الحمد لله استلمت امبارح رينو لوجان فضي فول اوبشن من عند محمد زكي و منتظر الورق بتاعها و اخيرا بقيت لوجاناوي

تقييمي المبدئي و الاول في المنتدى على اللوجان علما باني سقتها مسافة صغيرة من المعرض في القطامية لحد البيت عند الحي السابع كدة

العربية ناعمة جدا جدا و مريحة جدا و وسعها مش طبيعي

تكيفها راااائع و محستش بفرق في السحب بتاع العربية (لما الدنيا فتحت لان امبارح كانت الزحمة مش طبيعية)

دبرياجها مريح جدا خصوصا اني جربتو في الزحمة

الكلاكس بتاعها صوته مزعج جدا و كنت مشفق على الناس اللي قدامي لما كنت بضربوا تحس انو بيزعق

في حرارة بسيطة تحت رجل السواق و ظبطتها باني خليت التكيف يطلع من الهوايات بتاعت الرجلين و الهويات العادية لحين معرفة حل ليها

المراية اللي في النص رؤيتها مش قد كدة حاسس انها مش كاشفة الدنيا ورايا كويس

صوت الموتور عالي نسبيا لكن مش دبابة يعني عادي

الباور بتاعها عاجبني جدا بالرغم من انه اتقل من اللانوس لكن مدي للعربية ثبات رائع تحس ان العربية ماسكة في الاسفلت خصوصا مع الكاوتش ال185 و الجنوط ال15

العربية تحس و انت سايقها انها عاوزة تطير فعلا انا مكنتش عاوز اققرص عليها علشان لسة جديدة بقى و بتاع و التليين و كدة بس فعلا ال 3 rpm دي بتيجي في لحظةو اضطر انقل و هي لسة عندها استعداد تكمل

الكشافات الامامية بتاعتها حكاية كاشفالك الطريق قدامك بشكل مش طبيعي يعني انا على طريق القطامية اللي هو ضلمة كحل في بعض المناطق و بالعربية التاني بولع العالي و الواطي و الضباب و نور الموبايل و الجزمة اللي بتنور و بردو مببقاش شايف كويس اما مع دي فما شاء الله الله اكبر مشغلتش العالي غير مرتين 2 بس و للحظات مش اكثر

صوت الاشارات بتاعتها بقى حلو قوي و مميز مش زي صوت الاشارات اللي في كل العربيات اللي ينرفز لو فضلت شغالة شوية

الكاسيت صوته ممتاز جدا و ال4 سماعات شغالين الله ينور و صوتهم حلو

ده اللي حاضر في باليي دلوقتي و حقلكم الباقي بعدين لما افتكرو

بس من الاخر I LOVE RENAULT LOGAN