الموضوع: مراكز الخدمة والصيانة (شركة مصرية)

اولا مبروك العربية

ثانيا المهم العربية عاملة كام كيلو متر و لو مع حضرتك تليفون البائع بس اسأله ايه الصيانات اللي عملها للعربية في الفترة الأخيرة

لأن صيانات العربية بتكون كل 10 آلاف كيلو متر واساسها تغيير زيت المحرك وفلتر الزيت وغير كده فيه صيانة تقيلة عند الأربعين ألف كيلو متر بيتغير فيها: فلتر البنزين وزيت الفتيس لو كانت اوتوماتيك والبوجيهات وفلتر الهواء ، وصيانة التمانين الف بيتغير نفس الحاجات بالاضافة الى سير الكاتينة ومجموعة السيور

فمن الآخر حسب كيلو متر العربية بيتم تحديد العربية محتاجة ايه فمثلا لو العربية عاملة 85000 فلازم تسأل البائع هل عمل صيانة التمانين ولا لأ وهل غير سير الكاتينة ومجموعة السيور ولا لأ

بخصوص الكيلو متر فزي ماقلت لحضرتك ان فيه صيانة الأربعين وهي اول صيانة تقيلة بتتغير فيها حاجات كتير وطبعا ده لمصلحة العربية للمحافظة عليها فلو مكانش غيرها لازم حضرتك تغيرها وهي زيت الفتيس الاوتوماتيك وفلتر البنزين وفلتر الهواء والبوجيهات

بخصوص السخونة اللي جاية من جنب الفتيس ( ودي بتحصل للفتيس الاوتوماتيك فقط) فيه كتير سألوا عنها قبل كده وهي طبيعية جدا وسببها ببساطة لمبات النور اللي على جانب الفتيس

علشان حضرتك تتطمن محتاجه كشف يعني مثلا كشف على زيت الفتيس هل جديد ولا محروق يبقى لم يتغير - فلتر البنزين صعب الكشف عليه لأن مكانه سخيف تحت الكنبة داخل التنك انما فلتر الهواء سهل الكشف عليه

الفنيين العاملين في مراكز الخدمة السريعة هم نفسهم الفنيين العاملين في مركز الخدمة الرئيسي في قليوب حيث يتم تبديلهم مع بعض كل عدة شهور يعني هم موظفين في التوكيل مش في محطة البنزين

المشاركة الأصلية كتبت بواسطة demha

معلشى ياجمااعة هو فيه فرق بين المصرى والخليجى علشان يبقى لكل واحد مختص صيانة معين ؟؟؟

وياريت حد يفيدنى لأنى عاوز اعمل صيانة لعربيتى وهى خليجى

وشكرا على تعاونكم المبهر

هو الفرق هنا فرق الضمان مش الصيانة

يعني اللانسر المصري (استيراد الوكيل المصري) ضمانها تبع شركة مصرية (الوكيل) ومراكز الخدمة المعتمدة المذكورة في اول الموضوع اللي من ضمنها مراكز الرواس الأربعة

الخليجي (استيراد تجار مصريين من الخليج) ضمانها بيختلف حسب المستورد وهو بيحدد الضمان تبع مين واشهرهم ضمان الرواس

اما الصيانة فهي بتتعمل للمصري والخليجي والآردني وغيره في التوكيل وغير التوكيل

طيب عربية حضرتك خليجي .. اول سؤال هل هي لها ضمان؟ وتبع مين ؟وهل هي في فترة الضمان؟
بمعنى لو هي ضمان الرواس وما زالت في فترة الضمان .. فشرط الضمان هو عمل الصيانات الدورية في مراكز الخدمة التابعة لصاحب الضمان
اما لو كانت بدون ضمان او انتهت فترة الضمان فممكن تعمل الصيانة في اي مركز خدمة سواء التوكيل او الرواس او اي مركز ترتاح له