النهاردة كان ميعاد تسليم حبيبة قلبى عربيتى للتوكيل عشان صيانة الأربعين ألف
طبعا أنا حاجز بئالى أسبوعين كالعادة
و كان لية شوية ملاحظات و أنا باسيبلهم العربية:
أولا أنا سامع صوت تخبيط فى العفشة من الأمام بئالى بتاع 20000 كيلو
و برضه بحس بغربلة مع الفرامل على السرعات فوق ال100 ك\س
و ده إلى جانب الصفارة و الحكة العجيبة مع الفرامل من فترة طويلة (وكل ماروحلهم يقولولى تراب وكلام فاضى من دة مع إنى كنت مصر إنها الطنابير)

المهم كلمنى المهندس سامح من شوية و قال إنهم حيغيروا الطنابير و إن التيل الأمامى لازم يتغير معاها (التيل طبعا على حسابى)
التيل بخمسمية و شوية!!!!!!
و قال كمان إنهم غيروا البطاحات الأمامى لإنى إشتكيت من صوتها
و المفاجئة إن التيش الأمامى يمين (جزء من نظام التوجيه فى العربية) محتاج يتغير!!!! بس مفيش منه حاليا فلازم أحجز معاد تانى كمان أسبوعين لتغييره!!
ده طبعا إلى جانب صيانة الأربعين ألف و إلى هى تغيير زيت موتور و فيلتر، تغيير زيت الفتيس!!!!!!(ليييييييييييييي يييييييييييييييييييييييه) ، تغيير فلتر الهواء التعبان بتاعهم.
القصة هى إن الأسعار فى السما، دى يمكن تكون أغلى من أسعار HFP إلى فى أمريكا!!!
المرة الجاية إن شاء الله أنا حبعت أجيب التيل و الفلاتر والكلام ده من أمريكا.
بالمناسبة صحيح، حد عاوز حاجة من أمريكا؟ فى واحد قريبى مسافر على شهر يناير القادم، بلاش حد يئولى جنوط بس! حاجة سهلة الحمل خفيفة الوزن صغيرة الحجم.