-
أستاذ حسين كل سنة وانت طيب
انت رجعت برضة تشغل نفسك بكلام الناس
هتقولى جديد مميزاتة هتشيل دماغك من الصيانة
بس خد عندك أول حاجه نقل ملكية وتجديد بسعر خيالى عشان المو الترخيص والتجديد ازيد
ابسط المشاكل فى التوكيل حتى تغير الزيوت والسيور والفلاتر ويسلام بعد متعمل صيانة 10000 كم هتروح تغير الفلتر الأصلى بسعر مبالغ فيه غير الزيت وهيذيد عليك مصنعية وضريبة مبيعات 10% ولو عملت اى حاجة برة الضمان بيروح
وبالرغم من كدا عربيات كتير جديدة زيرو بتعطل لسوق التقفيل ومشاكل كتير كهربية غالب
واظن التعامل مع التوكيل فى ظل ظروف مادية غير مرفهة هيرهق جداجداجدا
ثانيا مخاطر الخبطات والحوادث لاقدر الله
ده غير الحسد من الجيران والمعارف
عدم وجود ثبات ولا امان وخصوصا الفرامل وقوة الصاج
اى رش حتى بالخوارج بيخسف بتمن اعادة البيع
القديم بقي
كل عيوبة انك واخد بطيخة مقفولة بس هتتلاشى كل مشاكل الحديث وخصوصا التوكيل
عيوبة التعرض للأعطال وتتلاشى الموضوع ده ازاى عشان يكون معاك عربية بنفس كفائة ماتور الزيرو
انا بتكلم عن اى ماتور فرنسي فقط سواى بيجو او رينو لأنى عارف وواثق فى كفائة الاتنين واعتماديتهم العالية
فى مجموعه حجات دورية بتستهلك فى اى عربية
مجموعة الماتور
منها مجموعة سيور مجموعة زيوت مجموعة اويل سيل
مجموعة عفشا
تيل وطنابير وجلد و بيض
ومجموعة الكهربا
بطارية وكاوتش بوجيهات موبينة مشط الكترونى او كوندنسر وسلوك بوجيهات وفيوزات وكتاوت واتوماتك مارش
كل ده اغلب قطع الغيار اللى بيشتريها اصحاب المستعمل
بالنسبة للفيات اسعارهم فى التراب بس كفائة برضة فى الارض
بالنسبة للبيجو صعب تجيب الفرنساوى وتغيره تانى غالى بس انساه زى الكاوتش الميشلان
طبعا انت شاري عربية مستعملة الحجات ديه استعملها متفاوت يعنى مش مشيين مع بعض
بتركز فى الشرا على المهم البطارية الكاوتش المساعدين المارش كدا لاكن الباقى اعتبرهم هيتغيروا
لو حسبتها هتلاقيهم يعملوا من 2000 الى اربع تلاف
والى هتغيروا هتجيبه اصلى فتنساه
بمعنى العربية تقلت فى الدوارة الصبح طقم بوجيهات بوش اصلى ب80 ج هيعد معاك سنتين او ان جى كاى يبانى ب 30 ج يقعد سنا ويبقى خلاص وهكذا كل مهتعمل حاجة هتعتبر العربية بقت جديدة فى الوظيفة دية
وفيه حاجات مشهتتغير بتاتا
هى ديه كل القصة
-
ومع كدا هتبقى امتلكت فى الأخر عربية زى الزيرو بنيها على ايدك وعلى استعداد تقنيها على طول
وغير كدا هيبقى اكتسبت خبرة فى كل المجلات اللى وجهتها بس زى مقلت لك اهم حاجه تركب قطع الغيار الأصلية انضف حاجه عشان تنساها تانى
وعلى فكرة كل اعضاء المنتدى عملوا كدا
-
بسم الله الرحمن الرحيم
على فكرة يا هيرو
اى حاجة انت بتكتبها اواسلام او ياقوت
انا لازم اقرأها اكثر من مرة "لأهمية الكلام المكتوب فيها"
وعشان عندى رغبة انى اتعلم منكم كل حاجة
بالنسبة للزيوت والسيور والاويل سيل
