والأن سيداتى انساتى سادتى وزى ماعودتكم معايا هتلاقوا كل ماهو جديد فى عالم الحوادث .... تاتاتاااااااااا
فى تالت يوم العيد كان ميعادى مع الحادثه التانيه لجينا (لسه مكملتش شهر من ساعه مااستلمت العربيه من بعد الحادثه الأولى) ... نازل من بييتنا لا بيا ولا عليا والعربيه مركونه بقالها يومين تحت البيت محاذيه للرصيف وانا جاى اشيل الغطا من الناحيه الشمال الاقى الغطا مقطع قولت الله يخرب بيت الكلاب ولا القطط اللى قطعتلى الغطا وبدات اتنرفز .... المهم شيلت الغطا وساعتها بدأت انهار .... منظر مرعب العربيه واخده عين محترمه .... قصدى خبطه محترمه فى الباب الخلفى شمال دمرت الباب وبالتالى دمرت الزجاج بتاعه والرفرف اتبهدل ... انا شوفت المنظر حسيت انى كان هيغمى عليا .... ده غير كمان ان نتيجه قوه الخبطه العربيه حكت من الناحيه التانيه من الرصيف فجابت البابين والعتب .... وطبعا الجانى مجهول .... الخلاصه شكل اللى خبطنى عربيه نقل اولا لأن كان فى عربيات نقل كتير موجوده فى المكان وكانت راكنه علشان الشغل واقف فى العيد ثانيا مفيش اى حاجه تانيه ممكن تخبط الباب وتكسر الأزاز بالمنظر ده ..... اللى يهلك من الضحك ويجيب الضغط والسكر فى نفس الوقت ان كان فى عربيه 132 راكنه قدامى صاحبها سايبها سبيل بقالوا 10 سنين تقريبا مبيجيش ناحيتها وكان برضه فى عربيه 128 ورايا ربنا يبارك لصاحبها فيها ... واللى اكتر من كده ان انا ليا مكان معتبر فوق الرصيف وتحت شجره بس للأسف ولأول مره مطلع الرصيف كان مسدود بعربيات النقل ودى اول مره اركن فى المكان ده مع العلم ان الشارع واسع جدا وعمر ماحصلت فيه اى حوادث ولا حتى عربيه اتحكت ..... المهم قررت ابطل حنتفه وروحت اشتريت باب استعمال ب1000 جنيه بعد الفصال وبوس رجل البياع علشان ينزل 600 جنيه وقولتلوا ربنا يجعله فى ميزان حسناتك انا هتجوز بعد عشرين يوم المهم صعبت على الراجل ورضى يديهونى بالف جنيه.. وروحت على التوكيل قالى العمليه هتتكلف 1500جندى غير الضريبه واهى الأخت دلوقتى مشرفه فى التوكيل بفكر اعمل معاهم اشتراك زى بتاع الأتوبيسات علشان الحوادث اللى جايه وخصوصا بتاعه قبل الجواز بخمس ايام انا حاسس انها جايه جايه ..... وزى ماعودتكم فى الحوادث السابقه الأن هنطلع بالدروس المستفاده
1- ماتركنش فى اى شارع فيه اى عربيه نقل راكنه
2- حاول تعمل نوبات حراسه لعربيتك باستخدام البودى جاردات او حتى قوات من الجيش مع عمل حفر كبيره حوالين العربيه لمنع وصول اى سياره اليها حتى لو معرفتش تطلع بعربيتك بعد كده بس اهم حاجه انها متتخبطش.
3- خللى بالك من عربيتك اوى وخاصه انك هتتجوز بعد 20 يوم ولسه قبل متعرف موضوع الحادثه بتفكر هتستلف من مين علشان تجيب بدله الفرح بدل متروح فرحك ببيجامه كستور (وشكله ده اللى هيحصل بعد الحادثه ماحصلت ده ان مضطريتش انى ابيع البيجاما ذات نفسها)
4- اللى يعمل حادثه تانيه وهو لسه مااخدتش من التأمين ال 14200 جندى بتوع الحادثه الأولانيه ... يستاهل كل اللى يجراله
5- تعاطفك لوحده مش كفايه ... اتبرعلى ولو بجنيه ولك الثواب والأجر عند الله ..وزى مافى مستشفى 57357 دلوقتى انا عملت جينا 58358 اظن مالكمش حجه دلوقتى

وللى ماتابعش الحادثه القديمه ده اللينك بتاعها علشان تتابع المأساه من اولها
http://www.nilemotors.net/Nile/88429-a.html