديش ودانك لحد لانك انتا اكتر واحد تقدر تقرر انتا محتاج ايه
A.Yakout
بسم الله الرحمن الرحيم
مساء الفل على اجدع اعضاء فى منتدى البيجو
النهارده روحت سوق السيارات عشان اشترى بجد ونهائى
لكن حصل تطورات فى منتهى الغرابة
نزلت السوق ومعايا لجنة من ناس بتفهم فى العربيات اثنين من اصدقائى منهم واحد راكب اساسا بيجو 504 ومعاهم اخويا الكبير
المهم بعد شوية لف ودوران ...اخويا الكبير كان مقتنع تماما بالبيجو
وعشان كده صاحبى بعد شوية من اللف "طنش" عربيات بيجو كثيير وماكانش بيروح يتفرج عليها
لحد ما شاف عربية وقبل ما يسأل على ثمنها
قال لى العربية دى مية مية لو لك نصيف فيها خلص على طول
دى فابريكة وفرنساوى اصلى زى الكتاب ما بيقول
عايز كام يا حاج
صاحب العربية : مطلوب ان شاء الله 35 الف موديل 89 وفيها رخصة 7 شهور فاضلين
العربية محتاجة فردتين كاوتش على الاقل
صاحبى قال لى : موش مهم فردتين كاوتش نجيبهم من اى حتة بـ 400 جنيه او حتى قسط
ده ما يعيبش العربية
طيب قول لنا يا حاج كلمة البيع والشرا
آخر كلام 33 الف ونص
طيب انا كل اللى معايا 31
نجيب معاه يمين شمال مافيش فايدة
طيب اتصلت باخويا قال ماشى ممكن نتصرف فى الف كمان
طيب يا حاج تمشى معاك 32 الف وهانخلص على طول
لا يمكن آخر كلام 33 الف جنيه
طيب نخليها 32500
لا يمكن آخر كلام 33 الف جنيه
مافيش فايدة
ارجع للراجل واقول له:طيب يا حاج خد نمرة التليفون بتاعتى عشان لو لك راى تانى كلمنى
الحاج: موش مشكلة انتم معاكم نمرتى ... اللى عايزنى يتصل بى انا موش هاتصل بحد
ماشى
ودى كانت نهاية حتة 504 عشرة على عشرة عمرها ما اترشت بوية لا من برة ولا من جوه على ابوها زى ما بيقولوا
شوية شوفت عربية جولف عشرة على عشرة موديل 86 ومطلوب 32 الف
وصاحبها شاب "سنى" معلهش انا آسف جدا
جلبية وشبشب وذقن
المهم
لفينا شوية فى السوق
والعربيات برده موش اد كده وغالية
صاحبى قال لى انا شايف ان الجولف موش بطالة وحالتها كويسة
تعالى نشوف الجولف الحمراء اللى هناك دى
مطلوب كام يا استاذ
مطلوب 32 الف وموديل 87 ومتسقط لها موتور 1800
صاحبى قال لى : عربية الشيخ انظف منها
ايه رايك لو عجباك نخلص فيها على 31 الف
انا عارف انها ممكن يكون فيها الف زيادة لكن موش مهم العربية فابريكة وعشرة على عشرة
رجعنا تانى للشيخ صاحب الجولف
كلمة هنا كلمة هنا
خلاص نقول 30 ونص
خلاص نكتب العقد
ماشى
طيب اروح البيت اجيب الفلوس وآجى بسرعة
ماشى
اروح البيت اجيب الفلوس وارجع بسرعة
الدنيا خلاص "ظلمة"
نكتب العقود
ممكن نخلى مبلغ 4000 لحد ما تجيب شهادة المخالفات
الشيخ: لأ
ده انا اسيب لكم 500 جنيه بس
يا عم الشيخ فيه حد يعمل كده
ده اى حد بيشترى على الأقل يسيب 3 او 5 آلاف جنيه لحد ما تسجل فى الشهر العقارى
الشيخ لأ
طيب تاخد 29 الف ويبقى لك 1500 جنيه عند التسجيل
الشيخ ماشى
نكتب العقد
طيب ممكن حضرتك ناخد صورة التوكيل
الشيخ : لأ
يا عم الشيخ هو احنا بنقول لك هاناخد التوكيل اللى معاك
الشيخ : انتم معاكم رخصة العربية
يا شيخ: الرخصة موش كفاية احنا عايزين صورة التوكيل لحد بكرة لما تجيب شهادة المخالفات وتسجل فى العقارى
الشيخ : لأ لا الصورة ولا اصل التوكيل
يا عم الشيخ لو خايف روح اسأل اى حد على البيع والشراء
الشيخ : لأ
صاحبى سخن : هوايه اللى انت بتقول له ده
هواحنا اول مرة نشترى
انت بتتكلم على مزاجك
بلاش يا عم العربية دى من اساسه
الشيخ بلاش بالسلامة
صاحبى سخن : وكان هايخبط معاه
احنا لمينا الدور وتركناه ومشينا
صاحبى : انت عارف هو بيعمل ايه لما انت روحت عشان تجيب الفلوس
انا: كان بيعمل ايه
صاحبى : ده فى مسند بين الكراسى فكه واخده
حتى المراية جوة العربية كان عايز يفكها وياخدها
يا خبر ابيض ايه العفانة دى
وبعد كده يقولك العربية محتاجة اثنين مساعدين بتوع الموتور
وكل ده احنا شارين العربية لا راحت لميكانيكى
ولا راحت بنزينة عشان نرفعها
ولا جايب مكيانيكى يطلع له فيها القطط الفاطسة
ولا اى غلاسة مننا ولا قلة ادب
المهم دى كانت مفاجأة آخر الليل
طبعا انا فى الآول كنت فرحان عشان دى اول عربية لى
وكان بصراحة شكلها حلو قوى وشبابى
والسى سى بتاعها حنين قوى 1300 سى سى
وعربية حلوة اعتقد مطلوبة
وقليلة قوى فى السوق
الظاهر ان اللى عنده واحدة ماسك فيها والله اعلم
انا قلت على الاقل افضل من الـ 127 والاسكودا والكيا برايد
وموديل حديث
واعادة البيع فيها كويس فى اى وقت موش هاتخسر فيها كثيير
عايزين الصراحة انا عمرى ما ركبت عربية وعجبتنى
اللى البيجو
لكن بعد ماركبت الجولف ... الاثنين بصراحة حكاية جامد قوى قوى مالهاش حل
اى عربية ثانية
ممكن تكون كويسة لكن موش فى جمال البيجو 504 والجولف والله اعلم
لكن ما فيش نصيب
انا صليت استخارة اكثر من مرة
واخر مرة صليت قبل صلاة الجمعة
شوف النصيب
الحمد لله على كل حال
فى انتظار تواصلكم
مع اطيب التمنيات
اخوكم حسين غزالة
ماتقلقش يا استاذ حسين محدش عارف النصيب فين وربنا يرزقك بحاجه حلوه
خليك في الريجاتا بس حاجة نظيفة والله انا معايا العربية دي ممتازة جدا عالطريق قطع غيارها ببلاش ناعمة في السواقة كمالياتها كويسة عيبها الوحيد انه صعب تلاقي حالة نظيفة بس لو لقيت هي عربية فيها مميزات القديم في قطع الغيار وكماليات ونعومة الجديد
فينك يا أستاذ حسين طمنا عليك وعملت إية فى موضوع العربية البيجو 504 على فكرة الموضوع اللى أنت فتحتة أستفاد منه ناس كتير جزاك الله خيراً