الموضوع: تقريرعن مقابلة الكياوية يوم 9/10/2009

السلام عليكم ورحمة الله وبركاته ....


اولا شكر خاص للاعضاء :

1- مهندس/ احمد >>> yoko
2- انسة نهله >>> lolly136
3- مهندس احمد الشناوي >>> wookie
4- مهندس شريف >>> sherif2net

بعد استقرار الاعضاء على مكان المقابلة - وهو سيتي ستارز - وكان المعاد الساعة الثالثة عصرا ...طبعا انا اول واحد وصلت وبعد كده وصل المهندس احمد yoko المهم طلعنا قعدنا في كوستا اللي في الدوربتاع السينما...وشربنا الامريكان كوفي والموكا ... نتكلم عن العربية شوية وكان هو بيشتكي من الافيو .... وانا كنت بشتكي من الفيكترا..وقعدنا احنا الاتنين نشتم في منصور من اللي عمله معانا .. شوية كمان وجت الانسة نهله .. وعايز اقولكو انها شخصية محترمه جدا وفاهمة في العربيات كويس اوي وعلاقتها جامده جدا بالناس في كيا مصر ... وبرده قعدنا نتكلم شوية عن العربيات وقارنا السيراتو بمثيلاتها في السوق في نفس الفئة الفنية او السعرية ....بعد كده بقه .. وصل المفاجأة الجامدة وهي المهندس احمد الشناوي وعايز اقولكو انا مشفتش ادب واحترام كده في حياتي .. لا مؤاخذه يا ابو حميد بس انتو عارفين يا جماعة لما تشوف واحد أدبه زيادة اوي يخنقك من ادبه ده وهادي خالص.. بس بجد سعيد فعلا اني اتعرفت عليه ...وكان معاه بروشور السيراتو واللينيا ... وقعدنا نتكلم كتير اوي .عن السيراتو غيرها زي السيتي واللينيا والسيفيك والكروز ..ومشاكل الاوفر برايس .. ومشاكل التوكيل والسياسة الغريبة ليهم.وبعد العصائر والمأكولات الشهيه . للاسف مشي yoko ومكملش القعدة وده لظرف قهري وهو انه عنده تدريب تنس وكان لازم يروح .. توجهنا الي الجراج ... وكانت عربية نهلة السيراتو old shape .. كانت راكنه بعيد اوي واتمشينا جوا الجراج كتير زي ما تكون كانت بتعذبنا .. المهم قعدنا نتفرج شوية على العربية واتفرجنا عليها من جوا ومن بره ومن الموتور بس اكتر حاجه بقه استفزتني في عربية نهلة هي الكرسي .. عايز اقولكو ان الكرسي طالع لقدام لحد الاخر يعني بتقعد حاضنه الدركسيون .. واللي بيقعد في الكنبه اللي ورا بيحس باتساع رهيب في العربية ... نفهم من كده ان نهلة طويلة جدا ... وبعد كده جالنا المهندس شريف وهو كان معاه النيو سيراتو ex لكن مكانتش في الجراج لانه كان راكن فوق . وهو فعلا شخص فاهم جامد وما شاء الله محافظ على عربيته وحافظها حته حته. وبعدين طلعنا فوق كلنا وبقو العربيتين جنب بعض لمدة خمس دقايق قبل ما نهله تخلع مننا بدري بدري ..وطبعا مقدرناش نتكلم عشان منأخرهاش ... وبعد كده قعدنا انا والمهندس احمد الشناوي والمهندس شريف ..واتكلمنا عن العربية وسألناه على حاجات كتير وكان متجاوب جدا وفهمنا كل حاجه
.. اما عن نتيجة وجود العربيتين جنب بعض فا اتضح لينا الاتي:

1- الصاج بتاع السيراتو الشكل القديم اقوى وفي مسطرة فيه محسساك ان الصاج قوي برده لكنه فعلا اقوى
2- الصالون من جوه في القديمة مش وحش لكن في الجديدة حلو ومنسق و لكن خاماته متوسطه
3-الموتوركان واحد عشان عربية نهلة كانت ملحق 2009 الاختلاف في الكفر بتاع الموتور بس
4-العفشة بتاعت العربية القديمة احسن من الجديده
5- شنطة القديمة اوسع وطبعا المعلومات دي من ملاك العربيتين
6-النيو سيراتو الافضل في فئتها في الصناعات الكورية واليابانية لكن لا تقترب تماما من الاوربية

وبعد المقارنات خلصت المقابلة واستقر المهندس احمد الشناوي على السيراتو الجديدة وان شاء الله بالتوفيق يا بشمهندس ومستنيين تقريرك

ولتاني مره اشكر الناس اللي شرفوني يوم بالمقابلة وسعدت جدا بيهم و سعيد جدا اني اعرفت بيهم لانهم ناس بجد محترمين يعني بالبلدي (لما يكون الواحد ابن ناس بيبان عليه) .. برده زعلان من الناس اللي قالو هنيجي وفي الاخر زوغان لاننا فعلا استفدنا في المقابلة دي وبغض النظر عن العربيات احنا صحاب يعني اللي بينا مش مصلحة وخلاص .. وتقبلوا فائق تحياتي ونتظرونا في المقابلة القادمة