الموضوع: التاكسي الأبيض أبو عداد و سرقة عيني عينك

هو مشروع كويس.. بس لازم تفتح عينك كويس أوي و انت راكبه عشان ما تتسرقش و برضه كله بالعداد.

اليومين دول مش باقدر آخد العربية كل يوم للشغل، فباخد التاكسي الأبيض أبو عداد. النهاردة أخدته من ميدان لبنان لحد بيتنا قبل معهد ناصر بشوية ع الكورنيش. المشوار ده بيعمل له 11 أو 12 جنيه، آخره 13 جنيه لو الدنيا زحمة و سواق التاكسي لف بية شوية في طرق مش زحمة. النهاردة قبل ما أنزل بابص ع العداد لقيته عامل 19 جنيه

سألت السواق: هو العداد ده مظبوط؟
- آه مظبوط
- مستحيل يكون مظبوط، انا باركب التاكسي اللي بعداد ده على طول و آخره لو عمل 13 جنيه يبقى كتير.
- ما تنسيش برضه ان الدنيا زحمة و الزحمة بتتحسب عليكي
- مع ان ده مش مظبوط، بس الدنيا النهاردة مش زحمة خالص و المشوار أخد ربع ساعة بس
- بس أهو حضرتك شايفة العداد و باقول لك انه مظبوط
- باقول لك مستحيل يكون الرقم ده صحيح و انا مش هادفع اللي انا شايفاه في العداد ده لو حصل ايه
- ماهو أصل حضرتك راكبة و العداد كان فيه 4 جنيه.. مش باقول لك مظبوط
- قلت له آه كده معقول شوية، قوللي كده من الأول عشان ما أفكرش في حاجات تانية
- لا حاجات تانية ايه؟ اهو ده الكلام اللي يزعل
- لا يزعل و لا حاجة، بس انت ليه ما صفرتش العداد أول ما انا ركبت؟
- معلش نسيت
- نسيت و انت عارف هو كان عامل كام جنيه بالظبط لما انا ركبت؟
-.....
- ماشي، يعني انا دلوقتي مطلوب مني 15 جنيه؟ مااااااشي.. مع إنه برضه مش مظبوط.. بس مااااااااااشي
- تاني كلام يزعل أهوه
- سيبنا من اللي يزعل و اللي ما يزعلش، بس ياريت تتقي ربنا في لقمة عيشك، انا على فكرة لما العداد بيعمل 12 أو 13 جنيه ساعات بادي 15 و اسيب للسواق الباقي.. يعني ال15 جنيه دول كانوا كده كده جايين لك، بس كان الأحسن انك تاخدهم بالحلال
- ضحكة صفرا و صمت.

و نزلت على كده، بس أخدت درس إني لازم أول ما أركب ابص ع العداد و اشوفه متصفر و لا عامل فلوس. لام ما تتطلعش بالتاكسي من دول إلا لما تلاقي العداد بيقول 2:50.

مرة تانية شاورت لتاكسي من أبو عداد برضه من عندنا عشان أروح مدينة نصر، كنا في رمضان قبل الفطار، لسه باركب معاه فبيقولي بتدفعي كام بأه؟ قلت له نعم؟ هو ده مش بالعداد و لا ايه؟ قاللي آه بالعداد، قلت له ماشي زي ما يعمل العداد هادفع، قطبعا سكت. يومها الدنيا كانت فاضية فالعداد عمل 18 جنيه.

خدوا بالكوا اوي يا جماعة من التاكسيات دول فعلا اللي ما ياخدش بالي يتسرق كده عيني عينك.