كنت رايح شغلي الصبح بدري يوم 6 أكتوبر
وأنا ماشي في الشارع رايح اخد عربيتي من الجراج وسرحان في حاجات في الشغل
فجاءة حسيت ان كتفي بيتقل
وفي لمح البصر شنطة اللاب توب بتجري على دراعي
فاكتشفت اني باتسرق...

ومسكت جامد أوي في الشنطة وماحسيتش بحاجة غير اني وقعت وباتسحب على الأرض
واللي بيسرقني راكب عربية أوبترا وماسك في الشنطة وبيجري بالعربية........!!!!!!
وماسيبتش الشنطة غير لما شوفت وشه في مراية الباب
ورحت سايب الشنطة وطيران على عربيتي وفي لحظات كنت على الطريق ماشي 180 بقمة العصبية والجنون والألم وجيبته بعد مسيرة حوالي كيلو متر واحد

واستمرت المطاردة حوالي 10 دقائق من الرعب الأكيد لأننا كنا ماشيين بسرعات عالية جدا وكان بيحاول يلبسني في أي حاجة

ازدت عنادا اني امسكه واطلع فيه القديم والجديد وقررت........................



أني أخبطه وأوقفه علشان مايخبطش بني ادمين مالهمش ذنب...

وفي حته فاضية خالص قرصت على عربيتي باقصى ماعندي ودخلت جنبه ورحت داخل فيه بجنب عربيتي بقلب...

وراح المعلم داخل في صف عربيات راكنة دغدغهم (للأسف) وعربيته اتفرمت ووقفت

ووقفت أنا قدامه لما اتكدت انه وقف و مش هايعرف يمشي بيها تاني (كل ده في لحظات)

ونزلت من عربيتي و هو كمان نزل وطلع يجري و أنا هاتك ياجري لما نفسي اتقطع و عمال أقول امسك حرااااااااااااااامييييييي ييي.........ز

والناس كتر خيرهم مسكوه وهاتك ياضرب...وبلغت النجدة
وأخدت حاجتي والحمد لله كانت كاملة لأن الشنطة كان فيها حاجات بالهبل منهم موبايلي وExternal Hard Disk وورقي وشغلي و مفاتيحي ونضارتي........الخ

ووديت الشنطة في العربية و قفلتها ورجعتله ..... وانتوا فاهمين ....................

ولقينا مع البيه بطايق لسيدات مساكين سنهم بعد الأربعين حوالي 5 بطايق و بطايق بنات
وكان من الواضح انه محترف خطف شنط...
وبعد كده في القسم اكتشفنا ان البيه معاه موبيلات مسروقة وفيز بنوك بأرقامها السرية و العربية كمان طلعت مسروقة وبقالها شهر صحابها بيدوروا عليها ...

وكمان طلع عيه حكمين واحد بستة أشهر وواحد بشهر (مع وقف النفاذ...!!!!! يعني صعب عليهم!!تقريبا)
ومتبلغ عنه في 2004, 2005, 2007, 2009 والغريب ان الحكومة سيباه وسطنا (والله اخر مهزلة)

المهم ان المباحث والنبطشية بيتخانقوا مين اللي يعمل المحضر ولو أي حد تاني كان زهق وفضل الواد ده ابن التيتيتيتيت... شغال سرقة الله ينور
واستمرت المفاوضات بين المباحث والنباطشية لمدة 4 ساعات ولسه ماحدش مسك قلم وعمل محضر....!!!!

فعملت اتصالاتي علشان أجيبلهم واسطة يخلصوني ويعملوا المحضر ااه والله..
المهم عملنا المحضر ووافقت على تسليم اللاب توب علشان يتحرز علشان اثبت التهمة عليه...علشان يتحبس واريح الناس من همه..

والغريب في الموضوع ان واحد من ضمن العربيات اللي دخل فيها البيه لواء شرطة في منصب مرموق وطلعنا نعرف بعض و ماظهرش تماما في أي حاجة..!!!!!

المهم صحاب العربية المسروقة لقيتهم جايين مع المحامي بتاعهم وحكالي حكاية غريبة...
ان العربية أصلا كانت متأجرة يوم ما اتسرقت يعني اتسرقت من المؤجر مش من المالك
والحرامي اللي سرقها سرقها بمفتاحها!!!!!!
لأن الحرامي هو الصديق المقرب للمالك اللي عنده مكتب ايجار...!!!!
وبعملوا كده علشان يبتزوا اللي أجر العربية واتسرقت منه علشان يجيبلهم واحدة بدل اللي اتسرقت.... شوفتوا قذارة وانحطاط أكتر من كده؟؟؟ لا حول ولا قوة الا بالله
المهم روحت معاه في نفس اليوم بالليل واليوم اللي بعده الصبح النيابة علشان أشهد عليه أنا وشاهد (واحد جاري) علشان ياخد عقابه و علشان اخد حاجتي وعملت اتصالت بناس رفيعة المستوى لتوصية وكيل النيابة بحبسه (اللي هو أصلا من أكتر الناس المحترمين المعدودين في الموضوع).

شوفتوا بقه الدنيا في مصر بقت عاملة ازاي؟؟؟

لو الحرامي بتتقطع ايده زي ما شوفت في السعودية ما كانش سرق تاني....