انا عرفت منكم ان اول ما الواحد يشترى سيارة مستعملة لازم يروح للميكانيكى عشان يغير
كل السيور "سير الدينامو وسير الكاتينة وسير التكييف إن وجد"
ويغير كل الفلاتر
ويغير الزيت
ويعمل لها طقم سيرفيس كامل "ابلاتين وبوجيهات وكوندنسر"
وبعدين يضبط الكاربراتير على طقم السيرفيس الجديد
وإن لموضوع ده يكلف حوالى 400 جنيه "صح الكلام ده"
بالنسبة "للأويل سيل"
موجود فين بالضبط
يعنى اى اويل سيل لازم يتغير
وهى فيها كام اويل سيل
وتكلفته كام
بالنسبة لمجموعة العفشة
حضرتك حصرت اهم اجزاء العفشة التى يتم تغييرها "تيل وطنابير وجلد وبيض"
ده بافتراض ان المساعدين كويسة واليايات كويسة
بالنسبة للتيل "انا عارفه"
بالنسبة للطنابير "يعنى عارفها"
بالنسبة للجلد والبيض "ماعرفش عنهم حاجة"
تكلفتهم كام
وايه العمر الافتراضى للحاجات دى كلها
ماذا عن حشوة الاسكاترة "صديقى بيقولى انه يغيرها من نفسه كل فترة زمنية ويريح دماغه"
تكلفة الحشو ده كام ولازم يتعمل زى ما هو بيعمل ... ولا لما يحصل حاجة نعمله
طيب فيه طبعا اجزاء فى العفشة صعب انها تتغير إلا إذا العربية لا قدر الله عملت حادث
ممكن نعرف اجزاء زى ايه وتكلفتها كام
اما مجموعة الكهرباء
بطارية وكاوتش بوجيهات موبينة مشط الكترونى او كوندنسر وسلوك بوجيهات وفيوزات وكتاوت واتوماتك مارش
يا ريت نعرف العمر الافتراضى للحاجات دى
وكمان ايه المقصود بـ "المشط الالكترونى" وثمنه كام
ايه المقصود "الكتاوت واتوماتيك المارش" ثمنه كام برده وعمره الافتراضى
افتكرت حاجة مهمة
لو سيارة بيجو 504 ثمنها حوالى 30000 الف جنيه
لازم برده يتصرف عليها 2000 او 4000 جنيه على الحاجات دى
معلوماتك قيمة جدا
فى انتظار المزيد منك ومن كل الاصدقاء الاوفياء
شكرا لك يا هيرو
مع اطيب التمنيات
اخوكم حسين غزالة
-
ازاي حضرتك يا استاذ حسين
بص الموضوع ده كنت عامله قبل كده عن الصيانه الدوريه
http://www.nilemotors.net/Nile/97504-128-127-a.html
بالنسبه لباقي الحاجات انت بتشتري العربيه وانت بتكشف عليها بيبقي عندك تقدير مبدئي للعربيه يعني مثلا العربيه بتتكون من موتور -فتيس -عفشه -شاسيه- بودي -توصيلات واجهزه كهربائيه
انت طبعا مش هتشتري عربيه بايظ فيها كل ده لان ده علي حسب استخدام صاحبها ممكن يكون بياكل مطبات تلاقي العفشه محتاجه شويه تظبيط ووانت بتشتري عربيه اكشف عليها عند ميكانيكي وسمكري وعفشجي علشان تعرف العربه محتاجه مصاريف قدايه وتشيلها انت والمشتري وحسب شطارتك في الفصال باقي ما باقي بقي ده للظروف والقدريات ونصيب وبسيط ان شاء الله
بالنسبه لأسئله حضرتك بقي
1-انا عرفت منكم ان اول ما الواحد يشترى سيارة مستعملة لازم يروح للميكانيكى عشان يغير
كل السيور "سير الدينامو وسير الكاتينة وسير التكييف إن وجد"
ويغير كل الفلاتر
ويغير الزيت
ويعمل لها طقم سيرفيس كامل "ابلاتين وبوجيهات وكوندنسر"
وبعدين يضبط الكاربراتير على طقم السيرفيس الجديد
وإن لموضوع ده يكلف حوالى 400 جنيه "صح الكلام ده"
انا هكلمك بالنسبه للبيجو
1-تغيير فلتر هواء (لا يوجد (عمه زيت )
2- فلتر بنزين 5 جنيه
3-فلتر زيت 10 جنيه
4-بوجيهات 30 جنيه
5-سير دينامو 20
سير كاتينه (لايوجد )
طقم كهرباء (ابلاتين وكوندنسر ) 20
زيت موتور (موبيل 3000 كم ) 130
زيت فتيس +كرونه 50 جنيه
احسبها حضرتك وشوف الناتج كام
2-بالنسبة "للأويل سيل"
موجود فين بالضبط
يعنى اى اويل سيل لازم يتغير
وهى فيها كام اويل سيل
وتكلفته كام
الاويلسيلات والجوانات بتكشف عليها عند الميكانيكي وبتبان بمجرد النظر لو فيه تسريب من واحد وغالبا بيبقي مفيش بس اغلي اويلسيل ب10 جنيه وتقريبا العربيه فيها 4
والجوانات 2 جوان واحد ب15 وواحد ب30
بالنسبة للتيل "انا عارفه"
بالنسبة للطنابير "يعنى عارفها"
بالنسبة للجلد والبيض "ماعرفش عنهم حاجة"
تكلفتهم كام
وايه العمر الافتراضى للحاجات دى كلها
التيل بيعتمد علي اسلوب السواقه بس عامه بيتغير عند 20000 كم امامي و60000 خلفي وسعر الطقم الامامي ب50 و20 تركيب والخلفي 80مع خرط الطنابير و20 تركيب
الطنابير وراء بتتخرط مع تغيير التيل وقدام بتتخرط برضه ويوم مايكونوا تعبانين خالص بيتغيروا مش عارف الواحد بكام بس مش غاليه
الجلد والبيض والحاجات دي دي المسئوله عن احساسك بالمطبات وبوش الدريكسيون وكده وكلهم يخشولهم في حسبه 400 جنيه
حشوه الاسكاتره بقي دي مابتتغيرش غير مره في العمرودي بتبقي في الدريكسيون وبتكون مسئوله عن الدريكسيون يبقي ثابت مش بيتحرك مع المطبات او مع نفسه وتقريبا بتكلف 100 الي 150 جنيه
طيب فيه طبعا اجزاء فى العفشة صعب انها تتغير إلا إذا العربية لا قدر الله عملت حادث
ممكن نعرف اجزاء زى ايه وتكلفتها كام
المقصات ودول بيبقوا غاليين في اي عربيه وده الجزء اللي بيبقي ماسكالمساعد والعجله في جسم العربيه وفي البيجو بالذات المساعدين قدام ما بتتغيرش بتتصلح
اما مجموعة الكهرباء
بطارية وكاوتش بوجيهات موبينة مشط الكترونى او كوندنسر وسلوك بوجيهات وفيوزات وكتاوت واتوماتك مارش
اغلب الحاجات ليها عدد كيلو مترات معين تتغير عنده ومكتوبين في الموضوع اللي اديتهولك اما الفيوزات والكتاوت ومش غاليين الفيوز ب10 قروش فقط والكتاوت ب20جنيه بتبوظ لو حصل قفله او كده ومالهاش ميعاد تتغير اول مايبوظ تغيره وسلوك البوجيهات برضه بتبوط اول ما تحس ان فيه خلل مع البوجيهات او مش واصلالها شراره كويس او ممكن تغيهم كل 60000 كم وهما ب50 جنيه الطقم كله
اما بقي الدنامو والمارش فدول بيتعملهم صيانه لما يبتدوا يبوظوا وتحس بخلل في وظائفهم (العربيه مابتقومش الصبح كويس -البطاريه ما بتشحنش -صوت بليه في الدينامو بايظه ) وصيانه الدينامو ب50 جنيها والمارش تقريبا كذلك
وكمان ايه المقصود بـ "المشط الالكترونى" وثمنه كام
المشط الاليكتروني مش موجود في البيجو موجوده بداله بوبينه ودي بتبوظ لما تحس ان العربيه مابتوصلش شراره كويس وبرضه بتبوظ لو رشيت عليها مياه كتير وانت بتغسل الموتور او كده ودي مش فاكر تمنها كام بس رخيصه ماتعديش ال 200 جنيه وبتغير مره ولا مرتين في في العمر
ايه المقصود "الكتاوت واتوماتيك المارش" ثمنه كام برده وعمره الافتراضى
تم الا جابه سابقا
انا حاسس اني طولت عليك في الكلام يا استاذ حسن واي ستفسارات انا موجود وتحت امرك وارجو انك تكون استفدت من كلامي
-
شوف ياسيدى الاويل سيل ده بيبقى ورا التروس المتحركة الخارجة من الماتور ووظيفتة زى الجوان كدا مانع لتسريب الزيت
الماتور بيبأى فيه من 3 ال4 اويل سيل ومبيتغيرش غير لما بيرشح زيت والميكانيكى بيعرف وكمان لو صاحب العربية بشقر من يوم لتانى على العربية هيلاحظ نشع زيت
وكمان الفتيس فية 2 قليل اوى فى البيجو تغيرهم المجموعة الكاملة الأصلى يعملوا 250 بس مستحيل يضربوا كلهم ممكن واحد 2 بالكتير لو فاحت الماتور شد وجرى
خلاف كدا انسي
العفشة بقي المساعدين كدا كدا الأصلى بتعيش جامد ده لو مش هتملاهم
اهم حاجه فى العفشة الجلد
جلد مقصات
جلد بيانو للكبالن
جلد مزيك اللاسكاترا
جلد طعمية للبيض
جلد الدانجل الخلفية
كله كلام فاضى رخيص ومبيتغير كتير بيعيش كتير
هتقولى بقى حشو اسكترا والخرف ده سيبك منه ميتعملش فى البيجو حرام عليك
العربيات ديه مش بتاعت افتكاسات ده شغل سواقين بيلصموا الحاجة عشان تشتغل وهما بيكون هريين الحاجه شغل لغاية متدوب وميسبهاش غير لما تتكسر
اهم حاجة اختبار العفشة عن شراء العربية
فى المطبات نعمة فية اصوات تخبيط او تزييق من تحت او اى نحرات او رعشة او بوش فى الدركسيون
واختبار المساعدين والعربية واقفة بالضغط بقوة فوق كل عجل هل بينزل المساعد بسهولة ولا مقومته معقولة
مجموعة الكهربا مقدور عليها
وتبقى قيم وولد لو تغير الأسبراتير وتجيب واحد الكترونى بمشط ومبينة استيراد يعملوا فى رنج 350
بس هتشتر دماغك لا ضبط كل شوية ولا ابلاتين يلدع ولا كوندنسر يبوظ ولا الخرف ده
نيجى بقى للكتاوت دية وحدة فصل الكهربا عن اى شئ كهربائى مع مفتاح الكونتاك
بمعنى لما تفتح كونتاك كله يتوصل تقفل كله يقفل يعنى للامان
وفيه منها كتاوت زمنية زى التيمر
ومنها كتاوت تقوية كهربا
اوتوماتيك المارش ده عبارة عن لسان نحاس بيتحرك لما تدور مفتاح الكونتاك ويفصل يعنى يدى لدعة تويل للتيار تخلى المارش يدور
وده منه جديد ب 70 ج والأستيراد احسن بكتير وب 50 ج
واى استفسار أخوك فى الخدمة
و عيد سعيد
-
علي فكره يا جماعه هاني فلاينج بيسلم عليكم كلكم
احمد عبد الفتاح واسلام ونور وكل اعضاء العصابه واحشينه جدا جدا جدا
انا مش عايز انسي اسامي حد
بس هوا قالي اسامي كتير اوصلهم السلام
بس انا غصب عني نسيت لان الكلام كان كتير وشامل مواضيع كتير فأعزروني معلش
والمفروض يكون في موضوع مخصوص لرسالته الي باعتهلكم
بس انا حبيت اعمل الموضوع الي هيكون فيه المفاجاه مره واحده
المفاجاه ان شاء الله بنحضرها بعد العيد وهتكون قنبلة منتدي نايل عموما وبيجو خصوصااااااااااااا
وان شاء الله هانت وهيرجع قريب
A.Yakout
-
هوا كان الرد الي فات المفروض يتحط في موضوع التهنئه بالعيد
جات غلط هنا معلش بعتذر بقي لاستاذ حسين
A.Yakout
-
ايه الحلاوة والجمال ده كله
شباب زى الفل
ما شاء الله ولا حول ولا قوة إلا بالله
ربنا يحفظكم يا رب
ويبارك فيكم
ويسعدكم
ماشاء الله ... ماشاء الله
والله اكبر عليكم
ربنا يحفظكم ويخليكم
موش عارف اقول ايه
كلامكم كله كلام ناس كبار
ما فيش حد فيكم بيفتى
كله كلام ناس مجربة وكبيرة
واحسن حاجة بحبها فيكم انكم اجتمعتم على الحب
وكمان معلوماتكم دائما "فريش" وموش فتاوى وخلاص
يعنى كثير من الناس اول ما تسمع كلمة بيجو 504 ... يقول لك : دى غالية دى حاجتها نار موش هاتقدر عليها .. دى البارومة بتجرى فيها بسرعة جدا ....
واللى يشوف اسعار الحاجات المكتوبة
يلاقى ان كلام خلاف كده "يبقى كلام فارغ"
واهم حاجة يتم اثارتها "دى العربية فظيعة فى استهلاك البنزين"
انت احسن لك عربية 127 حاجتها رخيصة وعلى ادك
الكلام ده "بزعل منه ويخنقنى"
يعنى الناس دى كلها ما بتفهمش حاجة
واللى اشترى الـ 127 بيفهم اكثر مننا وانصح مننا
اكيد طبعا لأ
ومرة ثانية احب اقول
موش معنى ان السيارة رخيصة وحاجتها رخيصة ....انها هاتوفر لصاحبها وهاتريحه
عايز رد منكم ضرورى
ربنا يا رب ما يحرمنا منكم
وما يحرمنا من علمكم
ويكون علمكم كله فى ميزان حسناتكم
ويا رب يا رب "تدبحوا عجل كل سنة ..... " هههههههههههههههه تدبحوا عجل او خروف حتى
بس اوعوا تنسونا ههههههههههههههه
كل سنة وانتم طيبين
ويا رب اشوفكم كلكم عرسان
ويرزقكم الزرية الصالحة اللى تكون احسن منكم ههههههههههههههههه
ربنا يخليكم
مع اطيب التمنيات
اخوكم حسين غزالة
-
إهداء بسيط
سورة النبأ ... عشان يحفظها الأطفال
اضغط على الآية لتكرار الإستماع ... حتى يتم تحفيظ الاولاد بالترتيل المضبوط
البرمجة من إعدادى وبصوت كروان الشرق "المرحوم عبد الباسط عبد الصمد"
على فكرة انا عملى الحالى
عمل برامج تعليمية خاصة
ومن ضمن هواياتى ايضا
التصوير الفوتوغرافى
ودى صورة البطبوط اللى عندى
وهى سنتين تقريبا
بس هى طلعت رخصة قيادة قبل ابوها ههههههههههههههههههههههه وبدون واسطة
صورة بالموبايل
http://img187.imageshack.us/img187/5576/b0000578.jpg
كان نفسى اعمل مشاركات فى السيارات تفيد الجميع
لكن هههههههههههههه معلهش انا هاقوم بدور الزبون المشترى فقط
وعملتها لوجه الله تعالى
طبعا الإهداء
لحبيب قلبى
اسلام
وهيرو
وياقوت
وكمان هاشم صديق منتدى البيتل
وكل اصدقاء منتدى البيجو
وكل الاوفياء فى منتدى نايل موتورز
كل سنة وانتم طيبين
مع اطيب التمنيات
اخوكم حسين غزالة
-
بسم الله ماشاء الله ايه ياعم الحلاوة دية
ربنا يبارك فيها ويبارك لها فيك
Content Relevant URLs by
vBSEO 3.6.0 PL2